眾新聞 Logo
眾新聞 CitizenNews
眾說

習近平呢期煩爆乜?


【撰文:筆鳩】

今時今日,關心香港前途嘅人,都會更加留意美國有乜嘢動作,指向中共或者香港。呢一期,美國就喺全世界人面前連番展現,乜嘢叫做美國嘅「超級軟實力」。

今個星期二 (26日),只不過係區議會選舉結束之後第二日,路透社就爆出,中聯辦主任王志民要問責落鑊。但其實更重點嘅係,呢篇報道仲踢爆,中共為咗加強管控香港呢幾個月嘅反送中運動,要喺深圳紫荊山莊設立危機管理中心同前線指揮中心;而更更重要嘅係,路透社仲爆咗習近平每日都會收到紫荊山莊啲書面簡報,換言之,習近平實際上都要為香港搞到今時今日,孭上最後隻大鑊。

王志民仲有冇得撈,要看習大人如何發落。

同一日,美國CNN亦都爆料,指菲律賓全國嘅供電網,已經完全俾中共所控制,同埋採用咗華為嘅技術;若果中菲之後出現衝突,北京隨時可以令全個菲律賓大停電。

早幾日,喺上個星期六 (23日) ,澳洲傳媒爆出,話自己曾經喺香港同台灣做過中共間諜嘅男子王立強,上個月叛逃到澳洲尋求政治庇護時,向澳洲政府大爆,中共點樣喺香港、台灣同澳洲,捉人收料放針插旗嘅手法同情況。

變節中國間諜王立強接受澳洲傳媒訪問。網頁截圖

再早一日 (22日),喺香港出世嘅美國中央情報局CIA人員李振成,就佢早前承認向中共提供情報等等罪名,俾美國法庭正式判監19年。

再再上一個星期六 (16日),《紐約時報》已經用頭版長篇大爆攞到400頁文件,揭穿中共點樣喺新疆搞再教育營嘅具體內情。

《紐約時報》關於新疆再教育營密件的報道。網頁截圖

前後11日連續俾美國方面爆出5單涉及國家級機密嘅嘢,中共一喺就唔回應,一喺一回應就俾人再牙膏式爆料,搞到更加樣衰。相信連中南海一眾北大人都心知肚明:美國點解可以有咁多線路,收到咁多我哋啲絕密料?(至於習近平係咪其中最疑惑嗰個?真要問佢先知。)

以上種種,是之謂美國嘅「超級軟實力」:中共以為咁多年嚟收收埋埋做緊啲高招,原來唔少都早喺美國掌握之中,仲會喺適當時候畀啲顏色畀中共睇。

如今問題係,美國點解選擇喺呢陣子,連珠爆發放料出嚟搞中共?至少有3個理由。

第一,呢個禮拜初就爆出,中美貿易談判又有新阻滯。劉鶴上個禮拜想請美國貿易代表萊特希澤同財長姆欽到北京再傾,但美國就想中國喺保護知識產權等領域有更具體嘅承諾,拖住唔去住。仲有報道話,中美就算到明年,都唔會喺短期內開始第二輪磋商。

第二,呢個月17號,中共第一艘自製航空母艦駛過台灣海峽。須知道,台灣民進黨總統蔡英文早因為受惠於香港反送中運動,明年1月大選選情更加向好,但中共呢個時候仲搵隻航空母艦嚟玩示警。

第三,要畀全世界都注意,澳洲係美國圍堵中共島鏈政策嘅亞洲後援基地,亦即係美國喺亞太地區個「前院」。爆王立強單嘢位澳洲傳媒記者,正係2014年香港雨傘運動期間,踢爆當時特首梁振英單5000萬UGL嘢嗰位。

世事,唔係咁偶然嘅。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe