眾新聞 Logo
眾新聞 CitizenNews
眾說

香港成新美租界!


【撰文:筆鳩】

中美首期貿易協議仲未肯定簽唔簽得成,美帝侵侵當地時間星期三,就由之前一直冇公開表態簽定唔簽,一嘢就先簽署咗《香港人權與民主法案》。佢仲喺附帶聲明中話,佢簽呢份法案,係對中共習總書記嘅尊重,希望佢同香港啲領袖代表「友好地化解分歧,為所有人帶來長期和平繁榮」咁話。中共就由外交部帶頭強硬措詞回應,至於之前講過啲會有乜嘢反制措施,哦,暫時影都冇。

響應和你Lunch的市民,張貼海報感謝特朗普簽署「香港人權與民主法案」。美聯社

查實,中共自己都應該心知肚明:佢哋早陣子放任港共,意圖加大鎮壓香港反送中運動,連中大校園都攻到成個山頭催淚彈,結果撻著咗美帝共和民主兩大黨,喺眾議院參議院加速一致通過呢條法案,為之後隨時更具體制裁中共港共,先開定個頭。到咗呢個位,侵侵都冇乜可能唔簽啦:事關總統大選臨近,佢點都唔可能同共和黨啲參眾議員大佬過唔去!(至於蕭生,也就「燈」多一次...)

呢邊廂,中共就上演咗一場現代版「喪權辱國」:美帝已經藉法案,帶領國際社會擺晒制裁陣勢,隨時招呼中共港共陣營任何一個人;形勢比人強,之後喺香港,話中國已經成為美國白手套,香港亦已成為現代美國新租界,也不為過。

點解咁講?須知道,第一,中共人民幣要喺國際金融體系流通又好,走資又好,都要靠香港。何況,美元仍會獨霸全球貨幣結算體系2、30年!人民幣想挑戰美元地位?之前連日元同歐元都撼唔贏,日元仲要喺上世紀90年代不過只係有潛在威脅,就俾美帝提早打沉!

人民幣想挑戰美元地位?有排啦!

第二,美帝呢條法案,更正式宣布香港已經成為美國新島鏈政策嘅新一前沿,中共港共稍為玩嘢,即刻就有機會俾美帝連環封鎖!而有別於當初為冷戰阻止中共對外擴張而構建的東亞島鏈,由北邊嘅南韓日本經台灣菲律賓再到新加坡,仲有後面一重嘅澳洲到依家仲多咗個印度,香港呢個美帝新據點,就連兵都唔使派基地都唔使起,亦唔使要大花資金嚟喺台灣之類地方製造,因為香港本身正正已經係中共要靠嚟搵錢搵食嘅亞洲國際金融中心,而美帝一條法案就攞到喺香港嘅主導地位!大家話中共呢鋪點會唔係喪權辱國!

事到如今,中共當初想藉搞《逃犯條例》,加緊對香港嘅控制,以至想藉此加大對喺香港各式「外部勢力」嘅控制,結果就先引爆咗香港人嘅怒火,亦令國際社會意識到中共呢步棋可以幾狠,美帝最後一招反殺。如今恐怕連中共都知道,美國對一個社會穩定、思想親美嘅香港,至少都樂觀其成。繼續爭取香港要有自身核心價值嘅香港人,經過一場反送中運動帶嚟嘅種種覺醒,之後都知道乜嘢要繼續做,乜嘢要減少做啦!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe