眾新聞 Logo
眾新聞 CitizenNews
眾聞

「答咗等如冇答」 眾新聞輯錄3條問題的對答看警方4點記者會之日常


因反對逃犯修訂條例引發香港社會逆權運動,警民衝突日益增加,警方原先每日4點召開記者會,是希望解釋警方的行動,加強警民溝通,但這個記者會近月被很多市民形容為「警謊會」,事實上記者會上,很多時候是記者有記者問,警方「答咗等如冇答」。眾新聞輯錄周五(27日)警方記者會其中三條問題的對答,讓讀者看清楚這種警方記者會的日常形態。

出席27日記者會的警方代表,左起:行動部高級警司汪威遜、有組織罪案及三合會調查科高級警司李桂華、警察公共關係科總警司郭嘉銓、警察公共關係科高級警司(媒體聯絡及傳訊)江永祥。香港電台直播畫面截圖
 

記者:有便衣警員被防暴警截停,但睇返個畫面當時嗰位防暴警用咗少少武力,一般認知下,因為警員見到有人做違法行為,先至會作出武力上的拘捕,其實當時嗰位便衣警員係做咗咩行為,令到防暴警會咁樣去對待佢呢?如果係無的話,又點解需要用到武力去截停佢呢?

警察公共關係科高級警司(媒體聯絡及傳訊)江永祥:

當時我哋知道有幾十個黑衣暴徒係餐廳搗亂,再加上我哋同事因應多月來暴徒的暴力升級,其實好多時我哋同事都係高度戒備,如果一年前我哋去拘捕人,梗係可以好簡單搭一搭膊頭,「先生,你停低,企係度。」就搞得掂,但今時今日我哋去截停一個人唔係咁易,大家可以見到有人為咗逃走係可以推跌我哋同事,然後自己唔知點解由商場高處,唔知係咪荒不擇路咁跳走咗。所以我哋係截停一啲嫌疑人我哋都好小心,呢個就解釋咗琴日你見我哋軍裝同事未能辨清自己便衣同事身份前,其實都高度戒備,因為我哋唔知下一秒會發生咩事,當我哋同事澄清身份之後,其實即時已經放行咗。 

 

記者:立場新聞記者被截查,警員就展示佢身份證係直播鏡頭前,其實當時記者向佢詢問係咪警察,點解需要被警員截查?警員展示佢身份證同埋記者證呢個做法有無違反調查截查的紀律?

警察公共關係科總警司郭嘉銓:

我再次重申我哋對事件表示關注,亦再次強調我哋好重視個人私隱,要求同事遵守相關的守則同埋法例,因為個人私隱資料專員公署今朝有提過,要主動調查有關個案,而我哋都會主動了解。有需要時間會配合番私隱專員,暫時調查未完成之前,我哋唔會再特別去評論呢個個案,亦無特別補充。

記者:APM商場入面,之前有片段拍攝有警員喺入面做截查同埋拘捕行動,當時應該無衝突發生,但就有警員鬧記者係黑記,而個位記者都有展示記者證,而警員都可以睇得清楚,可以埋去了解清楚,呢個情況下有警員講:「有記者證又點?又唔係總統卡」、然後再加多句:「你以為有第四權」,其實想問下對於呢啲言論,警方高層係點樣睇呢?過去呢半年幾多次發生呢啲事件,如果係有違規,點解唔跟規則跟進?而係繼續用勸喻式去了事?

警察公共關係科總警司郭嘉銓:

過去呢半年好多示威場面,前線同事同記者之間的工作都係備受挑戰,我哋管理層立場一直都係,絕對係尊重新聞的自由,亦都尊重在座各位傳媒工作者採訪的權利,亦有一貫政策去協調,咁嘅緣故我哋先有傳媒聯絡隊,去安排不同暴力示威場面,協調不同工作,當中係有時係有啲磨擦,有啲唔係好恰當的用語,我哋會提醒番自己同事,希望佢哋要理解記者在前線工作有佢責任,希望係互相尊重的情況下,可以做到大家工作。
我上任大概1個月左右,其實過去呢段時間,我都嘗試係有聯絡過你哋嘅攝影記者協會或者記協、新聞行政人員協會,希望安排一啲機會,坐低過一次嘅,亦都希望再有機會安排前線同事,同番你哋前線的代表,大家真係去溝通下、了解下大家係衝突現場個個工作的困難,希望可以透過溝通,大家多份尊重,可以讓大家工作暢通啲,有關事情我哋會繼續跟進番,提醒番我哋同事要尊重記者的工作。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe