眾新聞 Logo
眾新聞 CitizenNews
眾說

手足來信:我喺監獄都唔放棄,革命未完


工黨立法會議員張超雄收到手足的信件,手足希望投稿予媒體刊登,全文如下︰

喺出面嘅手足、和理非︰

我係喺荔枝角還押嘅一位前線抗爭者,其實都唔係第一次去寫俾你哋,但其實要對你哋嘅感激,點都講唔完。

12月20號嘅晚上,由10點鐘開始聽到你哋嘅聲援,仲記得入嚟收押所嘅期間,手足叫緊嘅口號係「香港人加油」,期後演變為「反抗」同「報仇」。

好多喺監房嘅朋友仔去問我,我哋爭取啲咩,我哋幾時先停止搞亂香港,而最多嘅問題係問有冇錢收,然後我無論點去講出事實,依班朋友仔仍然選擇去相信TVB,然後每一個早上我都會打開電視睇NOW新聞,逢星期一、星期五6點,睇「鏗鏘集」以及「頭條新聞」,啲朋友一路睇,一路問啲詞語,例如「煲底」、「Be Water」、「TG」、「連登」、「PePe」嘅詞語代表嘅嘢,由一開始不同意示威者嘅,開始明白點解啲市民要同警方對立,有人喺電視上睇到警方亂棍打市民,之後講咗句「乜警察可以咁打人嘅咩?」而我只答咗佢一句「依度影到嘅只係你睇到嘅小部分,仲有好多好多你係睇唔到。」

張超雄收到獄中手足的來信。工黨提供

然後,依位朋友仔會去分辨真假新聞,去嘗試了解我哋諗嘅嘢,了解五大訴求,以及警方記者會裡面嘅真確性,其實我每一日坐監都係好悶,公開信寫過2至3次,我覺得可以分享下喺收押所之中嘅親身經歷,俾外界嘅手足知道雖然被困,但係繼續同行,從不割席。20號晚上,依位朋友仔去真正細心聽你哋講嘅嘢,以前佢會覺得好嘈、好煩,至少今次佢聽到「手足,我撐你」、「煲底見」、「釋放義士,還我公義」,從窗邊望出去可以見到一盞盞由手機燈形成嘅星海,你哋喺出面「和你寫」嘅聖誕卡,好多朋友見到都好驚訝,依啲聖誕卡每一張都令我好開心,有小朋友、手足、家長們、銀髮族等等,有朋友問我「榮光」點唱,但本人比較怕醜 XD,所以冇去唱俾佢哋聽,希望依位朋友嚟煲底同我相認啦。

其實初初我會認為收押所內嘅朋友會明白我哋,但原來係缺乏(真實)資訊嘅情況下,對我哋示威者有所誤會都係可以原諒,大多數人唔明白三罷、中資、美心、吉野家、優品360點解要破壞,地鐵站被破壞原因、「私了」的原因,太多嘅資訊唔明白,但至少我可以用自己所擁有嘅資源去帶出運動/革命嘅始源,我唔知有冇大作用/改變,至少我冇忘記「兄弟爬山」,希望將不了解我哋嘅人去慢慢接受、同行,我喺監獄都唔放棄,香港人,因為團結,我哋先有今日,所以革命未完,你哋點可以放棄呢?

#光復香港 時代革命
#五大訴求 缺一不可
#沒有暴徒 只有暴政
#解散警隊 刻不容緩
#釋放義士 還我公義
#林鄭落地獄
#黑警死全家
#香港人反抗/報仇
#煲底見

27-12-2019


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe