眾新聞 Logo
眾新聞 CitizenNews
眾聞

北角黃絲聚腳點Brew Note:「撐良心小店,唔係一直應該做嘅咩?」


北角一向被視為「福建幫」重地。位處堡壘街的Brew Note Coffee Roaster(下稱Brew Note)是家小啡店,卻一邊被點評為「曱甴屋」,另一邊則視為同路人、黃店。店主Vincent Hung 說得明白,從未想過到內地開店,但亦不想「因黃之名」戴上光環、換來生意,用他的話,那是本末倒置。 

Brew Note店主Vincent Hung 強調,不想因黃店之名,換來生意。Trevor Tse 攝

Vincent 欣賞黃色經濟圈的動機,但黃店更須努力,要值得這份支持。「想砌低藍店係合理嘅,但盲撐黃店,難食都有人護航,即係揠苗助長,佢哋晤好,你仲俾錢佢,咪更晤好。」他認為,黃藍難判別:「貼海報,到推『五大素球』,過火就核突。」還原基本步,餐飲、零售也好,貴乎每次消費體驗,用心經營,那才是價值所在。「撐良心小店,晤係一直應該做嘅咩?」
 
Brew Note是在2014年7月開業,也是Vincent 的創業作,未幾「831決定」觸發雨傘運動。「當時個女剛出世,又第一間店,負擔都大,但佔旺嗰日,同事好憤慨話要出去,我哋閂舗都去,印象深刻。在2019年返轉去睇『雨傘』,覺得好似好小事,但無『雨傘』就晤會有2019年嘅局面,『雨傘』係公民運動好重要嘅里程碑。」
 
Vincent 相信,生活與政治是密不可分,亦引發其對經營Brew Note的反思,造就文化沙龍的出現。「BrewNote 係想做一個好烘培嘅咖啡空間,我成日問自己咖啡店係咩?機能係咩?係咪淨係飲咖啡、食飯上網?」直到2017年,他因為台南咖啡館道南館店主夫婦的關係,認識了中文大學政治與行政學系周保松教授,二人談了兩星期,就開展第一場文化沙龍。
 
自2017年至今,文化沙龍談甚麼是好生活,討論也不獨是政治,還有哲學、文化、戲劇、情緒,邀請吳靄儀、梁文道、黃耀明對談,也有請楊秀卓、傅月庵、莊梅岩分享,「嚮一個市井之地— 北角係個普通街坊地方,但一門之隔就有呢種公民社會呈現。」Vincent和周教授的想法是:「第一個做,然後激發其他人做。」後來,深水埗大南街合舍亦舉辦酒精沙龍:「每月圍爐傾計,都引發有好多思想。」他深信思想是最長的戰線:「唔好停止思想、唔好停止傳播、唔好停止討論,思想係最難禁止,要留落去下一代。」  

文化沙龍為 Brew Note 帶來內容,令該店成為香港具代表性的啡店之一。可有為建構黃色經濟圈帶來新的思考方向?圖為其中兩位講者李立峯(上圖)及莊梅岩。照片來源:取自文化沙龍專頁
 

本身是福建人的Vincent形容:「BrewNote 有獨特生命,喺係『福建國獨立自治區』嘅黃絲聚腳點,由最初搞音樂到談公共生活。」這個身份在今場抗爭運動中,帶來兩次注目的事件。

第一次是6月29日,中大新聞與傳播學院院長李立峯來談「無大台- 理解抗爭新世代」,吸引約150人參與。對談至晚上9時半,突然出現多名大漢衝入點內叫囂,企圖阻撓講座進行。(《蘋果日報》短片報道
 
後於8月5日「大三罷」晚上,示威者在北角明園西街,涉嫌被手持鐵通、木棍、藤條的白衣人士襲擊。「第一張福建幫相,我影嘅,仲有直播,後來返去開門。」他說曾嘗於某夜,門外有過百防暴,店內還有不少街坊,「之後低調了,但BrewNote 已成為(福建幫)重要目標。有無恐懼?唔會無,但我覺得責任行先。」自此Brew Note也成為網民重點「被懲罰」對象,生意應接不暇,但Vincent更認為值得反思「黃色經濟圈」的深意。
 
「唔係黃藍之分,係良知,發覺香港都有文明與不文明,係價值觀抗爭,我唔覺得係揀咗政治取態。反送中議題、反警暴、爭取人權、自由,都唔係政見,係人民精神對自由的渴求,係呢一代對下一代嘅責任。」他相信,無論BrewNote,或者文化沙龍,當下可以遠離:「唔做李立峯、區諾軒,好多(議題)可以晤掂,但呢個時代從來無離開過政治話題。」
 
就如抗爭運動提到的「不割席」:「616 係因為有第一位自殺,敲響良知,令200萬人走出嚟,改變香港人唔係因為反送中,係我哋唔想活係謊言世界,唔想眼白白睇住年輕人去做啱嘅事。年輕人無條件付出,唔覺得自己付出得夠,唔想得到多餘嘅,都無做夠過,(自己)唔值得。」
 
就算Brew Note要選擇在北角默然無聲,Vincent 還是註定不能置身事外,因為他在中文大學及浸會大學合共經營三間Paper & Coffee ,其中浸大和中大第二店分別在2019年9月及10月開業。「中大同浸大少做咗80、90萬生意,都afford 到;營商者無資格去blame 時代,香港太安全,慣咗好多嘢理所當然,日本地震可以攞走條命,做生意,得失唔應該賴人,唔應該 blame 示威者。」
 
中大二號橋之戰,他三天留守店內:「佢地(學生)係我嘅客,唔會俾佢哋餓親。」他佩服當日到中大救人的每一位:「每個人都見到六四,理大十萬人去救人,都因為見到六四。」 

Vincent認為咖啡店最有資格脫離一買一賣,帶來更多人與人之間的互動。Trevor Tse 攝

親證種種,Vincent 眼中的黃色經濟圈,是為這一代帶來具代表性的地方,令香港成為更好的城市:「有好嘅咖啡店、酒吧,有好嘅書、有好嘅內容,要做出價值;香港人要有思想,有風景嘅地方,咖啡店最有資格脫離一買一賣,可以有好多human touch希望開每間舗都可以為呢個城市帶來多啲landscape。」
 
6月10日,反送中100萬人遊行的翌日,是他在西九龍文化區的Rest Gin Coffee(唞唞)開業:「當時係想香港有個地方唞吓,諗唔到原來我哋係會咁攰,Brew Note之後亦無一間舖(與社運) 拉唔上關係。」他亦盼望香港有光復的一天:「有好多嘢可以做。」
 
小簡介:

29歲的Vincent Hung 是2011年世界虹吸式咖啡師大賽香港區冠軍、Coffee Quality Institute(CQI)Q Grader認證的杯測師、歐洲精品咖啡協會認可培訓導師,於2014年在北角創業,開設自家烘焙咖啡店Brew Note,偏愛淺度烘焙。
 




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe