眾新聞 Logo
眾新聞 CitizenNews
眾說

欽差駕到誠哥頭痕!?


【撰文:筆鳩】

中共星期六(4日)正式公布,已近退休年齡嘅前山西省委書記駱惠寧,接替王志民出任中聯辦主任;據報,至遲當日佢已經喺香港開工做嘢。但香港人更加要留意嘅係,呢個上個月28號,即係只有10日左右前,先由中共官方落實改任全國人大財經委副主任委員嘅駱惠寧,一個禮拜之後就抽返出嚟香港坐鎮中聯辦,究竟係點樣唔尋常。

從地方官退休的駱惠寧突然空降中聯辦,新官到任,香港很多人都坐立不安。美聯社

睇返駱惠寧啲官場經歷,相比於唔少已經因反送中豁出去嘅香港人,城中啲權貴,就可能更要快啲自求多福。

呢兩日已經有資料指出,駱惠寧2016年調任山西省委書記後,兩三個月就擺出姿態,要改革當地過分倚賴「一煤獨大」嘅產業結構;最標誌一役,係佢2019年11月臨做完山西省委書記前,都仲要係中共中央機關刊物《求是》出文,話點樣喺黨總書記習近平指導下,經佢親身訪問同搞文宣,成功谷起省內啲風力發電廠,打擊省內產煤嚴重過剩嘅問題。而駱惠寧係呢方面嘅政績,可能比佢同時點樣執返正省內官場貪腐個問題,仲更關香港事。

此話何解?山西全省官民主力靠煤搵食,最遲已經係6、700年前明朝嘅事!即使到二十世紀,煤礦業仍一度佔山西全省超過一半財政收入,提供全省5%就業機會,佔全國煤炭生產量接近12%,而煤炭就一度佔全中國能源結構七成!睇返中共啲官場文化,煤礦業啲利益點盤根錯節,甚至講係省內一大「霸權」,都不為過。

一講到「霸權」,大家就自然諗到香港啲「地產霸權」,尤其依家講到駱惠寧過往一直同香港各路利益集團冇乜聯繫,呢啲霸權恐怕已經連向佢投誠都嚟唔切,何況係近呢幾個月動作多多,俾工聯會寸佢係「曱由王」嘅誠哥?

再講駱惠寧個後台。有人話駱惠寧唔係習派,但習近平都仍然咁破格任用,至少都反映到佢係習派所接受;再加上佢又被指出身江派系統,喺山西搞經濟啲成績又獲黨肯定,睇嚟團派至少都對佢冇乜太大意見。

調返轉講,正係駱惠寧喺山西做出成績,佢嗰種喺地方逐步捱上嚟嘅實幹型作風,最重要係佢識得乜嘢時候功歸聖上,乜嘢時候就自己埋頭苦幹,可能更加得習近平同佢親信啲歡心!查實,呢兩日好多人知佢2018年喺山西親自帶隊嚟香港招商,其間同林鄭月娥見過面嗰一次,原來係山西近20幾年嚟第一次咁高規格嚟香港嘅招商!

須知道,林鄭當初喺官場「響朵」,就係佢嗰種凡事親力親為死做爛做嘅作風,但送中條例一役可見,林鄭肯定唔多識中共官場啲走位同文化;呢樣嘢,駱惠寧肯定可以帶住林鄭之後點行!尤其係,當中共將反送中運動觸發港人啲離心,仍然定性係源於經濟方面啲深層次矛盾,林鄭之後點樣可更加執行到習近平啲意思,結果又令到習近平稱心如意,駱惠寧肯定會好好咁指佢點行就點行!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe