林鄭昨晚全場維持一模一樣嘅笑容。但如果我係佢下屬，睇完成場真係唔識笑。唔係講佢嘅整體表現，係佢做上司嘅態度。
首先，佢公開讚對手曾俊華嘅助理羅永聰做得好，甚至笑話「有人叫我不如請阿聰啦」(類似意思)。嘩，我係佢手下嘅話仲駛見人？仲出得嚟行？
然後佢又話自己冇駛錢請助理，但立即就有傳媒 fact check 佢明明就有請過政治助理，前記者張秀麗。我唔知佢係扮唔知定唔記得。扮唔知，就佢係「大話娥」。唔記得呢，高官政治助理係高官自己請嘅，妳請過咩人做野，咩人為妳做過野，同過咩人共事，妳乜都唔記得？即係妳眼中冇班o靚啦？
跟住，佢又猛寸鬍鬚「好得閒」所以可以返工上 fb 和民望高，又話自己好忙冇時間上 fb 和學習同市民溝通云云。嘩！妳做三十幾年官都未學同市民溝通架？外國高官嘅話唔好話同市民溝通，上 fb 上 twitter 上 IG 通通都係基本嘢囉。
仲有，話人返工得閒，潛台詞就係話人懶啦，即係佢又係果d認為上 fb 就係懶人廢青果類老細。甚至仲衰，因為你識同人溝通又係懶人廢青，人緣好又係懶人廢青，準時放工又係懶人廢青，甚至可能放 lunch 出街食又係懶人廢青。
難怪有人話，鬍鬚同葉劉都有一堆前下屬公務員幫，林鄭身邊就幾乎冇。「妳睇下自己啦」。「這是錢買不到的團隊。」「這是錢買不到的團隊。」
By the way 佢又引「果個民調」話自己民望贏wor，咁佢到底係 underdog 定民望高架，夾下口供得唔得？
