眾新聞 Logo
眾新聞 CitizenNews
眾說

林鄭派錢害死香港


林鄭公布「民生十招」,涉及百億元開支,睇完火都爆!先唔好講話呢十招對中產及青年人完全冇幫助,更重要係,咁派法香港肯定遲早爆煲!

自林鄭上台後,2018-2019年度財政預算案,經常性開支增加11.8%,已是少有的新高。但再看上一個年度的數字,7.4%!再加埋今年呢一百億,今年增加5%至6%一定走唔甩。換句話說,自林鄭2017年上台後,經常性開支增加接近三成!大家都知香港經濟未來數年都會下行,今年陳茂波已經打定開口牌,話必定會有赤字,咁未來幾年會點?

林鄭慷納稅人之慨,花錢收買人心。美聯社

更重要的是,錢是花了,但香港這幾年有任何進步嗎?經常性開支當中,以社褔及教育界增幅最高。大家又可記得,當年林鄭選特首,正正是這兩個界別大舉黃旗,當年己有人批評林鄭慷納稅人之慨,花錢收買人心。但結果呢?大家可有覺得香港的社會褔利及教育質素有所改善?窮人越來越窮,學生繼續要做做不完的功課,這筆寃枉錢到底為誰而花?

再看這新增的所謂「林十招」:

一、兩蚊搭車優惠降低至60歲:相信大家都記得上年羅致光建議過要調高長者綜緩合資格年齡至65歲,「60歲仲係中年」。強積金亦要到65歲先攞得返。換句話說,60至65歲根本係在職年齡。依家將兩蚊搭車優惠降低至60歲,即係要補貼佢哋返工!後生會問,你又返工我又返工,點解你會有補貼呢?特別係香港有好多大公司高層,都係六十歲至六十五歲。連林鄭本人今年都係六十二(雖然佢連港鐵都唔識搭)。而更加重要係,呢條數一啲都唔細!

根據政府去年發表的本港交通運輸年報,香港各類公共交通工具,每日載客約 1,290 萬人次。而香港60至64歲人口,根據政府統計署的資料,佔總人口7.7%。換句話說,按人口比例,政府每日要資助約100萬人次。即使計一半,每程平均津貼10蚊(天水圍出港島搭巴士要$22.7),每日支出己經係500萬,一年開支係18億!

二、向輪候公屋滿3年的合資格人士提供現金津貼:如果實施後會點?第一,年滿18歲讀緊中學,無論有冇住屋需要,都去申請公屋,令公屋輪候名冊爆煲。第二,因供求關係,呢筆津貼最終會落入業主手上,租金肯定會升,冇資格申請公屋的租客就慘咯,即係班低中產人士。

除呢十招以外,呢幾日邱騰華又話要幫阿婆換電視機,要從「關愛基金」撥款約4.5億元,幫八萬個低收入家庭。但計一計數,一個家庭要5600蚊!大家走去電器鋪睇睇,新款的32吋日本品牌電視機,二千蚊有找(零售價喎);如果係林鄭最鍾意嗰間小米,大陸賣緊千二蚊!咁點解要開咁大條數? 大家又記唔記得當年貪曾的慳電膽事件?

而在林鄭宣布完十招冇耐,民建聯就立即仆出來開記招話「 成功爭取」。眾所周知,很多長者經過反送中事件後都變了黃絲,與其說這一百億是為了救市,倒不如話係為建制派於今年立會選舉箍票!

我的看法有三:

一,如果真是為了刺激經濟,最直接的方法是全民派消費券,最好係有時限性,一兩年內要用完。簡單的經濟邏輯,一百億的消費會令社會產生高於一百億幾倍的社會活動。不過,日前有立法會議員問陳茂波會否派消費券,陳茂波一口就拒絕了。

二,基本法107條例明:「財政預算以量入為出為原則,力求收支平衡,避免赤字,並與本地生產總值的增長率相適應。」林鄭狂加經常性開支,是否已違反基本法?

三,政治問題應該政治解決,如果林鄭一味諗住使錢救火,甚至完全冇回應支持反送中最大的一群,即中產和年輕人,試問又點可以解決眼下的問題?

最令市民憤怒,是她宣布十招時,仲夠膽話唔係有呢七個月的反修例事件,就唔會阻住佢度掂呢啲「德政」。七個月前社會一直說要有全民退保,要提高長者津貼,為什麼當時林鄭無動於衷,反而在目前完全沒有任何社會諮詢、於經濟下行的環境下才宣布要提高長生津資產上限及失業救濟?

特首林鄭月娥昨天出席立法會答問大會。美聯社

昨日,林鄭去立法會答問大會,鄺俊宇問她會否下台, 答案當然係不會。就連建制派都忍唔住,容海恩追問現屆政府會否仿傚老董,要求問責官員帶頭減薪。答案依然是不會。死都唔走,咁我想問係唔係落咗地獄之後都要繼續霸住做特首?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe