昨日是醫護罷工第三天，醫管局員工陣線表示逾7000人參與罷工，佔醫管局全體員工近10%，其中大多數為護士，有超過4500人，佔醫管局護士17%；醫生人數約為370人，佔醫管局醫生6%；專職醫療人數逾1000人，佔醫管局專職醫療13%。醫管局則表示共有超過5,100名員工缺勤。政府傍晚再宣布一系列防疫措施，惟仍未回應全面封關訴求，醫管局員工陣線今日繼續罷工行動。
另外，多個工會商討加入罷工。早前香港白領（行政及文職）同行工會、香港製藥及醫療儀器業職工總會，已表示響應醫護罷工，昨日港鐵新工會「港鐵新動力」、巴士業職工會聯盟亦表示，即將開會決定是否罷工；港龍空勤人員協會則於周六開會表決是否罷工，以爭取停飛內地航班。
觀塘聯合醫院的罷工街站設於附近球場，昨罷工醫護坐在看台上，分批到桌前簽到，目測以年輕者為多。在靈實醫院任職護士多年的曾女士及林女士結伴前來，憤然道出對政權的不滿。曾女士已任職護士30多年，快將退休；林女士今年45歲，也做了20多年，二人都是首次罷工。
「天災我去做冇問題，但你施政唔得，呢個係人禍。」曾女士比喻，現時情況就如水喉長開，政府卻只用筲箕載水，無法解決問題。她自從知道工會發動罷工後，很快就決定參加，「我覺得我而家唔出嚟，日後我會遺憾冇為自己和同事發聲。」今次是首次醫護界罷工，她也想出一分力，「工會不嬲好弱雞，一路以來都唔係咁多人為我哋發聲或諗到咁遠。呢半年都見到好多年青人受欺壓，用生命作賭注，佢哋好有夢想，想做啲嘢，我哋班老嘅出嚟，要墊底，我覺得係應該做嘅。」
曾女士說，也有同事不太理解，覺得參與罷工的人是扔下病人不顧，亦增加了其他同事的麻煩，覺得他們是「搞事份子」。也有些同事很想罷工，但始終包袱太大，最終還是作罷，「我有幾個同事喺入面（醫院）喊，話自己應承咗話罷工又唔嚟，但我明白每個人都有每個人要承擔嘅嘢，都體諒，唔會因為咁就分化咗，齊上齊落。」曾女士明白罷工要經歷許多掙扎，「尤其是後生。我覺得我都就嚟退休，你咪炒我囉，我覺得我應該企出嚟。」
在旁的林女士也不禁慨嘆：「我哋罷工唔係為咗自己，如果我真係要為自己、為前途，就唔會出嚟啦，個個都驚秋後算帳。如果你罷工，你一定唔使旨意有得升，甚至驚會畀人炒魷魚，咁點解仲要出嚟呢？仲要幾日喺度食西北風，排成個幾兩個鐘，為咩先？」她批評政府沒有堵截人流源頭、沒有解決根本問題，醫護罷工反被人說是「怕死」：「如果我係怕死嘅，我遞封辭職信得啦，我使鬼同你爭取咩。」
周一與工會談判的醫管局，會上並未有直接回應訴求，工會宣布談判破裂。曾女士直指醫管局行政總裁高拔陞無法代表前線醫護，「佢都唔夠膽講啲啱嘅說話，冇企出嚟為我哋講嘢。」在公立醫院工作多年，她對醫管局積下許多不滿，「表面做到好堂皇，其實我哋啲二三線醫院，每年預算係咁cut，又要慳嚟用，廁紙質素都黑忟忟。有時啲好嘅上層會自己掏錢，畀我哋買啲簡單用品。」
沒罷工的，也不等同不贊成罷工。做了護士逾5年的Ben（化名）未有參與，但他贊成罷工行動。他有加入醫管局員工陣線，亦認同以罷工手段，逼使政府作出行動保障港人，「啲人話罷工即係唔理而家啲病人，係有呢樣嘢，但到時爆得更犀利，都係死。」Ben屬於緊急服務員工，一直去到工會登記罷工的期限前，他都在掙扎，最後還是因為擔心影響病人，沒選擇罷工。他說，相信罷工的同事也有掙扎，但他還是很支持罷工的同事，「佢唔係為自己，又唔係罷咗唔使做，反而有機會被秋後算帳，成本更高。」至於未來會否罷工，他說還要看政府的反應再決定。
醫管局表示，持續的工業行動已嚴重影響公立醫院服務，甚至多項緊急及必須的醫療服務。截至昨日傍晚7時，共有超過5100名員工缺勤，包括約300名醫生、3100名護士及1000名專職醫療人員，受影響較嚴重的部門包括新生嬰兒深切治療部、急症科、產科及心導管實驗室服務。
醫管局總行政經理（聯網運作）張子峯表示，部分預約剖腹手術需要延期，有急症病房因人足手不足需要關閉，個別聯網的通波仔服務亦需要減少50%，呼籲醫護人員盡快返回工作崗位。
醫管局員工陣線昨早聯同成員、立法會及區議會議員前往政府總部請願，呼籲作為抗疫督導委員會主席的特首林鄭月娥與他們公開對話。林鄭傍晚公布自周六（8日）凌晨起，所有從內地抵港人士，無論是否香港居民，都要接受14日強制檢疫。工會對措施有效性存疑，尤其是強制檢疫的細節未公布，無法評估對本港醫療體系帶來多少負擔，指屆時香港或需處理上達萬計的隔離人士，周六前亦會出現「衝關」情況，質疑現時香港面對物資短缺的危機時，是否仍然有能力照顧大量要接受強制檢疫的人士，擔心香港有機會變成一個大型隔離營，醫療系統將百上加斤。工會再次重申全面封關的訴求。
