眾新聞 Logo
眾新聞 CitizenNews
眾說

清潔工:一日一個口罩,要慳D使 


【撰文:鄧永謙】
作者為新福事工協會關懷貧窮學校事工主任

有晚同老婆食完飯番屋企途中,喺公厠外見到兩個工友,一男一女喺度打牙骹,梗係二話不說同佢哋吹下啦。

照片來源:筆者Facebook

我:姐姐,你哋夠唔夠口罩呀?

女:唉梗係唔夠啦,我哋一日一個咋,你有冇呀?

男:(摸一摸口罩邊)冇呀,我帶咗兩日啦呢個,要慳啲使呀。

跟住我喺袋度攞咗兩包口罩俾佢哋,然後拍一拍我。

男:喂駛唔駛俾番錢你呀?

我好突然嚟唔切反應,可能而家一罩難求......

女:哥仔你真係好人,好人有好報呀,啲判頭俾多個都唔肯呀。我哋又買唔到口罩喎,都唔知點算。

我:除咗戴口罩,記得要洗手洗手洗手喎。

女:嘻我哋日日洗手仲洗唔夠,洗屎塔又洗,洗地又洗,都唔知洗幾多次。

我:其實你哋應該要有多個口罩替換啦,放工冇理由仲戴住。

男:我呢個呀都係反轉戴咋。(心諗掉轉戴冇用播,慘!然後勸佢唔好咁戴)

女:好啦,而家有你嗰啲起碼頂到幾日啦。

我個人覺得,工友係用最大嘅寛容去忍耐食環署對佢哋嘅忽視,你估佢哋唔知要保護自己?但係連本身工作嘅部門都唔願意去保護咁高危嘅工友,你話唔擔心就假。

啱啱收到林鄭記招話會每月定期派70萬個口罩俾清潔工(政府外判公司),同事話食環署、康文署加埋房署差不多成五萬清潔工,每人一日一個,一個月都要一百五十萬個……七十萬個口罩究竟會落喺邊啲人嘅手呢?會唔會又無端端喺條街見到有人交收CSI 口罩呢?希望資源真係俾到最前線。而我哋呢幾個月一定會聯同其他工會組織嚴密監察食環署有否待薄工友,本身已經薄,希望唔好繼續落去。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe