眾新聞 Logo
眾新聞 CitizenNews
眾聞

【情人節】咩都搶 唯獨唔搶花 旺角花墟生意跌八成 店主「未必捱到去四月」


武漢肺炎繼續肆虐,市民外出消費意欲大減,明日是情人節,市民還會向所愛送花表達愛意嗎?旺角花墟有花店店主透露,今年生意額比去年下跌近八成,「以往情人節前夕係做到踢晒腳,今年係拍烏蠅!」以往情人節前夕花束總坐地起價,今年則減價促銷送襯花也無生意,有店主直言「再咁樣攪落去,未必捱到去四月。」

 記者昨日到旺角花墟巡視,相比以往人來人往的花墟道,昨日人流稀少,只有少許市民仍戴上口罩前來選購鮮花給另一半。

情人節前夕的花墟道人煙稀少。   曾港深攝

花店店主黃先生表示,今年情人節花束銷情十分「慘淡」,去年情人節前一周,花店每日都要「返貨」補充貨源。今年眼見武漢肺炎疫情日益嚴重,黃先生已有先見之明大幅減少訂貨至去年一半,以免「蝕到攤攤腰」,豈料銷情比他想像更差,近兩日只售出7束鮮花,僅去年的兩三成,「戴住口罩,嗌場都冇人聽到啦。」

自新年後內地絕大部分鮮花市場均沒營業,令貨源緊張,花店只好從價格較貴亞洲其他地方及歐洲進口鮮花,「來貨又貴咗,生意又差咗,真係捱住做嫁咋。」加上香港氣候和暖,鮮花的保鮮期很短,不能大量囤積,賣不出的鮮花,亦只能報銷。

為了促銷鮮花,黃先生今年也推出不同優惠:以往提前訂購情人節花束有九折,今年進一步八折;送花服務減至半價;平常11支外國進口玫瑰售價約980元,昨只售680元,並加入大量襯花,但這些優惠仍難吸引顧客,黃先生的花店連日來門可羅雀,坦言「上年依啲時間,我邊有可能咁得閒同你係到慢慢傾呀,冇生意先咁得閒啫!以往情人節前夕係做到踢晒腳,今年係拍烏蠅!」

旺角花墟的花店,在今年情人節都有不同的優惠進行促銷。   曾港深攝


今年情人節銷情慘淡,對花店是重大打擊,過去七個月生意因反送中運動已銳跌五成,聖誕節及農曆新年也沒明顯反彈,不少同行商戶生意欠佳,又要面對昂貴租金,他聽說附近花墟有花店只能栽員減少支出。

「本身反送中嗰期,生意已經少咗至少一半。到個社會開始靜返少少,就搞壇武漢肺炎,啲人更加唔敢出街消費啦,情人節依啲都冇人有心機慶祝啦,基本上而家仲衰過反送中嗰期,起碼少咗八成生意。」黃先生對花店的前景頗悲觀,料往後幾個月將更差,「再咁樣攪落去,未必捱到去四月就要執笠!」。

 

武漢肺炎的爆發,令到市民向所愛送花的意欲大減。   曾港深攝

 黃先生理解疫情嚴峻市民多選擇留家,但他認為政府在武漢肺炎襲港處理非常差,才會導致現時港人心惶惶,又慨嘆「就係政府搞得差,先搞到香港而家口罩、消毒液搶,超市嘅嘢食同日用品又搶,咩都要搶,唯獨係唔搶花,唉!」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe