眾新聞 Logo
眾新聞 CitizenNews
眾說

港澳辦換人 今次真係咪開心住


繼上月中聯辦突然換主任,今次輪到港澳辦都突然換人。當然,大家都已經諗到,如果話王志民辦事不力要炒,咁張小明甚至林鄭都係遲早的事。但今次筆者就真係老土都要講句,咪開心住。

駱惠寧才走馬上任中聯辦主任一職。美聯社

上次駱惠寧上馬,筆者同好多評論員都即時指出佢的經歷同前幾任唔同,例如佢做過山西省委書記,本身級數比中聯辦主任高得多,仲有佢以往同港澳工作冇交集,可能係想搵個鎮得住場,亦唔會同本港權貴集團過從甚密的人來,確保更加緊貼執行習總意思。佢原本已經半退休,由省委書記轉咗做個人大閒位,亦可能顯示係臨危受命。 但駱惠寧上任後冇咩特別表現。現在睇嚟,可能係要等埋港澳辦都換人。

夏寶龍與習總關係更密切,被視為習總的親信。中央紀委監察部照片

相比駱惠寧,夏寶龍的背景又有些唔同。佢原本做緊的位係政協副主席,已經係國家領導人級數,依家來港澳辦,顯示中央有幾重視要搞掂香港。夏寶龍在習總仲做緊浙江省委書記時係做佢副手——副書記,同習總的關係更加密切,可以直通習總。佢後來做浙江省委書記時亦以強硬作風,特別係強拆教堂聞名。佢亦都係過往同港澳工作冇咩交集。睇嚟習總真係要換過晒港澳工作班子,搵佢信得過會老實執行佢旨意的人。

有人將換人同換路線掛勾,但呢個並非必然,換人未必換路線。當有問題出現,至少有三個可能原因。一係意外/不可抗力因素,如是則無需換人亦無需換路線;二係政策問題,咁其實可以唔換人,只需下令換政策;三係政策冇問題而係執行問題,咁就無需換政策只需換執行者。換個例子,換前線將軍,可能只係原先嗰個太廢,唔代表換策略或停戰。

一月換駱惠寧,原本應該只係針對香港反送中,但依家換埋夏寶龍,則有可能係因為更多內憂外患正接連而來,即武漢肺炎同美國擺明想趁你病攞你命,因此習總更加需要一個佢認為有能力同可信任的人幫佢睇實香港。 所以,夏寶龍本人固然係慣於強硬手腕,但最終都要睇埋習總意思, 會否因為內憂外患而向美國求和,對香港鬆手。呢個應該係大家要注意的。

至於幾時換林鄭,換共幹只需習總簽個名,但新特首除咗欽點,仲要經香港法律程序,由選舉產生。呢度有好多風險,例如民主派會否參選阻止自動當選,區議會百幾席選委入咗民主派袋令數票更難控制(按法例,補選特首時要同時檢視選委會是否有席位需要補選,所以民主派係應該可以就任嗰百幾席選委), 以及會再次挑起港人政治化情緒。好多人用老董當年做例子,但當年曾蔭權係高民望的,民主派冇依家咁反政府,好多市民亦未從政制甚至一國兩制角度睇件事。所以成個形勢唔同,換林鄭有多好多考慮。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe