眾新聞 Logo
眾新聞 CitizenNews
眾說

王毅笑住見德國外長


【撰文:阿水】

此一時,彼一時。世事往往就係咁,今日富貴,話唔定聽日就閉翳,所以祖宗教落「話到口中留半句」,無謂事事去盡,真係珍珠都冇咁真。

武漢肺炎肆虐,大批國家對中國旅客封關,連俄羅斯呢個攬頭攬頸的戰略伙伴,一日之內關閉同中國的幾千里邊界。疫潮臨頭,老友都要停一停往來。於是乎,中國幾乎等於被人斷絕關係。以前老毛年代慣晒鎖國,之不過如今世界各地互有往來,金銀財帛人員資源,若係封關一年半載,貨品內外不通,真係邊度都唔使去。

形勢比人強,連中國外交部都要擺低呢幾年日日開拖的「鬧交部」特質,搵返「中國人民老朋友」傾偈。所謂「相爭不如相見」,相見既歡,雞脾打人牙較軟,若然有日人家諗到封關,都會念舊啩。

中國外長王毅同德國外長馬斯會面握手,好好笑口。美聯社

近排中國外長王毅到德國開會,呢個慕尼黑安全會議大把各國高官參加,自然盡量安排會面,打好關係。話說新華社有一條稿「當地時間2月13日,國務委員兼外長王毅在柏林同德國外長馬斯舉行第五輪中德外交與安全戰略對話」,內容話「中德作為兩個有重要影響力的國家,應該加強戰略溝通,增進戰略互信,推進戰略合作,推動中德全方位戰略伙伴關係邁上新台階,更好攜手應對全球性挑戰」,重話「王毅感謝德方為支持中方抗擊新冠肺炎疫情提供道義和物質支持,詳細介紹了中方努力取得的最新進展,表示中方有信心、有能力、也有把握早日戰勝疫情」。

外電仲有一張王毅同馬斯握手相,好好笑口,睇嚟中德關係真係唔錯,新華社話,「德方願在已經捐贈一批醫療物資的基礎上繼續向中方提供支持和幫助」。

兩位外長四萬咁面口,中德關係肯定好好,肯定好過上年添。

黃之鋒去年9月在德國與外長馬斯見面合照。

上年反送中運動如火如荼之際,香港眾志黃之鋒9月去德國訪問,在一個場合同馬斯見面影相。兩人會面曝光後,中國大發雷霆,當時德國傳媒話,中國外長王毅出訪歐洲,但就取消原定在柏林同馬斯的戰略與安全對話。之前,王毅在聯合國大會開會期間,亦取消同馬斯的早餐會。

搵返當時新聞,黃之鋒會見馬斯之後講,佢感受到馬斯關心香港抗爭形勢,亦對港人爭取自由予以肯定。中國立即指德國「嚴重干涉內部事務」,召見德國駐華大使,威脅將有「嚴重後果」。果然,德國總理默克爾上年出訪中國時,本來會同北京討論德國車廠在美國生產的車輛,能否在進口中國時避免懲罰關稅,但係馬斯見咗黃之鋒後,呢樣討論就冇晒下文。

不過,諗唔到事隔不過幾個月,王毅外長同馬斯又見面嘞,仲傾得非常投契咁喎。所以話,世事真係難料,吓哇。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe