眾新聞 Logo
眾新聞 CitizenNews
眾聞

抗疫期間包房食飯唱歌 唔戴口罩唔用公筷握手影相 一哥:我唔知點做警察


武漢肺炎繼續肆虐之際,警務處處長鄧炳強及部分警隊高層與一班明星舉行晚宴,食飯又唱歌。鄧炳強席間更說:「其實我做警察係學成龍大哥、學方中信,全部都係學你哋,我唔知點做警察,睇吓睇吓就識做,唔知點解。」

同場包括警務處人事部遴選委員會總警司謝振中、公共關係科總警司郭嘉銓、公共關係科高級警司江永祥、曾用槍指嚇市民的「光頭警長」劉澤基、佔中時用警棍襲擊途人被判入獄3個月的退休警司朱經緯等。鄧炳強與朱經緯握手合照,謝振中亦搭膊頭與朱經緯合照。演藝人員方面,就有成龍、曾志偉、譚詠麟、張智霖、方中信、盧惠光、林國斌、梁競徽、曹永廉、歐陽震華、衛志豪,以及晨曦班主周文曦等。

多條片段今早在網上流傳,片中未有提及日期和地點,但見到酒樓環境內貼上「晨曦明星隊晚宴」字眼,亦有人叫「唔好錄」。蘋果新聞就報道指,警隊昨日與晨曦明星足球隊踢波,之後舉行晚宴聚首一堂。

片中鄧炳強說:「多謝晨曦和明星足球隊,今日跟我們踢波,還一起吃飯,多謝警隊兄弟好撐我。」台下譚詠麟即說:「香港靠你哋!」鄧炳強續稱:「今日好興奮,見到好多偶像,由成龍大哥開始、到Alan、到志偉、到Ben(林國斌),全部都係我偶像,我個心跳得好緊要,其實呢,點解我喺區議會講嘢咁叻,就係聽志偉嘅開心字典。」曾志偉笑著雙手合十,譚詠麟就說:「嘩!咁樣好危險!」

鄧炳強更說:「我做警察係學成龍大哥、學方中信,全部都係學你哋,我唔知點做警察,睇吓睇吓就識做,唔知點解。今日我其實真係好憎你(譚詠麟),因為我老婆鍾意你,仲多過鍾意我。」譚詠麟忍不住叫:「呢個咁大罪名!」鄧炳強其後捉著譚詠麟的手說:「冇辦法喇!因為我都鍾意你,今日真係好多謝咁多位踢波嘅朋友,同埋演藝界嘅朋友,其實大家係老友,全部在心中,唔使講嘢,只要你哋俾個手指公我哋,我哋赴湯蹈火,在所不辭。」全場又一齊舉起手指公。

鄧炳強說:「唔使講嘢,只要你哋俾個手指公我哋,我哋赴湯蹈火,在所不辭!」影片截圖
片段見到酒樓環境內貼上「晨曦明星隊晚宴」字眼,亦有人叫「唔好錄」!影片截圖

另一段影片見到成龍、曾志偉、譚詠麟與鄧炳強一齊唱《朋友》,成龍叫道:「喂!過嚟啦!我哋唱《朋友》呀!」又轉普通話說:「不管我們是哪一個階級,我們永遠都係朋友。」期間鄧炳強與成龍蹺手,與盧惠光搭膊頭。另一段影片亦見謝振中與譚詠麟對唱《再見亦是淚》。

片中見到,曾志偉在沒有用公筷下夾麵食,而身旁亦有人吐食物。片中大部分人都沒有戴口罩,但酒樓侍應就有戴口罩。政府多次呼籲,為預防新型冠狀病毒在社區傳播,必須同心抗疫,護己護人,減少社交接觸,包括盡量留在家中,避免到人多的地方,在可行的情況下,留在家中工作,亦要避免社交聚會,即使和別人見面亦不要握手,更要避免聚餐。其中本港有武漢肺炎確診個案,懷疑因為打邊爐和到酒樓聚餐而受感染。

鄧炳強與朱經緯握手合照,謝振中、江永祥亦與朱經緯合照。網上圖片
張智霖與朱經緯合照,身後有曹永廉、歐陽震華等人。網上圖片
梁競徽與朱經緯合照。網上圖片



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe