眾新聞 Logo
眾新聞 CitizenNews
眾聞

港台顧委會主席陳建強:我好鍾意睇吳志森曾志豪,但都十幾年,轉吓人係咪有啲新衝擊呢?


警務處處長鄧炳強去信香港電台(港台)投訴節目《頭條新聞》抹黑警隊抗疫工作、顛倒是非,由政府委任、負責向港台提供意見的港台顧問委員會(顧委會),隨後去信廣播處長梁家榮查詢事件。委員會主席陳建強去年已經在會議上表示關注《頭條新聞》的表達手法,以及一些負面意見會影響港台的公正形象。會議紀錄亦寫道,陳不希望港台播放民間記者會。

陳建強昨日接受眾新聞電話訪問,承認自己表達過上述意見,但針對民間記者會,他解釋是指不希望直播,會議紀錄不完整。對於《頭條新聞》,他再次重申委員會現時並非要論斷是對是錯,「委員會一致沒有覺得節目好定唔好,不過,當然咁講,有咁多人有咁多意見,係值得去回應嘅,特別係警務處長幫我哋做緊抗疫,係咪?」

他其後又主動表示:「其實我同你講,《頭條新聞》呢個節目呢,諷刺吓無乜所謂,最緊要兩邊都講,唔好剩係講一邊。同埋仲有樣嘢,唔好個結果係想專登抹黑未證實嘅嘢,咁就唔好啦。......我好鍾意睇吳志森同曾志豪架,但都成十幾年架喇喎,咁係咪都轉吓人呢?我唔係話佢唔好,咁轉吓人係咪有啲新嘅衝擊呢?」

訪問期間,陳建強多番強調自己想港台好,最後並說:「我自己好希望香港電台做到全中國最有公信力的媒體機構,呢個係我深切的期望。」

相關新聞:港台顧問委員會主席陳建強 去年提出不要播民間記者會 曾指關注《頭條新聞》表達方式

陳建強在2016年、梁振英做特首時,獲委任為顧委會主席,2018年再獲林鄭月娥委任。陳建強2015年成為中國和平統一促進會香港總會副會長、2016年起擔任香港團結基金顧問,他同時被指是「梁粉」,與前特首梁振英關係友好。

稱會議紀錄不完整 僅表示不希望直播民間記者會

陳建強說:「我記得當時點解我提出呢個意見,嗰個委員會嘅notes無寫晒全部。點解呢?當時民間記者會有啲戴咗個口罩、戴咗個面罩,我哋亦都無人知佢哋係邊個啦啱唔啱啊,當陣時係直播節目。如果有任何直播節目違咗規,香港電台因為播呢,要負責。」他續指,如果記者會上有人說了誹謗性或者不實的說話,港台無法稽查說話的是誰,「即係無人負責任,咁咪變咗港台要負責。咁嘅原因之下,我哋建議廣播處長考慮,呢種節目係咪應該唔好直播呢?」

他又說:「希望你明白我哋嘅出發點,我哋唔係針對任何人,只係個事實,我哋希望保護港台,因為太多人話港台唔好喇。」

《頭條新聞》有人讚亦好多人彈 專登抹黑就唔好啦

陳建強先是指《頭條新聞》歷史悠久,是港台標誌性的節目,「我哋當然希望一個咁長歷史嘅節目可以得到好多人支持、好嘅口碑,但係長期嘅收視率同口碑,可以話係相當引起好多爭論嘅。」

他表示,明白亦同意在電台裡面有諷刺性節目,但經常提醒管理層要公正、持平、客觀,「好多我聽返嚟嘅人同我哋講呢,覺得港台嘅節目剩係偏向一面,俾人感覺反政府。我覺得唔需要被人咁講,點解你唔方方面面嘅人都講,有啲都好好笑架,點解剩係講政府,唔講第二啲方面呢?」他又指希望港台避免做爭議性的事,「因為港台個公正、公信力,來得不易,咁多年我哋係好辛苦去捍衛港台。」

王喜主演《頭條新聞》環節「驚方訊息」,首集播出即遭警務處鄧炳強投訴。香港電台網站照片

陳建強又認為委員會所做的是「natural justice」(自然公正),「即係話一定好公平、公正,就算任何委員任何意見,在今天,委員會一致沒有覺得節目好定唔好,不過,當然咁講,有咁多人有咁多意見,係值得去回應嘅,特別係警務處長幫我哋做緊抗疫,係咪?」

訪問後段,陳建強主動再提到《頭條新聞》:「其實我同你講,《頭條新聞》呢個節目呢,諷刺吓無乜所謂,最緊要兩邊都講,唔好剩係講一邊。同埋仲有樣嘢,唔好個結果係想專登抹黑未證實嘅嘢,咁就唔好啦.......我好鍾意睇吳志森同曾志豪架,但都成十幾年架喇喎,咁係咪都轉吓人呢?我唔係話佢唔好,咁轉吓人係咪有啲新嘅衝擊呢?」

抗疫大件事 顧委會應該要回應

陳建強說:「警務處同香港電台都係大嘅政府部門,政府部門同部門中間一般應該係合作愉快、互相支持,寫封信去投訴另一個處長,其實你唔覺得好大件事咩?好嚴重事件喎。」

「我哋作為顧問委員會,一定第一時間話俾佢(警務處)聽,你放心,我哋會幫手架喇,一定會問清楚邊邊啱、邊邊唔啱。呢一刻,我仲未收到廣播處長俾我嘅意見,但你話係咪應該要問呢?係應該問,(因為)咁多人去話。因為廣播處長話到我哋(警方)唔係抗疫喎,咁抗疫對香港市民好大件事喎。」

「我問吓你,如果今天好多人被人誤導咗,警察唔係幫手抗疫,當~呢個係事實,如果個警察叫你先生唔好行呢邊,嗰邊有疫情。嘩,我唔信,行去嗰邊。萬一嗰啲朋友有咩疫症中咗,咁點算呢,我只係俾個例子你。如果唔係咁大個疫症,我哋係唔會出來講嘅。」

港台公信力排名高 陳:點解剩係俾一邊人讚呢?

中大傳播與民意調查中心進行的傳媒公信力評分調查,港台名列前茅,2019年調查結果顯示電視台之中排名第二、2016年排名第一。陳建強回應指任何機構都有進步空間,他亦有讚港台,反問:「點解唔俾全香港讚呢,點解剩係俾一邊人讚、一邊人唔讚呢,咁係咪可能有偏頗、大家睇漏咗?我提出疑問。」

陳建強續指:「我記得有幾次在我哋嘅會裡面,港台同事話俾我哋聽,有啲調查報告、有好多報告裡面,幾間電視台係無參與嘅,所以亦未必代表晒所有電視台。我亦都唔可以話港台嘅ranking唔高,我留意到呢點咁解啫。嗰啲報告係咪一定最中肯呢,亦都睇埋邊個報告,因為我唔知道你講邊個。(記者補充:中大的,剛才引述的數字都是中大的)好好,唔緊要,不過我都想講,有啲欣賞指數,有啲嘢,我知有幾個電視台係無參與嘅,我提一提呢件事俾你聽啫。」

「係咪佢已經(ranking)咁高我仲要話佢呢?不如我同你咁樣講,警隊曾幾何時全港排第一,而家咪一樣被批評,一樣咋嘛,可以有上有落。」

前特首、現任全國政協副主席梁振英,近日在Facebook連番貼文狙擊港台。眾新聞製圖

梁振英FB籲「政府炒、警方告」 「梁粉」陳建強怎樣說?

前特首梁振英連日在Facebook貼文,指梁家榮失職應炒、警方應帶頭告港台誹謗。被指是「梁粉」的陳建強說:「梁振英先生係我認識十幾廿年嘅一位好朋友,佢在專業界,大家一齊做嘢。佢做特首嘅時候,佢嘅施政理念我係好認同嘅,所以啲人就話我係『梁粉』,如果你係話我認同佢起多啲房屋、幫多啲弱勢社群嗰啲方面,我絕對係承認支持佢嘅施政理念。近呢半年、一年,除咗在公開場合撞到打吓招呼之外,我哋都未有坐低傾過有關香港電台嘅事。咁希望答到你嘅問題。」

記者再問陳建強對梁振英的言論有何回應,陳答:「我諗要攞咗梁家榮處長俾我哋嘅回應,之後先可以回應(梁振英)對梁處長嘅睇法。但係另一樣嘢要講啦,梁生嘅睇法亦都係好多人有相同睇法,社會係有人咁睇法。我而家作為顧問委員會主席嘅身份,我講任何嘢都會影響人哋對顧問委員會嘅睇法。我個人嘅睇法,都唔應該講出來。」「梁生係我好尊重嘅一位前特首,佢嘅意見我係聽到嘅。」

最後,陳建強表示:「公正持平做一個成功的公共廣播機構,係我同埋所有好多香港人的願望,我自己好希望香港電台做到全中國最有公信力的媒體機構,呢個係我深切的期望。」

港台機構傳訊及節目標準組總監伍曼儀。香港電台網站照片

港台機構傳訊及節目標準組總監伍曼儀回覆眾新聞查詢,指《頭條新聞》的內容建基於資料,絕非無中生有,亦沒有抹黑。她指,近來收到的回饋破紀錄的多,不過幾天,已經收到兩萬則以上的意見,大部分都是讚港台,伍曼儀表示非常珍惜、好多謝觀眾。

伍曼儀又建議,看《頭條新聞》不要只看一集或者幾分鐘,節目取材自那一段時間的社會熱門議題,不是針對政府,民主黨何俊仁都曾經是節目題材,澄清「唔係挖苦某一邊」。陳建強稱有幾間電視台沒有參與「欣賞指數」評分,伍曼儀反駁,表示Viu TV、有線電視/奇妙電視等都有參與。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe