眾新聞 Logo
眾新聞 CitizenNews
眾聞

《頭條新聞》換人? 吳志森:艱難時期想企硬 曾志豪:歡迎陳建強加入


 

港台節目《頭條新聞》由演員王喜主演的環節「驚方訊息」,首集播出後即遭警務處處長鄧炳強投訴,事件引起社會關注。昨晚播出的一集《頭條新聞》,繼續一貫風格,諷刺警隊高層與藝人的「明星飯局」,以及警察學院拍片為武漢打氣等。

香港電台顧問委員會主席陳建強,前日接受眾新聞訪問時稱:「我好鍾意睇吳志森同曾志豪架,但都成十幾年架喇喎,咁係咪都轉吓人呢?我唔係話佢唔好,咁轉吓人係咪有啲新嘅衝擊呢?」《頭條新聞》主持人吳志森和曾志豪,昨回應眾新聞查詢時均表示,製作組沒有收到要換人或要減少批評政府的訊息。

吳志森說,如要換主持人的話,需要有一個令人信服的理由,加上新推出的角色如「包豪星」和「有為」,感覺觀眾似乎受落,反問「係咪要為換而換呢?」他又指:「喺艱難時期,我就想企硬啲。」

曾志豪則表示,周五收到4、5封由觀眾寄出的支持信件,是過去幾年以來首次收到郵寄信件,他說:「陳生又好,邊個都好,我諗都不能否認,呢段日子裡面最觸動到市民的感情,似乎都係來自政府。」

相關新聞:港台顧問委員會主席陳建強 去年提出不要播民間記者會 曾指關注《頭條新聞》表達方式

港台顧委會主席陳建強:我好鍾意睇吳志森曾志豪,但都十幾年,轉吓人係咪有啲新衝擊呢?

周五晚播出新一集《頭條新聞》沒有出現王喜主演的「驚方訊息」,吳志森解釋,由於王喜是特別嘉賓,他與羅啟新(Cuson)主持的環節會梅花間竹出現,「原先安排就係咁架啦,大家唔好誤會」、「因為無咁多時間嘛,所以今次係咁安排,以前都係咁。」他說,下周如無意外,會有第二集「驚方訊息」。

提到香港電台顧問委員會主席陳建強,吳志森和曾志豪都表示不認識他,也沒有機會見面。被問到陳建強詢問是否有需要「換人」的說法,兩人均表示,沒有收到相關訊息。吳志森說:「無無無,黃華麒(前廣播處處長2008至2011年)個年代就有,而家未聽過,up to now啦、你知啦話唔埋,突然間武漢肺炎出來我哋都控制唔到。」

吳志森認為,如果角色一出場,令觀眾有感「悶、噓到爆」,或者有一個足以令人信服的理由,便需要換人,「一個角色唔可以永遠做,要考慮換人定唔換人之前,係咪都要有個理由:哦,都做咗好耐,都要換下囉;還是考慮下角色係咪受歡迎、都稱職啦,喺觀眾心目中都受落啦;亦都要睇下個hit rate、收視率覺得點啦。」

吳志森又說,《頭條新聞》今季新推出的角色如「包豪星」(曾志豪飾演,模仿周星馳在《九品芝麻官》角色)和「有為」(吳志森飾演,模仿吳孟達在《九品芝麻官》角色),感覺觀眾似乎受落。吳反問:「係咪要為換而換呢?」他補充指,自己做了十幾年,已屆花甲之年,並不介意退下幕前,「我自己就咁嘅,喺艱難時期,我就想企硬啲;太平盛世呢,無咩事我就想走、想退休,但艱難時期,你想我走,我唔走住。」

曾志豪回應時調侃道:「我都好歡迎啊,其實佢(陳建強)都幾有幽默感,如果陳生有興趣,我都歡迎佢加入做主持。」曾志豪說,上星期首集遭鄧炳強投訴後,製作組隨即收到大量支持的意見,包括郵寄信件,是過去幾年來首次收到,「今日一開會都有4、5封,一打開都係希望我哋繼續努力,仲有人外賣送咗幾杯台式飲品俾我哋。」

對於陳建強說「點解你唔方方面面嘅人都講,有啲都好好笑架,點解剩係講政府,唔講第二啲方面呢。」曾志豪回應:「我作為創作人,一定係寫嗰個禮拜、嗰個時刻成個香港社會最有感覺,最觸動到大家的題材。陳生又好,邊個都好,我諗都不能否認,呢段日子裡面最觸動到市民的感情,似乎都係來自政府,佢搞出來的笑話,可能連建制派朋友都會覺得好笑。」

曾志豪說,希望觀眾多些互動以及反映對節目的肯定,會成為《頭條新聞》的推動力,「我哋最驚就係,喂,今日發生咗1、2、3單,你哋點解唔提,係咪漏咗啊?如果市民最關心唔係呢個題目,你又捉唔到,咁慘啦我哋就脫節啦。」

昨晚播出新一集的《頭條新聞》,繼續嬉笑怒罵諷刺時弊,當中包括近日熱議的話題。其中一節是由吳志森飾演「大帥」以及曾志豪飾演「包豪星」,諷刺警隊高層與一眾藝人的「明星飯局」,違反政府抗疫指引,更聯繫到首宗警員確診個案,包豪星在節目中道:「政府都呼籲公眾要戴口罩,大帥你哋無喎」、「既然無口罩,做咩仲要咁近距離同檯食飯呢?今日近距離,聽日咪要隔離囉。」之後包豪星更提到元朗7.21事件,「你哋起碼會遲成40分鐘,啊,唔係,39分鐘先趕到現場。」

另一環節由吳志森飾演「太后」以及曾志豪飾演「徐副官」,一開始的對白諷刺警隊近日在警察學院拍片為武漢打氣,「你唔講『在香港』,人哋以為你上咗天朝支援,你到時係咪會上去先?」另外,羅啟新主演的新節目名為《擔心字典》;鄧炳強早前在明星飯局上,提及他在區議會對答流利,是因為看過曾志偉在亞視年代的節目《開心字典》。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe