眾新聞 Logo
眾新聞 CitizenNews
眾說

「呢個正苦...越期望就越失望...」


政府外判清潔工一天獲派一個CSI口罩。照片由筆者提供

【撰文:鄧永謙】
作者為新福事工協會關懷貧窮學校事工主任

或者呢排新聞係聽得多,人傳人又係不停口動轉,面書post 又不停「些牙」資訊,大家都好知道外判清潔工友只得一人一個口罩,跟住就冇下文,之後林鄭出嚟解話,又話有口罩會派俾佢地諗住件事可以平息,但係我哋一班落去接觸工友嘅人好想講,工友需要嘅吾單止係多一個口罩,而係有其他同樣重要嘅訴求。今日去咗上水搵左工友吹水,不如我哋聽吓啲第一身嘅工友直接表述:

我:咪即係鄧永囂囉!
工友A:A
工友B:B
工友C:C

我:哇!呢個位啱曬太陽喎(陽光啱啱直射落工友嘅身上)
A:係呀,今日認真好天呀,好舒服呀呢啲天氣。
我:係呢,你哋夠唔夠口罩呀?
C:咪呢個囉!(指住自己戴嗰個)一日派一個呀嘛!
B:做咩呀?你有口罩咩?派俾我哋呀係唔係呀?我見有啲區有得派喎?
我:係呀,我哋都係周圍R 你哋傾偈睇吓你哋夠唔夠口罩呀,我成袋都係罩,就係諗住派俾你哋架,一人一包咁囉!成袋都係。
C:哇,哥仔,你好危險呀!你話俾我哋聽好啦,唔好俾啲阿伯聽到呀,轉頭扑你個頭搶你個袋呀!(講笑mode)
我:係架!我冒住生命危險帶俾你哋架,嗚嗚..(扮萌)(跟住靜靜雞攞咗三包口罩出嚟送俾佢哋)

A:多謝你呀,好嘢有口罩派,你知唔知呀,公司得一個唔夠呀,我哋做嘢嗰陣會掂好多漂白水,又要換幾次水過,你試吓諗吓,你話夠唔夠呀?邊到夠呀,轉頭濕咗就要換啦,而家冇架濕咗照帶囉,佢都唔俾!(好似當我係腦細咁訴苦)
我:知呀,我去過其他區工友都同你哋一樣有咁嘅需要,覺得一個口罩係吾夠,咁你哋覺得應該幾多個一日先至足夠呢?
A,B,C:兩個啦(異口同聲地),起碼兩個(唔齊節奏咁表達),最基本呀。
C:(理直氣壯咁)我地唔係貪呀,呢個係一個基本嘅要求呀,一日兩個都俾唔到?
我:呀!唔知大家知唔知之前政府話有一大批口罩俾你哋工友呀?你哋收唔收到呀?好似呢幾日已經派咗落嚟喎?

B:呢!呢個咪CSI (指住自己帶緊嗰個),今日咪派呢隻俾我哋囉!不過都係一人一個之嘛。
A:好似我今日去洗厠所,我都要驚住俾啲厠所水彈倒個口罩,仲有係,我哋會出汗架嘛,流汗係會整濕個口罩架嘛,濕咗就唔用得架啦,但係可以點啫,又冇多個替換。
我:明呀,所以而家政府話會派罩俾你地,我哋就更加日日要去唔同區睇住睇吓佢哋有冇待薄你哋,收集證據然後話番俾佢哋知呀。
B:好呀快啲同我哋表達呀!你知唔知呀,我老公之前鬧鬼我呀,話我去排150 蚊嗰啲口罩呀!咁冇計呀,成家人喺到爭,個個都話唔夠口罩,唔通唔排咩,唔排就冇啦,唉,好慘呀做我哋呢啲小市民。呢個政府又唔幫我哋,又搵唔到口罩,你話點算呀?

一日只獲派一個口罩,工友唯有在口罩內加多塊紙巾吸吓汗,延長人使用時間。照片由筆者提供

我:嗯,呢個又係另一個香港人面對嘅問題嚟嘅,而家真係好困難,特別基層負擔唔起咁貴價值嘅口罩呀。
A:咪係,你政府呢啲時候都唔幫市民仲等幾時呀,之前就話人哋唔聽你話你就要話啲細路啫,而家成個香港有事,佢都唔做啲嘢。
C:最衰係佢唔肯封關呀,不停帶啲大陸人落嚟,唔中肺炎都變中啦,你睇吓而家有邊區冇毒架?我哋呢行仲要成日對住啲垃圾細菌呀,你話死唔死呀!
我:係呀而家真係好似等攬炒咁呀,慘!

A:係呀哥仔,你真係同我地反映吓啦,我哋連去排隊攞口罩都冇時間,出面買又咁貴,公司俾多個口罩都好啲呀。
C:其實如果我哋中咗肺炎,咁會點架,咪冇得番工要隔離,會唔會炒咗我哋架?
我:呢層問得好,暫時嚟講,武漢肺炎未納入僱傭條例裡面嘅職業病,所以若果中咗都未必有任何勞工法例嘅保障,而且隔離之後都同樣保障唔到你哋會繼續有得做,已經有團體幫你哋問政府,希望快啲有好消息。

A:喂夠鐘啦,番去開工啦,多謝你啲口罩呀哥仔!
我:我哋遲啲會再過嚟探你哋呀,到時再俾啲口罩你哋呀!希望到時會有好消息,一日有兩個口罩!有勞工法例保障你哋!
B:希望有啦哈哈,不過我哋都冇乜期望啦哈哈,呢個政府就真係越期望就越失望啦哈哈,byebye!

其實,你會睇到,工友都會有佢哋嘅訴求,問題係掌權者願唔願意俯就卑微,去聆聽工友嘅心聲?又或聽咗之後,願意真誠去回應一下佢哋嘅擔憂?

真係...呢個正苦,只係為市民帶嚟越期望就越失望嘅絕望期盼....

~~~~~~~~

我吔強烈要求特區政府適當回應以下為基層處境紓困的訴求:

1)設立失業救濟金提供基層勞動群體,每月提供基本生活津貼,與綜援申請分開。
2)外判商需要為清潔工友負起基本防疫裝備的責任,由政府補貼資助購買防疫設備。
3)進入隔離營地或住所的清潔工友必須獲提供保護衣。
4)盡快將新型肺炎定於僱員補償條例附表2中的職業病之一,保障所有因可能接觸肺炎患者或感染高風險可能性的工種。
5)於職安健條例中盡快訂立勞工防疫指引,訂立僱主必須為僱員提供足夠的防疫裝備於勞法中,違者需要罰款。
6)要在工作場所提供防疫知識教育,如垃圾房,屋苑管理處等等。
7)招募大量義工到獨居長者和院舍進行防疫教育。
8)拍攝有關基層工作處境的防疫須知影片,於不同媒體中播出。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe