眾新聞 Logo
眾新聞 CitizenNews
眾說

林鄭的大本營發表



早兩日在fb page上講起,日本網民開始恥笑安倍政府對疫情的回應是「大本營發表」。大本營,是戰前日軍總司令部的通稱,「大本營發表」就是戰前日軍向傳媒和國民發布的誇張化的前線戰報,現在借代指政府講大話、propaganda。

維基條目上有例子,1944年10月的台灣空戰,實際戰果是「重巡洋艦1隻大破、輕巡洋艦1隻大破、航空母艦1隻小破」(大小破即大小損傷,未沉)。

大本營發表卻是「轟撃沉=航空母艦11隻、戰艦2隻、巡洋艦3隻、巡洋艦或驅逐艦1隻。撃破=航空母艦8隻、戰艦2隻、巡洋艦4隻、巡洋艦或驅逐艦1隻、艦種不詳13隻」。

照片來源:日文版維基百科

笑完安倍,睇返中港,何嘗不是大本營發表,不斷講大話?不過我覺得香港又勝一籌,皆因最近傳出林鄭向中央交報告,聲言防疫做得好,獻世派可望9月立選大勝喎。嘩,佢真係完全活在自己世界㗎喎,根本全港不分左中右黃藍白黑民主獻世派都知佢防疫廢到無輪,可以搞到香港人變晒難民咁周街搶嘢,佢都仲好意思話做得好。

仲有,佢份報告唔只鬧反對派,獻世派都鬧埋,鬧佢地冇鬼用幫唔到手。總之所有問題都係其他人的問題,千錯萬錯唔會係佢錯。一個人要幾痴線先可以咁樣?都話佢講過N次咩謙卑、學習係廢話㗎啦。然後最惡毒都係,香港人危急存亡之時,佢仲係掛住自己權位、玩政治、打小報告。令我諗起當年大躍進餓死人,有個共官仲話「中國這麼大,哪朝哪代沒有人餓死!」

不過佢癲係一件事,係咪佢真係比習總炒咗就天下大吉呢,咁就梗係唔係啦,一日係依個K型政制,一日依班垃圾獻世派係度,香港都唔慌有運行。所以眼前先顧好抗疫,亦唔好忘記抗爭。來日方長,後會有期。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe