眾新聞 Logo
眾新聞 CitizenNews
眾說

睇數據:勞工界真係有機?


今日咁多新聞,我出依個題目好似唔太夾,但既然查咗就照寫啦。是咁的,最近咁多人話要選勞工界立法會同選委會,不過好似唔多人真係對住數據分析過形勢,所以我就試吓去搵啦,跟住發覺,可能真係有機喎?

睇表。現時勞工界登記選民,全部團體票,有672票,而工聯會轄下有253個會,即係工聯會只佔全界別37%!咁點解工聯會成日霸到嚟做呢?因為佢同另一個親政府總工會勞聯合作,勞聯有115個會,然後勞工界選舉都用全票制,佢地就霸晒啲位了。

不過件事唔係冇轉機,因為佢哋選舉時會走票!以2016年選委會選舉為例,全界別最高票當選的工聯會會長林淑儀,得322票,即係走咗幾十票,而最低票當選,冇申報但估計都係工聯會or勞聯人士,只得229票,即係走咗過百票!睇返其實拎到250票以上已經穩陣當選,可以擊敗最低票的工聯會or勞聯參選人,不過要全數贏晒都係要超過300票。

現時職工盟有93個會,好似爭好遠啫,但要留意仲有成200個獨立工會,如果佢哋大半係支持民主派,同親中派的距離會即刻拉近晒,而由上次選委會結果睇到,呢啲獨立工會的確冇咩人有投到親中派,所以唔係冇機。當然理論上拉攏勞聯都係一個方法,咁就即刻贏到工聯會添,不過應該都係成立新工會仲易做。

首先要提提大家一樣,登記勞工界,兩大條件一係符合法例的工會定義,二係要運作超過12個月,所以新成立的工會係趕唔切立法會的,選委會就仲有機。但我諗如果真係有心搶攻,職工盟都可以考慮派一個人參選立法會試吓水溫。

跟住,成立工會,其實係決心問題比較多,因為全港300萬打工仔,三大總工會的會員都係得66萬,大把人未加入工會。而且工會唔一定要人多,勞聯整體會員人數少過職工盟,工會數卻更多,仲有望吓民國派,現在已經夕陽的工團,唔夠一萬會員卻有27個工會,所以開好多個少人數的工會係可能的。當然問題係親中派都可以咁做,而事實上佢地已經咁做緊。下圖係工聯會網站列出的工會名單(節錄),可以睇到郵政又幾個工會,醫護又幾個工會,同埋差唔多每個政府部門又一個會,分拆上市佢地好在行。

所以民主派都可以考慮咁樣分拆上市,先由啲專業界別入手,例如教育界、醫護界、會計界都幾萬人,真係拆幾百個會出黎都得啦。唔講咁誇張住,18區每區一個教協, 諗唔諗得過先?仲有好多專業界別傘後組織,咪改個牌頭叫自己工會囉。

有人又話,咁樣會唔會本末倒置,唔係認真搞工會?但改一改角度,如果立法會有多啲聽民意的議員,唔係比班站在工人對面的垃圾霸晒,最終仲達成普選,係咪都會對整體工會運動有幫助?同埋冇話分拆嘅工會就一定唔認真格,係牌頭轉咗,一樣可以協調行動,團結成力量,係咪?

簡易組齊7人開工會─七起:https://7up.hkpetitions.com/


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe