眾新聞 Logo
眾新聞 CitizenNews
眾說

台灣有唐鳳,香港有個…楊偉雄?


【撰文:藺我行】
作者自我簡介:中產收入,基層口味,不平則鳴,寸爆不平事。

 

做官,有兩種。一種你記得佢,一種你唔記得佢。第一種,亦有分三類:你記得佢德政、你記得佢劣跡、同埋你記得佢柒野。
 
楊偉雄,絕對係第三類。

創新及科技局局長楊偉雄上門派口罩給老人家,這是特區政府新聞處的宣傳照片。

撫心自問,當提到楊偉雄三個字,你記得咩?創新及科技局局長?你算好叻。我問過唔少身邊朋友,有人以為係教育局長,但嗰個其實係楊潤雄,言論都幾「紅」下;更多人記得佢個金句「我見過Steve Jobs!我真係見過!」除此之外,無一個政績係見得吓人。
 
環顧成個創科界,都係二、三十歲左右的人雄霸江湖,楊偉雄六十有五,仲坐呢個位,你自己唔尷尬納稅人都面紅啦?你可能話我年齡歧視,咁退一萬步,武漢肺炎肆虐,本來有危即係有機,大好機會比佢展現吓自己能力,平反吓咁,但呢個楊老伯,究竟係到做乜?首先係海外買入電子手環,設計奇膠,比人笑到面懵;然後走去寬減科學園同埋數碼港租金,把鬼咩?邊忽科技?又邊忽創新呢?邊忽解決到問題呀?
 
但係咪做官就一定咁廢,一定無得創新呢?當然唔係。
 
太遠唔講,放眼台灣,人哋有個唐鳳。十三歲開始自學,十六歲創業,做咗頂尖駭客,三十幾歲宣布退休,係Apple做顧問,而家係行政院政務委員。最近武漢肺炎呢單野,佢除咗製作鑽石公主號乘客行動路線圖釋除公眾疑竇,亦都開發「口罩供需資訊平台」,快、狠、準咁解決市民問題,日本網民同媒體叫佢「38歲IQ180的台灣天才大臣」,完全唔誇張。

再再再退一萬步,唔講政績,齋講present,好冇?唐鳳講嘢,真係令人想聽落去,因為內容多數好有趣,觀眾有嘢袋到落袋,聽完你會覺得學到嘢、有反思。佢之前係訪問入面提及「番茄鐘工作法」,稍微研究過吓工作效率法,都一定有聽過,係網絡上引起唔少「效率控」討論,咁先過癮。佢亦都以自己學習經歷,提出對台灣教育制度反思,唔少point都值得延續同討論。至於香港個楊偉雄?你可以專心聽佢講嘢多過十秒我話你叻,至於有冇嘢學?有,反面教材,佢絕對勝任。
 
一個見過Steve Jobs,一個係Steve Jobs間公司做顧問;一個驚死人唔知咁周圍講,仲懶係自豪咁,一個穩陣踏實咁以自己知識同技術去解決問題……
 
人與人個分別,香港同台灣個分野,就係呢到囉。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe