物理治療師Sik Hon 農曆年廿七到東京旅遊，看著內地旅客狂掃口罩，心裏暗覺得奇怪。到他初三返港，已經全城搶口罩。三日後，他跟4位朋友商量並落實合資近千萬元，在香港成立口罩生產線，取名「一合口罩」，沒申政府資助。
被問到生產口罩是否為參選或另有所圖，他回答：「我哋對參政、對權力毫無興趣，純粹因為大家都愛香港。我香港出世、香港長大，過去5、6年不時出外公幹，每次返香港，都覺得無論去到邊，都搵唔到好似香港咁方便、咁有氣氛，亦唔會有人好似香港人咁愛香港。」他畢業於香港理工大學，所經營的物理治療中心有兩邊落地玻璃，一邊與獅子山遙遙對望，另一邊面向理工大學。
發揮港人高效精神
自從武漢肺炎農曆年前在內地爆發，香港人便開始天天為口罩奔波。「我初三返嚟都買唔到口罩， 發現有啲問題。我自己經營物理治療診所，知道好多行家都無口罩，平時又唔會儲起，要即刻喺外國訂，由開頭1蚊港幣一個，到差唔多1蚊美金一個，買到自己都覺得好貴，而且唔係長遠辦法，自己做開創業，就開始諗有無可能喺本地設生產綫。」
Sik Hon 由始至終都強調，成立香港口罩生產線是商業行為。「要解決大型社會問題，最直接嘅方法係用初創。如果大家有留意，近20年重大的事都係由 Google、Facebook、Telegram、WhatsApp 解決，佢哋有邊間唔係私人公司，香港人最強嘅能力並唔係同政府議價，而係commercialisation （商業化），令佢 （概念） 好容易同好快咁執行。」他和4位分別從事財務、國際貿易和投資的朋友，提出成立口罩生產線的想法，一拍即合，並取名「一合口罩」。
Sik Hon 在一合口罩的Facebook提到：「老實說，籌建『一合口罩』的初心，並非因為甚麼『香港之光』；啟發我的，其實是由衷的無力感和恐懼，因為這是一場埋身肉搏戰，我們都是赤裸上陣，對抗四方八面的襲擊。」
「『兩盒一合口罩，thx。』這樣理解也可以，我們不想故作深奧，『一合口罩』的確是直接落地，我們很滿意。在構思的時侯，我一直在問自己，為甚麼要建立口罩生產線？維護香港民康，確保本地供應，是基本要求吧。在更深一層的期望，我確實希望抗疫重光之後，香港會再次團結起來，真正的除口罩相見。
《一》 元元本本。數始於一。《合》 保合太和，知行合一。這是起始，是元本，是太和，是合一。香港，最後也會再次團結起來。
而《楊修之死》中「一合酥」的經典故事，更告警我們不要鋒芒畢露、恃才傲物。」
2月7日，Sik Hon 在個人 Facebook 出了帖文，跟朋友圈提出這個想法：「問有無人識這技術，希望可以幫到件事。」結果，他收到近2,000個回覆：「有人話有技術、有人搵到原材料、有人可以做 consultant。我當係feasibility study，因為我想做，但實際係咪可以做呢？收集這2,000個意見後，我逐個回覆，股東睇完覺得可以做，就直接去。」他毫不含糊地說：「我哋理念真係希望大家健康一人一口罩，但呢個亦真係生意嚟嘅。」
雖然2,000個留言中，不乏表示願意捐款，但Sik Hon和股東決定自掏腰包，不採納眾籌或捐款，以至義工。「今次口罩事件，唔只 physical （搶口罩），仲有emotional （救人自救），好多團體好有心，但口罩唔係短期問題，可能有人捐筆錢，但佢唔會成日捐錢，咁係解決唔到長遠嘅問題。我哋要理性去諗，變成 sustainable business （可持續生意）。」
全球採購 靈活走位
落實方案後，Sik Hon 和4位股東著手找廠房、機器及原材料。「香港無咗工業好耐，好多廠廈唔再做生產，轉做倉做寫字樓，搵地方都搵咗一段時間。 」廠房最終選址觀塘，並按ISO 13485標準改建，無塵室 （clean room）則達至ISO 7至8級標準；機器預計3月底運到無塵室。「機器於印度同內地訂，最後要睇 availability，因為有出口限制，所以單就機器都要喺唔同地方 source，本身有朋友做緊 （口罩生產），知道點樣分散風險。」他表示，有別於近月成立的本地口罩廠，個別只有一或兩條生產線：「我哋諗住開5至6條生產線，full production capacity （每月最高產量） 接近800萬至1,000萬個，而初期產量係250萬至400萬個。」
Sik Hon 亦提到，口罩原材料從世界各地搜購，包括日本、北歐、德國、美國、英國、印度、内地：「最遠至希臘，原材料已到港，完成clean room後，先至擺原材料入去，否則會好快污染，第時生產出嚟可能有細菌。」雖然有指口罩原材料主要來自內地，但他解釋：「大部分（原材料） 來自中東，因為係石油副產品，內地是中間那層不織布 （高密度濾菌熔噴不織布） 的最大生產商，產量佔全球七、八成，但我哋都有向歐洲、日本廠商採購。」
萬事俱備，一合口罩於3月3日預售，全數6萬盒口罩 （約150萬至180萬個）在7分鐘內售罄。該批口罩定價68元 （一盒30個），按 ASTM Level 1 （BFE / PFE 大於 95%）標準製造（已委托公證行，將把樣品口罩送到美國 Nelson Lab 進行測試），平均每個約2.27元，較武漢肺炎爆發前平均每個1元貴一倍以上，「我哋唔係為短炒圖利，如果係，應該即刻去炒口罩；講到Made in Hong Kong 就唔會平，希望香港人明白。」Sik Hon 坦言，4位股東原本無意做預售，「好處係可估算生產量，睇吓市場反應，而家6萬盒只佔總產能三成，有需要可以加大，亦令市民放心啲。」
為免長者通宵排隊買口罩，Sik Hon 表示，預售機制下，預留某數量透過地區團體分發：「經歷呢10個月，都知道香港人係好願意分享，如果到呢刻都仲要懷疑件事，係好難向前行。」他亦強調，所生產的口罩，其品質最高可達 ASTM Level 3 （即可達醫護人員需要）：「一般市民唔需要用到Level 3，因為透氣度低，但睇到時需求，假如醫護需求大，可以做到Level 2。」他亦承諾，將優先照顧醫護人員的需要。
成立口罩生產線，重重難關關關過，最難是搵人才。「好多後生仔唔願去廠做，而好多有經驗嘅又年紀大， 但印象最深係請到我哋嘅技術總監，佢已經退休，亦係極少數擁有口罩生產經驗嘅香港人。」他提到，是次創造約20個職位，並正舉行招聘會，預計生產線4月底投產、5月中可以交出預購的6萬盒。
最想大家健康
自2月初至今，香港已有超過10個單位表示成立生產線，個別企業負責人如王維基及林健鋒等，知名度較高；但亦有個別規模細、未達國際標準。「呢件事有唔同組織參與，有啲好商業化，有啲由NGO搞，但最緊要係快啲供到貨俾市民。」Sik Hon 坦言，由籌備生產線到預計交貨期，前後只約3個月，但亦有人擔心屆5月時，疫情已緩和，對口罩需求減，「最好而家直刻完 ，我哋唔想因為疫情而有錢賺，最想係大家健康。 」
他續指：「呢個係長期要解決嘅問題，唔係3個月、半年，係未來1年都唔夠，要有持續能力處理到1年後嘅問題，最直接方法係 commercial （商業運作）。唔搵錢就假，搵錢至sustainable，任何商人都要賺錢，關鍵係點樣分配利潤。我哋擺喺社會嘅component比較多，包括捐增計劃，而且有公開監察機制，會定期在Facebook講進度，等大家安心；仲有 factory tour ，見到口罩可以咁樣生產，可以即時攞走。」
Sik Hon 表示，「一合口罩」的理念就是「一人一口罩」：「藉著經歷呢件事後，大家可以團結番，我哋個名叫『一合』，意思都係咁，雖然有分歧，好似美國總統選舉都係一半一半，過咗呢件事後，點樣由一半一半變番合體呢？好多人聽完覺得好左膠，其實最尾希望係咁。」
雖然港產口罩品牌陸續湧現，Sik Hon 認為無需以品牌區分：「疫情前，無人記得帶過咩口罩品牌，口罩本身係standardised，無太大差異。總之大家有得用，買到就得，喺我哋度買唔到，其他地方買到，又唔會太貴就可以。」
