眾新聞 Logo
眾新聞 CitizenNews
眾聞

【法庭停擺】抗爭者辯護律師文浩正:控方可拖慢交文件證據 影響保釋申請


 

因武漢肺炎疫情持續,法庭已經停擺2個月,這是2003年沙士時也不曾出現的情況。終審法院首席法官馬道立上周表示,各級法院因法庭停擺而受影響的案件數目,佔全年案件量近18%。

法政匯思成員、去年起為反送中運動被捕者辯護的律師文浩正表示,明白法庭受疫情影響,但一再延期處理案件,被告人的利益難免受影響:「因為法庭停擺,控方就唔需要做文件處理,或者進度比較緩慢,咁嘅時候,法庭就只可以倚靠控方嘅聲稱(指控),將佢繼續還押,呢個就係個不公平性。如果案件正常推進嘅時候,隨著案件嘅發展、證據嘅披露,其實可能就知道控方案件嘅強弱,咁就會影響保釋申請。」以他所知,有一些被告的保釋申請,便是因控方案情未有進展而要繼續還押。

文浩正律師是法政匯思前召集人,現為成員。大學線資料圖片

司法機構自1月29日起,大部分時間只處理緊急和必要的法庭聆訊及事務,根據司法機構3月25日提交給立法會的文件,「此等緊急和必要的法庭程序和事務,包括新羈押案件、緊急保釋覆核及緊急民事事宜的聆訊。」

文浩正律師表示,司法機構正在盡快處理被告人還押的案件,今個星期辦公的裁判法院已由1間增至3間,務求讓法庭作出指示是否要繼續還押,抑或批准保釋。文說:「法庭嘅原則就係一啲還押嘅案件,通常優先處理,尤其未定罪嘅,因為佢係無咗自由,所以你見到司法機構而家嘅資源,大都係處理緊還押嘅人。因為佢未定罪,(如果最後脫罪)將來佢坐咗嘅監,咪變咗冤枉監。」

為逾百名抗爭者辯護的文浩正表示,很多不獲准保釋的被告人,一般是因為控方指案情嚴重,法庭憂慮會有潛逃風險或在保釋期間再犯。另有部分被告因為還押了一段時間,衡量過控罪、案情嚴重性後,法庭會考慮批准保釋。但文指,有些案件是因為控方準備不足或進度緩慢,導致被告遭延長還押。

他解釋:「點解刑事案件間唔中要上庭,同民事有啲唔同,就係佢要確保個案件係進行緊。咁有啲控方無準備好嘅案件,又未交到證據俾辯方,即係唔夠證據,淨係靠佢嗰個指控將被告還押。因為法庭停擺,控方就唔需要做文件嘅處理,或者進度比較緩慢,咁嘅時候,法庭就只可以倚靠控方嘅聲稱,就將佢(被告人)還押,呢個就係個不公平性。」

文浩正提及上周五(27日),「法院有個case,官覺得:警察做好多嘢無知會辯方、辯方不知道案件進度,做法不理想,所以限定控方喺4個禮拜交個(進度)報告。但係最後,個官都仲係只可以依賴控方而家有嘅指控,拒絕咗被告嘅保釋申請。」 文浩正認為,這個情況在疫症爆發前已經出現,但法庭停擺後,情況更趨嚴重。

他亦留意到:「因為佢哋(被告人)喺入面嘅資訊唔多,佢哋唔知道發生咩事,好多時候只係會被通知幾時上庭,跟住後嚟又取消咗,所以知道佢哋都有好多忐忑,因為佢唔知道自己案件係點。」

終審法院首席法官馬道立日前開腔,為視像聆訊等方式「開綠燈」。港台照片

文浩正表示,即使保釋獲批,但因為法庭暫緩處理答辯等程序,案件只能一拖再拖,「佢係會受到一啲佢哋覺得唔方便嘅保釋條件所限制,譬如話唔可以離開香港。所以表面上好似無問題,實際上就會有啲唔合理嘅限制喺度,確實會令到佢哋好唔舒服。」文指,被告人會問律師:案件怎樣發展、幾時審、幾時完,但律師也答不出,被告人就更加無法規劃日後的路,甚至感到相當焦慮。

文浩正認為,現時情況不理想,「舉個例有個案件,喺呢段時間取消咗,本來今日審訊,但要重新排期,喺裁判署嘅角度,究竟佢排到幾時呢?如果排到下個星期,會唔會下個星期又唔開呢?我見到有啲案件,因為疫情而取消咗多過一次嘅聆訊,即係你排完再排,所以對佢哋嚟講好大影響。雖然我明白有啲地方係控制唔到嘅,你話疫情幾時完鬼知咩。」他指,3月下旬取消的審訊,最快都要排到5月。

法律界又怎樣看法庭停擺?「我估一開始大家諒解嘅,大家都知道呢個係無可抗逆嘅一個情況,大家都希望快啲去處理,亦都知道公眾安全嘅重要性。但係隨著個時間,有啲無奈同洩氣,本來諗住開番,但點知又停擺,咁就開始有啲討論,究竟係咪應該諗一啲其他方法,例如電子科技嘅協助。大家起碼都唔使手停口停,或者甚至更重要係,唔好俾啲案件堆積。另一方面大家都好驚,再開番嘅時候唔知點樣應付堆積如山嘅工作,所以個心情係非常複雜。」

法庭停擺期間,文浩正只能同客人開會、給予法律意見、睇文件,做好一切上庭的準備,另外就是多了探監。他所在的律師團隊,為過千名因反送中運動被捕的抗爭者辯護,他手頭正協助被控的逾百人。

疫情導致法庭停擺,亦似乎暫緩了社會運動,文浩正有向還押中的抗爭者解釋疫症之下、牆外的世界,部分被告人會因為疫情帶來不確定性而感到擔憂,但沒有懼怕。「大家都覺得有啲,喺呢個情況之下令到個運動『暫停』啦,呢個係出乎大家意料之外,大家都明白嘅。但係呢,佢哋無喪失信心。」有獄中的抗爭者向他表示,覺得香港人會越戰越強,相信疫情過後士氣更高漲,「佢真係咁樣講嘅,話嗰團火唔會滅。」 

去年7.28被捕的44人被控暴動罪,7月31日隨即提堂,大批市民冒雨到東區裁判法院聲援。有關案件原本排在3月初審訊,因為疫情要延期。資料圖片



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe