眾新聞 Logo
眾新聞 CitizenNews
眾說

民主派過半或可逼中共攤牌


筆者早前寫過民主派(包括本土派or whatever你點叫)過半的話,可藉否決財政預算案製造憲制危機。雖然不知多少人有看過該篇文,但近期關於民主派過半製造憲制危機的討論確實是多了,尤其親中派要員如譚耀宗、梁振英等紛紛表態必須阻止民主派過半,可見親中派的確擔心成真。

有朋友向我講,你唔好咁天真,民主派過到半中共都會DQ,根本行唔到跟住嗰幾步。這是對的,而事實上,即使中共唔DQ,關鍵時刻能否民主派全部隊形一致,立法會重選民主派能否維持過半,等等都是變數。但我想講的是,不論民主派過半後做到幾多嘢,至少比起親中派維持過半一切照舊,都能令中共陷入兩難而必須攤牌。

看上面的簡單化game tree(博弈理論沙盤推演),如果民主派取得過半,中共將面臨是否DQ的選擇,而無論哪一個選擇中共都需要付出代價:不DQ,民主派可能癱瘓政府或製造憲制危機;DQ,除了法律問題,還會逼市民再次上街,還可能成為美國制裁藉口。

換句話講,民主派過半能令中共必須攤牌:是接受要跟民主派談判,還是打壓到底而面對美國制裁。我不會認為中共一定會選擇前者,容許產生偏黃特首云云,所以我跟朋友講我不覺得我好樂觀或天真。我只是認為民主派過半是能破除現時悶局的一步, 即使結果可能是奇蹟vs攬炒。而就算沒有奇蹟,國際關注度肯定高過晒在報章登廣告,和能加強民主派話語權。

老實講,中共到時會點出手真係冇人知。我只可以講多句,由舊年6月到依家都聽過N次中共出手論啦,解放軍出咗未先。咁出解放軍大家都未驚啦,仲有咩好驚呢。唔知呢個諗法又算唔算好天真啦。

跟住講講選情。地區直選,民主派暫時初選/協調目標係出23個名單。假設做得唔錯,取得35席中64比的21席,加上超區3席同區一1席就有25席,仲差11席先過半,或者降低要求癱瘓立法會10席都得,咁功能組別仲要贏多10或11席。

上表係2016年功能組別登記選民人數,以及民主派/親中派得票。如派系有多過一名候選人用括號括住。為慳位,選民人數最低的漁農界、金融界、保險界、航運交通界、勞工界、鄉議局等冇列出。教育界、法律界、社會福利界、衛生服務界、醫學界、會計界、資訊科技界等7席已經由民主派贏過,今屆相信都可以。咁就仲差3或4席。

難度唔低。首先目標係建測都園界,上次在親中派有2名候選人下,比姚松炎成功偷襲到,總票數其實係親中派佔多,但睇返差距唔大,有得追的。

工程界,可能由於行業好靠政府工程維生,親中派優勢較大,但呢個界別始終個人票較多,而且過去大半年中產轉態最多,唔係冇機翻盤。

批發零售界,睇落差距唔細,但對比返登記選民人數,其實好多人冇投到票,親中派得票佔全體選民只係少數。如果策動偏黃店主登記投票,並且主攻政府施政失誤同親中派盲目保皇,都有機會的。

飲食界較批發零售界艱難,但始終個人票多,同埋相信業界對廿蚊張都有不滿,不可放棄。體演文出亦都係。

以上5個界別,要贏到3或4席的確有難度,但我覺得值得一試。如果地區直選可以贏到超出預期的22甚至23席,當然更能減低功能的壓力,所以唔好話協調同配票唔重要。最後,除咗叫人登記選民同當日去投票,亦都記得繼續支持黃店,唔好比佢哋執笠呀。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe