被視為親建制的香港律師會5月28日改選理事會，三名「反送中義務律師團隊」的律師敲定出戰，包括前年與港大法律學院首席講師張達明拍檔參選的林洋鋐（舊名林耀強，八九民運時擔任學聯主席的人權律師），以及兩名30出頭的年青律師彭皓昕、蔡梓蘊。
律師會共有20名理事，每年改選5名最資深理事。張達明前年當選、林洋鋐落選，現屆理事會內暫時只有張達明和人權律師Mark Daly（帝理邁）屬於親民主開明派（兩人來屆自動連任理事）。每年選舉都有所謂建制派的推薦名單，去年更有律師表示收到訊息，列出中聯辦屬意候選人。林洋鋐表示，今年決定再選是被兩名年青律師所感動，因為面對國家機器，正常人都會驚，年青律師更是以前途作賭注，「而佢哋都係義無反顧地見到件事嘅重要性，然後咁樣決定⋯⋯我諗我哋喺成個（反送中）運動見到嘅，就係呢種特點，參與嘅人都係好普通、只係身邊嘅人，但有好唔平凡嘅抱負、承擔，我哋就係需要咁樣去make a change。」
自從去年6月，三人都曾經為了到差館保釋反送中被捕者而捱更抵夜，彭皓昕（Janet）與蔡梓蘊（Olga）正是相識於差館外。最先有參選念頭的彭皓昕說，某一晚在元朗差館外見到蔡梓蘊，心想：「又係你？」於是就開始對話，發覺大家理念相近，又見蔡梓蘊協助化名呂小姐的受害人（指警方無理要求全裸搜身，曾與陳淑莊舉行記招），相信是願意走前一步的同業，所以找她埋班。彭皓昕找上林洋鋐，則是因為林洋鋐專注幫弱勢多年，經驗豐富。
三人在政綱上強調捍衛法治、司法獨立、不受政治干預，以法律約束公權力，並表示支持成立獨立調查委員會。林洋鋐指，律師會在整個社會運動期間發了十多篇聲明，幾乎一面倒譴責示威者，他認為這是無可厚非，但作為一個法律專業團體，見到警方毆打已被制服的示威者、甚至出現濫捕，對於法治都構成好大影響，「我哋除咗去前線幫手、幫助示威者之外，都希望將整個業界或者社會對於法律團體嘅一啲期望、聲音帶到入去。」他再三強調是「strong and fearless voice」。
三人雖然都是反送中義務律師，但指出政綱寫得相當清晰，關於運動的只有一項：「成立獨立調查委員會」，因為他們相信這是社會的共識，亦是還各人清白，修補撕裂的一步。政綱另外提到，要「一人一票」選會長、提高理事會透明度、在疫症中推出及時的經濟援助措施等。
彭皓昕2015年開始成為執業律師；蔡梓蘊則於2018年成為執業律師。選擇在這個時候參選，面對的又好可能是國家機器，真的準備好嗎？彭皓昕說：「一路傾都不斷問大家，如果中央政府睇得呢個律師會嘅位好緊要嘅時候，我哋唔知道會受到咩壓力，但係我哋一路傾，我覺得最好嘅一樣嘢係，我有隊友，即係我哋一齊面對呢啲事，呢個係俾我多好多信心。」二人亦慶幸身邊人支持，還有許多有相同理念的律師一齊打這場硬仗，希望盡力而為。
一直都負重前行的林洋鋐則言：「你問我驚唔驚？驚。做唔做？做。點解？因為緊要。咁就講完咗，只能夠係咁樣。我就唔去夾硬說服自己唔好驚，無辦法，都係會嘅。我有老婆仔女，我都驚佢各種手段打壓。我有成班同事，你如果要搞我嘅話，其實包袱都唔細。最後都係，人生去到重要關頭，都係問咩緊要啲？呢件事緊要啲。」
他們未知對家派甚麼人，但肯定這一仗難打。林洋鋐指：「前年，張達明1600票，佢係票王（2016年法律界選委最高得票者），都係最尾一席入去，而對方係企著1900、2000票，呢個動員能力非常之強，咁我相信今年就更甚。因為我哋見到法治、司法獨立受到好大嘅威脅、越來越大嘅威脅，我哋見到捍衛制度嘅過程，大律師公會好多時候係走到好前，喺合適、關鍵嘅時候，講出佢嘅意見；但律師會相對靠近建制。我諗當權者又好、中聯辦又好，都會想律師會繼續保持呢個狀態。如果我哋咁明顯地，我哋想帶入一個比較開明，堅守法治、司法獨立嘅聲音，應該會遇到幾大嘅阻力。」
三人選擇在這時候迎接硬仗，部分原因是過去一年作為義務律師協助反送中被捕示威者，令他們深刻感受到法治受到的威脅。 彭皓昕去年這個時候仍在牛津大學讀法律，6月運動爆發時並不在港，「每日起身睇live發生咩事，6月嗰時我真係考緊試，但係睇live睇到下晝4點，因為香港半夜、開始散喇，我哋就開始讀書，第二日又再嚟過。」直到7.21元朗出事，她睇住直播覺得一定要回香港，於是考完試即買機票，兩日內從英國返港，加入義務律師團隊。
然後就一再經歷被警方拖延見被捕人，「你明明叫咗見（某人），落晒簿、登記晒，但佢話無呢個人，轉頭拎番佢份口供紙出嚟。即係喺我要求見之後，你先同佢喺無律師陪同下落口供。咁呢啲唔啱程序，但係你香港嘅基本法、人權法係保障人人都應該有律師代表嘅權利，亦都唔應該受一啲無理嘅拖延。但係我哋落到去，好多次係不斷咁遇到呢啲事，幾個鐘咁樣等，我知道後尾11月嗰啲係真係12個鐘咁樣去等。呢啲嘢，律師會係應該關注，因為呢個係影響緊成個法律制度。」
協助呂小姐的蔡梓蘊形容：「當初我接呢個case嘅時候，我本身以為只係好簡單，去做投訴、俾多啲人知。我無諗過到頭來會由本身嘅一個投訴，變做記者會，到最後甚至有一個Me Too嘅集會，見到我陪呂小姐上台嘅時候，真係好多人支持。而喺呢個集會，亦都帶動咗更加多嘅受害人出來講。我無諗過一個咁小嘅舉動，帶到最後會係咁大嘅一個回響或者一件事情⋯⋯我亦都開始反思，我做義務律師，不停咁見到不公義發生、不停咁樣投訴，將來可能幫佢哋打官司，咁足唔足夠呢？其實係唔足夠。或者係改變唔到現在，佢哋可能繼續遭受到嘅不公義同埋不公平。」於是她決定參選律師會，勝算未知，但至少讓業界知道有這樣的聲音存在。
林洋鋐則指，律師的訓練是理性處理每一件事，但回望去年夏天，相信好多香港人都有憤怒、難過、哭泣。他最難忘是一次又一次收到通知後趕到差館，「而喺差館協助示威者嘅過程，好心噏嘅體驗就係，其實呢啲人，包括喺新屋嶺14、15歲嘅小朋友、升旗禮嘅時候嗰幾個年青人，係好普通嘅年青人，即係地盤工人、IT工人、做倉務嘅，甚至有一啲女孩子係嬌滴滴。就算我係一個經常到差館協助唔同嘅人嘅律師都好，其實係好震撼，同埋係好難過。」
他記得一名被捕者（林現正為他打民事訴訟），在紅磡差館被10幾個防暴裝束及軍裝警員毆打，「我當時見到佢嘅時候，佢瞓咗喺醫院，好深刻，當時我問佢身體情況、頂唔頂得住，佢有神無氣咁講話：我頂得住。但佢跟住同我講就係話：你哋要頂住。」
「我其實當時唔係好知佢講咩，亦都無去諗咩事呢，因為我哋去到最緊要就係了解佢嘅狀況、確保佢有治療同埋俾法律意見。當我離開嘅時候，我有再諗，呢啲咁普通、咁平凡嘅人，喺個運動裡面不計自己嘅犧牲而去守住制度，唔係其他制度，就正正係我哋嘅法律制度。所以我其實離開醫院嘅時候，個衝擊好大，因為我再去諗佢叫我頂住嘅時候，就係，我哋身邊咁平凡嘅人都知道要守住嘅時候，我哋喺制度裡面，作為法律界嘅一份子，我哋都唔去守住、頂住嘅話，其實係對唔住呢班人。」
【候選人簡介】
林洋鋐：舊名林耀強，八九學運時擔任學聯主席，曾上北京參與運動，堅持平反六四。後來改名林洋鋐，現為法律界選委。林向來關注人權議題，其開設的律師行除處理一般民事及商業訴訟，亦專注處理各類意外索償，包括工業意外、工傷等為弱勢提供法律援助。他曾經代表2014年雨傘運動中，被警員錯誤毆打的市民成功爭取警方賠償。
彭皓昕：現為公民黨及民權監察成員。2013年在中文大學取得法學專業證書，其後於國際國際法律事務所工作。2015年取得執業律師資格，其後到英國牛津大學修讀民事法，2019年畢業。現時在一般業務律師事務所工作，民事、刑事訴訟均有涉足。
蔡梓蘊：2013年開始涉足法律界，2016年在中文大學取得法學專業證書，2018年成為執業律師，專注刑事訴訟。目前除了協助呂小姐，亦正處理不少投訴警方的案件。
