獲得21票的胡國興特地到點票中心外會見記者，因為很多網媒沒法進入點票中心採訪。他表示，不在乎別人將來如何記住他；他在乎要記住的，是參選過程中，每一個遇上的香港人。他並語重心長地說：「我希望我呢個71歲香港人，『不含糊、不閃避』；『有話直講，一往直前』嘅態度，可以多多少少為社會，作出積極嘅示範作用。」
以下是胡官在街頭見記發表演說全文：
我誠心祝願林鄭月娥新特首，未來五年，做到佢講嘅放下成見、與眾同行。
以前做法官，我慣咗做球證。今次落場踢前鋒，要多謝家人，同競選團隊支持。我地人少少，但係好有隊形。尤其要多謝我太太，每次被人鬆肘，都有佢錫番我。
我唔在乎第日，人地記得我D乜野；我好在乎要記住，每一個我係參選路上遇上嘅香港人。
我參選第一個階段的目的係ABC，已經做到。
第二階段要睇以後，我提重啟政改、22條立法、全民退保，如果最終有民意支持落實，我就超額完成。
最後我有D 心底話，特別想同各位年青記者朋友講。你地好鐘意問我：有無後悔，有無失望，覺唔覺得唔公平？我相信呢D問題，反映到好多香港人而家嘅受壓抑嘅心理狀況。
我希望我呢個71歲香港人，「不含糊、不閃避」；「有話直講，一往直前」嘅態度，可以多多少少為社會，作出積極嘅示範作用。
我好鐘意我長大嘅地方－－榕樹頭。個度有生咗長鬚嘅大榕樹，佢地每一棵都曾經係一粒小種籽。不過，每一粒小種籽都能夠堅守自己嘅小陣地，幾十年後無人再可以動搖佢地。
我希望你同我，都會堅守自己嘅小陣地，係陽光之下努力，為生命嘅理想堅持。
以後有緣，江湖再會！
胡國興回答記者提問時說：「我是失望，但得21票不錯、幾好，證明選委有良心有原則，多謝他們。」他說，今次選舉是「選了一個建制派，但一啲承諾都無。」他指，林鄭月娥曾說會令香港和諧，希望她日後諮詢多些才做決定，為香港着想。他不覺得泛民選委欺騙他，因為選委早已說明提名及投票是兩件事。
