眾新聞 Logo
眾新聞 CitizenNews
眾說

青少年復元人士系列(一)──自信心及自我價值感不足


做咗精神健康個案工作接近十年,早年服務對象主要是中年同年長人士,大家都係麻甩佬,臭味相投自然份外啱傾,亦有助我同佢哋建立關係。

舊年開始,我轉到另一個服務單位工作,多咗做年輕人的個案,再加上呢兩年都喺服務青少年的精神健康機構帶實習學生,成個人感覺年輕咗,亦累積咗更多實戰經驗及見識(註:見識是生,知識是死的)。

最近剛帶完一批實習學生,有個小小的空檔,讓我靜下來,整理一下呢兩年的經驗與觀察:當中不少都是老生常談,甚至大家經已耳熟能詳,無論如何,就當是為自己來一場回顧及複習吧!

唔知係咪因為患病前後所遇到嘅經歷,又或者精神病患者呢個標籤實在太沉重,工作中或實習指導遇到的青少年個案,都會出現自信心或者自我價值感不足的問題。

呢份自我觀感,自然也會影響佢哋嘅學習、工作以至社交等範疇。佢哋當中,有部分出現明顯的社交障礙、甚至隱蔽在家不願與外界接觸,有一些雖然顯得活躍,經常參與聚會及活動,同佢哋傾得深入一點,亦發現其實係「對人歡笑背人愁」。

又難怪,試想想,一個人成日覺得自己好唔得同好唔掂,又點會過得開心?內心深處,自然會產生好多負面情緒。

另外,正正由於同一份的自我觀感,佢哋對於外界嘅批評更加敏感,更加難去接受。所以,你會見到好多青少年復元人士,無一份工做得長,好多時因為忍受唔到俾上司鬧,又或者遇到其他不如意的事,就會辭工唔做。

再仔細d 去了解,佢哋當中,有不少是感覺到老細唔滿意自己的表現,即使對方未有採取行動,已先發制人自己呈辭,皆因「炒人魷魚」相較被人辭退,自我感覺會良好一點。

查實呢個亦只是人的「自我保護機制」,我哋不必過分責究,指責佢地唔夠堅毅或堅持。

當了解到佢哋的內心掙扎,做社工的應該會明白,若果以「專家」或「導師」的心態自居,佢哋覺得自己需要被「調教」,只會更加感到自己的不足,待人處事可能會更加退縮。所以,無論喺自己的個案工作,又或者指導實習學生,我都會強調,要用平等的態度對待案主,讓佢哋有被尊重的感覺。更重要的是,讓佢哋明白,佢哋之所以面對宜家困擾同處境,並不是純粹因為個人因素,當中還有好多外在因素,例如家庭同成長環境等,並唔係佢哋可以控制得到。


所以話,做青少年精神健康的工作,要對症下藥,應該由「優勢觀點」(strengths perspective)開始:社工與案主同行,一起探索、發掘佢哋的優勢,包括內在的能耐與外在的資源,讓佢地明白,自己唔係想像中咁不足,處境也唔係想像中咁惡劣。


呢d優勢,可以包括信念、價值觀、技能、性格,家庭支援、人際網絡同對未來的渴望與想像等等,而案主如何從患病的經歷中掙扎過來,在面對病徵、藥物與外在歧視等影響,仍然能夠堅持至今,這本身已反映到佢哋堅韌的本能。 

仲有一點,就係年輕也可能是佢哋的優勢。筆者在前線多年的觀察,相對較年長的同儕,年輕的復元人士確係有較佳的體力與精力,應對患病對個人帶來的困擾。

本專欄逢星期三更新。如想了解更多有關精神健康的故事或資訊,歡迎到壹元坊面書專頁瀏覽。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe