眾新聞 Logo
眾新聞 CitizenNews
眾說

原來一pet屎


唔想欽點嘅就習握手再俾西環推到超高民望,要欽點嘅就搞吓搞吓搞到負民望嚟當選,原來唔只689一pet屎,連習某都係,做嘢做到一pet屎。

習近平 和 特首梁振英

不才從來唔對共產黨有幻想,唔會想像習某係賢君,會體察民情重視民意,之不過,真係估唔到,原來係做嘢做到一pet屎。不才自問睇錯。

鬍鬚曾攞到高民望,呢個當然同佢嘅處事風格以及準確嘅政治判斷力有關,不過唔好忘記,佢民望咁超高,亦都係要多得習某同西環呢個推手。

如果唔係好幾次習握手,香港市民又點會喺舊年年中就開始睇中鬍鬚曾對佢參選特首趕走689寄以厚望?如果唔係有《成報》喺舊年八月底至今年二月初不斷向西環向689發炮而左派宣傳機器又竟然無去點樣反擊(淋紅油同全線追擊係二月底先至發生嘅事),香港市民又點會對西環意旨未必等於習某意旨存有寄望,進而對鬍鬚曾最終可以逆轉勝繼續發夢?如果無西環喺過去三個月不斷放風明撐假笑娥打壓鬍鬚曾,討厭假笑娥鍾情鬍鬚曾嘅民情又點會可以喺咁短嘅時間內急速飈升?而如果無西環不斷挾實建制派,鬍鬚曾又駛乜扭盡六壬嚟主攻民意同埋攞民主派嘅支持呀?

搞咗咁多個月,卒之搞到鬍鬚曾以超高民望落選,假笑娥以負民望嚟當選,肉酸到呢。共產黨做嘢真係一pet屎。

香港人咁易氹,共產黨都硬係要咁玩法,好似慌死香港人唔知一國兩制係個騙局咁。其實佢係咪要專登打殘香港人想多啲正常嘅香港人移民走呀?係咪連迷姦你都嫌廢事,係要專登好粗暴咁強姦你先至開心,等佢可以向眾人宣示主權呀?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe