眾新聞 Logo
眾新聞 CitizenNews
眾說

中聯辦越出聲就是越驚


中聯辦5月2日在網站發表「發言人談話」

前輩教落,中共講嘢,要用逆向思維諗。例如,解放軍同各省幹部突然一齊發文宣示效忠習總, 就即係習總凝住好多人唔效忠佢,否則邊洗多此一舉。同理,依家中聯辦發聲明話市民都反對攬炒,攬炒注定失敗, 就即係佢驚緊攬炒有市民支持,攬炒成功,否則真係注定失敗,市民都愛中聯辦,9月都投親中派,你中聯辦仲洗乜講咁多廢話。

中聯辦近期接連發聲明,明張目膽干預香港,之前已寫過幾篇鬧,不敘。但今次聲明鬧得咁仔細,方方面面都鬧勻,正暴露了中共驚緊乜。大家繼續做就啱了,因為逆向思維,佢咁驚就證明件事做得成係會對佢有打擊。

第一件佢鬧係勾結外國勢力,所以國際線一定要繼續打,越大越好。依家中共因為播毒在國際上變過街老鼠,加上國內經濟問題,港人正好內外夾擊,趁佢病攞佢命,好難搵到更好的時機了。

第二件佢鬧係示威同黃色經濟圈,又係應該繼續。港府為應對示威已疲於奔命,在國際上出盡洋相,黃色經濟圈又進一步打擊投共商人,為運動加強經濟彈藥。但更重要係鞏固本土意識,以往示威都有格,但都停留係要政改的階段,依家係學羅霖講「要獨立,特別係經濟獨立」,要經濟社會各方面都本土化,同中國越走越遠,成個精神改變係中共絕對唔想見到。

第三件鬧立法會搞事。筆者早已指出民主派立法會過半可有製造憲政危機的條件,中共亦好明顯唔想見到發生,唔係就唔洗咁喊打喊殺。好多人擔心DQ,話不如唔好做啦。喂依家十劃先得一撇你就比中共嚇窒,點得㗎,咁乜其他嘢都唔洗做㗎啦。到底真係會DQ幾多都未知, 中聯辦出聲出咗三個禮拜,郭榮鏗都仲未DQ到,真係立法會選舉時會點邊個知?出解放軍都講左N次都冇出啦。總之盡做先。我都係嗰句,唔好將來後悔做咩冇搏盡。同埋真係DQ咪當多個理由叫外國介入囉。

最後我又要串多佢三樣。一係佢話咩全球都在抗疫,香港人卻在搞政治。妖你夠成日講23條啦,唔係政治呀?跟住,佢鬧咩政治綁架經濟,根本中共自己就最興咁玩,一時要杯葛日貨, 一時又杯葛韓貨,又捉港獨台獨藝人,又要反NBA又盛。 賊喊捉賊,就係咁囉。最後,以下呢段,大家試吓將「有案底」 三字改成「有大湾区」再讀一遍:

「我们不禁想问问那些政客,当你们对年轻人大肆蛊惑「有案底(有大湾区)的人生更精彩」时,你们的孩子又在哪里?如此以牺牲一代人美好前程为「政治燃料」,居心何在、於心何忍? 」

請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe