眾新聞 Logo
眾新聞 CitizenNews
眾說

蟲鼠組不配有的1000蚊...


【撰文:鄧永謙】
作者為新福事工協會關懷貧窮學校事工主任

有時真係唔想比較,不過工友嘅體驗係心水清嘅。自從不停收到有心人捐口罩俾我哋,叫我哋要送俾啲工友,我哋會隔一個星期送一次俾佢哋,所以了解到工友用我哋派嘅口罩滿意程度係點,呢兩個星期落去,工友除咗認得我哋之外,仲第一時間讚我哋送嘅口罩好靚,唔係話個款式好靚,係講緊個質量,話戴得佢哋好舒服。

咁點解會讚呢?就梗係有嘢比較啦,佢哋用公司俾佢哋嘅同喺街度買嘅幾種款式做過比較,食環外判有時未必係俾CSI 口罩架,會係俾自己買番嚟嗰啲,佢哋覺得又薄又戴得唔舒服,仲有啲保安員同我哋講公司係有比口罩,不過係中國武漢做嘅,你夠唔夠膽戴?所以有得揀佢地寧願唔戴,就好似香港人寧願掃晒印度做嘅口罩,都剩晒啲中國製嘅口罩喺度死都唔買咁,無論基層與上流嘅香港人,而家開始都明眼人心水清,知道大陸啲嘢永遠都信唔過。

工友問我啲口罩係唔係好貴,我話通常啲捐贈者訂口罩嘅時候會再訂多啲預咗俾你哋,所以我都唔知係平定貴,不過以所見嘅捐贈物品中真係多數都係高質口罩。工友話佢哋冇資格買同用呢啲靚口罩架,但我哋就成日拎過嚟俾佢哋,我話千祈唔好咁講,工友你哋更加應該要用靚嘅防禦口罩添呀,走喺最前線冇保護點得呢?又順便問下佢哋有咗嗰1000蚊防疫津貼會點駛?工友都話可以多咗啲錢去買漂白水搓手液都算係咁啦。

照片由筆者提供

講講吓有班蟲鼠組工友見到有口罩送就衝咗過嚟,講開1000蚊佢地就好嬲好慶,話人做清潔我做清潔點解我哋冇嗰1000蚊津貼嘅?點解冇清潔呢個字就唔係做清潔呢?工友叫政府唔好咁膚淺,唔好成日咬文嚼字,但又唔落嚟了解吓,蟲鼠組都係處理衛生問題,喺後巷捉老鼠曱甴仲要洗埋笪地整到乾淨晒喎!咁仲唔係幫手清潔係咩呢?佢哋越講越慶,食環工友都後退咗幾步俾佢哋嘅殺氣振住。

蟲鼠工友話倒筒掃街見到老鼠仲可以唔捉由佢走,但佢哋唔得,咁邊個職責複雜啲呢?佢哋你一言我一句,我都同佢哋討論咗一段時間,工友同我講如果可以嘅話幫佢哋反映吓啦,佢哋都唔知可以點做。我話始終希望工友都可以一齊表達先夠力,不過都好明白佢哋唔敢表達嘅擔心嘅,又驚得罪阿頭(通常係鄉里或朋友介紹),又驚冇咗份工。

當我哋呢個社會每個生活層面都呈現以威權階級去拑制個人獨立發展(身心社靈)嘅可能性時,我哋就會活喺威權嘅壓迫當中,無力嘅被壓迫者會感到恐懼,亦因著恐懼甚至習慣和倚賴了威權壓迫帶來的 「偽和諧」,被壓迫者不能潛越威權權力半步,稍有越禁必遭白色恐怖或懲治。

工友身處嘅狀況,正正就係有不滿,有冤無路訴,但因為層級威權嘅壓制(外判/判上判),反抗就會帶嚟懲罰,過程中產生嘅恐懼,最後就唯有默默承受壓迫。好多現今外判制度下嘅基層工種,都製造咗無數壓迫恐懼俾基層嘅工友,無論政治參與中嘅生活或生活中嘅政治參與,有權勢者都懂得利用呢種從壓迫而嚟嘅恐懼去控制弱勢者。香港呢個地方隨住威權統治嘅來臨,必然會產生更多喜好權勢之人操控社會,無論民生與政治都必須有更多嘅自我覺醒同監察,唔可以俾佢地肆意蹂躪弱勢基層群體。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe