眾新聞 Logo
眾新聞 CitizenNews
眾說

唔關係咪「毅進仔」事 


唔想個個禮拜都喺度鬧警察,但佢哋實在係劣跡斑斑,除咗識得欺壓同打罵年輕人同示威者,到要求佢哋認真執法,保障弱勢及基層市民權益的時候,即刻個個打回原形,縮骨缷膊無承擔,總之最好唔使做準時收工。

最近,香港警察的新任務是挾「限聚令」,恣意進入商場趕人。EYEPRESS照片

話說我有一位年青案主,佢在中學年代已經患上思覺失調,病情嚴重要服食最重的藥物。受到副作用影響,加上多年內缺乏正常社交,案主的思路難免比較遲鈍,判斷與分析能力也比較弱。
 
話雖如比,案主其實很渴望上班,賺錢幫補家計,減輕老父的負擔。雖然佢每一份工都係做咗短時間就被辭退,仍然鍥而不捨「繼續搵、繼續做」。
 
案主早前又被辭退了,有位立心不良的朋友,睇中咗佢思想單純加埋急於搵工的心態,誘騙佢同另一位朋友簽約,聲稱會安排佢喺朋友經營的酒吧工作,月薪高達兩萬,但就要先支付兩萬六千元的手續費。
 
兩萬六千已差不多是案主全部的儲蓄,但懷著信任朋友的心,佢仍然乖乖奉上。之後的發展,自然是既無工開亦無糧出,佢向朋友追討未果,之後去差館報案,阿sir 話呢D純屬私人金錢糾紛不予受理。
 
本以為事件已告一段落,也希望案主汲取教訓唔好再受騙。豈料同一班騙徒竟然食髓知味,近日再相約案主見面,指稱佢未有履行合約內的職責,份屬違約,要佢賠償兩年總共五十萬的薪金。據案主跟老父透露,騙徒更影低佢張身份證同住址證明,又迫佢即場打電話,向多間財務公司借錢。好彩因為案主未能提供足夠的證明文件,暫時無公司肯提供貸款。
 
老父日前再陪同案主報案,差人堅持案主係自願簽訂合約,私人協議你情我願唔怪得任何人,不肯立案調查。
 
雖然筆者不在現場,相信報案室的差人,不難從案主的神情、外表及應對看得出,佢判斷能力有異於常人,而騙徒正正是利用這一點,誘騙佢進入圈套。面對這樣情況,身為執法人員竟然不作進一步了解,只急急打發兩父子離開了事,難度這就是佢哋口中的「忠誠勇毅」、保護弱勢應有的態度嗎?不作進一步調查,佢哋又怎能確定騙徒沒有用「虛假聲稱」或其他手段,威迫利誘案主簽約?而這當中確有可能涉及犯罪行為!
 
筆者過往的工作經驗中,實在看到太多執法人員,一旦知道涉案人士有精神問題,無論是原告還是被告,就好自然先入為主,覺得佢地的說話不可信。套用差人行內的術語,這些都屬於「傻人發現案」,用不著認真去處理。
 
只是,在這個案中,從案主的經歷,以至執法人員敷衍的態度,佢哋唔係助長緊不法之徒欺騙弱勢嗎?騙徒知道差人不會認真處理,膽子同胃口,恐怕也只會愈來愈大。
 
所以話,並唔關係唔係「毅進仔」、學歷高與低的事!香港警察俾市民睇唔起、鄙視同藐視,是真係有原因架!

本專欄逢星期三更新。如想了解更多有關精神健康的故事或資訊,歡迎到壹元坊面書專頁瀏覽。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe