眾新聞 Logo
眾新聞 CitizenNews
眾說

講到黃營「係又鬧唔係又鬧」,究竟政府喺口罩處理上出咗咩問題?


對住呢個政府,真係日日吐十公升血出都未見佢正常過。明明派口罩啦(終於!),但又出這樣那樣問題讓人側目。跟住就見很多藍絲鬧,「政府而家終於派口罩!係很好的事嚟!仲想點!!係又鬧唔係又鬧!」今日林鄭再出招言,「唔做事無人鬧你黑箱、做事又俾人批評」,更想強化黃營「係又鬧唔係又鬧」的無理取鬧形象。其實,做可重用口罩俾市民係啱,但仍有幾個致命傷。

林鄭月娥在記者會上戴上「銅芯口罩」。照片來源:立場新聞

1. 派口罩係啱,但錯在Timing錯

當初全球口罩短缺難以採購,市民當然明白。但市民嬲是嬲在,「點解某D國家如台灣可以做到口罩供應正常,但如此發達嘅香港竟然唔得」。當全港市民喪撲口罩,彼鄰台灣在抗疫初期,不僅做到控制口罩供應,確保不容市面囤積居奇,同時自給自足生產口罩。香港?我是見到有人對住鋪頭踢道閘咋喎...

市民渴望見的,是一「盡力」的政府,如果「盡咗力採購」都不成功,市民是不會挑剔。但,當初為何港府不採措施打擊奸商?更追源溯本是,為何政府沒有封關阻截源頭?另,為何政府又沒有接觸在港製造口罩商人,即時給予補助?之後防疫基金的補助亦被嫌申請時間過長,從新聞中見不少製造商都索性放棄申請。如果無做好這些,政府憑・什・ 麼・ 認・為自己應得市民的諒解?

2. 有關招標問題

整口罩唔係問題,但無可能話「因為要快所以不招標」,個「因為」和「所以」在這裡是不能扣成因果關係 ok?你招標慢,是你政府「做嘢做得慢」的問題。自己做嘢慢,然後話「因為我做得慢,趕唔到市民需要;要快就不能招標」。將完全扣不成邏輯的說法胡亂充塞,真是政府特色。都係嗰句,「點解某D國家如台灣可以做到口罩供應正常而又無出現招標問題,但香港竟然唔得」?然後又不肯交代總開支?整件事不僅讓人覺得私相授受、瓜田李下,更是黑暗得很。

3. 有關銅的問題

其實坦白講,一定係整重用口罩架啦,但問題是我寧願你直接整布口罩俾市民(送唔送濾芯可再考慮),叫延長下即棄口罩壽命都好。坊間已有不少濾芯可購買,物料方面亦唔係咁有爭議性;銅在口罩濾芯的使用上並不成熟,搞到現時又俾人質疑個物料上會否有問題,成件事捉哂虫。至於設計問題方面,個人而言是覺得吹毛求疵了點,坦白講如果有用,乜設計都無所謂啦。當然,政府有無搵設計師,好好設計口罩外型,又是另一問題。

4. 有關口罩派遞

點做物流部分是派口罩一大難關,偏偏政府好揀唔揀揀著個最辛苦郵差叔叔的方法,實是一大笑話。明明有咁多民政事務處、郵政局,市民上網登記後咪去呢D地方拎囉,掛號方法應留給有特殊需要人士(例如因傷殘而長期不能外出者)使用。大人大者有手有腳點解要郵差叔叔派掛號送個口罩送到上門?而家講緊幾百萬個掛號喎?我是前線郵差叔叔聽到D咁嘅智障設計應會即時暈低。

其實由始至終,最大問題是市民一直以來對政府信任度極低。所以不論派罩時機問題、銅芯問題、設計問題抑或招標問題,其實背後是顯示出「市民不喜歡、不信任政府」的問題,評論甚至達「對人(政府)不對事」程度。例如當初見銅芯口罩設計,我只覺得布面像手巾仔,沒有惡劣感覺,但由於大家不喜歡政府 、又經咀賤港人傳到變成「xxxx口罩」,不僅真是有點像,而且咁講法,的確大大減低使用意慾。嗱,我而家好認真咁話你聽「政府喺口罩處理上出咗咩問題」,唔該你自己反省下(um...無可能);而藍絲們,就唔好再認為黃營「係又鬧唔係又鬧」,而是「呢個政府真係做乜都好有問題...」。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe