眾新聞 Logo
眾新聞 CitizenNews
眾聞

【三屆足球先生】李健和批足總不重視青訓:要港隊世界排名升是天方夜譚


 

足總被審計署揭露多個管治問題,退役香港著名足球員李健和批評:「足總每年都希望香港足球嘅世界排名提升,簡直係天方夜譚!香港足球若果連最基本嘅青訓都未搞好,根本冇資格同其他地方比較。足球技術係由細到大鍛鍊,美斯17歲同而家嘅美斯根本係冇分別,一樣咁樣過人、咁樣推波,只不過而家更加識得懂得控制比賽,經驗累積令到佢慢慢成長,先變成而家嘅足球傳奇。」

李健和(和哥),一個家傳戶曉的香港人名字,今年52歲,約11年前退役,球員生涯時擔任右翼鋒,曾效力多支著名香港球隊包括東方、南華、晨曦,職業生涯長達23年,三度獲選香港足球先生(1993年、1994年、2003年),1987至2003年是大港腳。

李健和身後的坪洲足球場,是他年少時最愛流連的地方。周滿鏗攝

李健和生於離島坪洲,父母務農,他是家中么子。和哥小學二年級時開始接觸足球,最愛在坪洲唯一的山頂球場踢球。他坦言自小無心向學,小學期間曾兩度留級,升讀位於跑馬地的三育中學。

中學時期,他報讀當時市政局舉辦的足球訓練班,放學後到跑馬地球場接受正規足球訓練,半年後投考菱電青年軍獲得取錄,邊讀書邊踢波,並入選香港青年軍。但菱電僅維持一季便解散,李健和跟隨青年軍教練轉投東方,繼續接受訓練,讀完中二後向父母表示要退學,希望全心踢足球,最後他簽約東方,正式成為職業足球員。

飄逸的長髮,是李健和球員黃金生涯的標誌。網上圖片

除了精湛的球技,和哥最令球迷留下深刻印象,莫過於他一頭飄逸的長髮,但退役後便改變造型:「我覺得人在每個階段都希望有改變,做球員嘅時候就會想不羈少少,形象上可以後生啲;但做教練嘅時候,會想俾人一種踏實少少嘅感覺,所以就決心剪咗佢。」

說起和哥的職業生涯,不得不提是他在2002年於澳門舉行的港澳埠際賽中,身為南華隊長的他在一次攔截時被球證吹罰。他與球證理論被紅牌驅逐離場,他因對球證判決不滿,把球踢向球證方向,球證即揮拳打和哥,結果雙雙被亞洲足協重罰,此事成為他職業生涯中的一個污點。事隔20年,和哥如何回看年少氣盛的自己?

「後悔就一定後悔,作為一個職業足球員,呢個行為係絕對唔啱嘅。只不過因為自己性格問題,比較火爆,所以好多時候球場入面有不公平嘅判罰,都會好影響自己嘅情緒。剎那間控制好情緒,都係職業足球員要學習。」

武漢肺炎令全球體壇停擺,現職中學足球校隊導師、有線足球評述員的和哥也受影響,自香港停課及3月起歐洲五大聯賽停辦,他直到現時都是零收入,依靠積蓄生活。疫情放緩,他相信社會很快回復正常,而且相比起他當年剛剛出道踢波時所經歷的辛酸,目前並非太大一回事。

和哥憶述:「啱啱正式做職業足球員(17歲,1985年)嗰陣得$1,200一個月,但係你去普通打份工都至少有$2000,當時生活摱摱緊,而且屋企人當時好反對我做足球員,因為佢哋覺得踢波搵唔到食,只係單純娛樂嚟。嗰陣我一個禮拜踢足六日波,五日訓練,一日比賽,佢哋(父母)淨係覺得我由朝玩到黑,不務正業咁。不過,到我後來真係搵到錢喇,佢哋就冇理我喇,哈哈!」

自今年3月起,港足所有賽事暫停,足總預料港超最快只能在8月復賽。作為前東方龍獅青年軍的教練,和哥認為,8月復賽太遲,他以德國及韓國的聯賽為例,指其他國家尚未有本地零確診的出現,已經復賽,認為港超聯復賽日期「會唔會遲咗少少呢?」他有感6月可以復賽。

對於有三隊港超聯球隊宣佈,今季不會參與餘下港超聯賽事,意味就算復賽,也只有七隊繼續踢。和哥苦笑指,香港的足球制度一直為人詬病,卻沒想過原來足總連要求港超球隊必須完成賽季的權力都冇。「你睇吓其他國家有邊個專業聯賽,嗰啲球隊可以話唔踢就唔踢?可能係啲第三世界嘅聯賽咪會有囉!香港足球成日話要跟住亞洲足協、國際足協走專業路線,咁事實係咪真係好專業呢?至少我睇唔到囉!」

對於香港足總最近被揭管理及營運問題,和哥表示屢見不鮮,炮轟足總一向無能,而且不思進取,「以前我哋嗰代,成日埋怨香港政府冇投放資源落足球身上,到終於爭取到有資金注入喇,香港足總搞咗啲咩出嚟?當年嘅鳳凰計劃對香港足球實質有咩幫助?好老實講,我到而家都未見到。你要我夾硬講嘅,咪幫足總多咗啲職位囉,個架構睇落好健全,實質上對本地足球發展係一啲幫助都冇!」

他亦批評足總不重視青訓,「足總每年都希望香港足球嘅世界排名提升,簡直就係天方夜譚!香港足球若果連最基本嘅青訓都未搞好,根本冇資格同其他地方比較。足球技術係由細到大鍛鍊,美斯17歲同而家嘅美斯根本係冇分別,一樣咁樣過人、咁樣推波,只不過而家更加識得懂得控制比賽,經驗累積令到佢慢慢成長,先變成而家嘅足球傳奇。」他又指,香港足總如何運用政府投放的資源,球圈內的人並不清楚。

和哥致力培訓新一代香港年輕足球員,他曾擔任香港09教練,港隊門神葉鴻輝及曾外流印尼的林學曦,都是香港09的球員。2009年開始,和哥開始擔任中學足球校隊教練至今。他坦言,香港足球的沒落由青訓開始,「你要香港足球進步,就必須由青訓做起,所有有質素嘅職業足球員都係細個已經開始接受訓練,而唔係突然之間就會有個球星彈出嚟。」他又憶述自己踢青年軍時,球會有車馬費給予一眾青年軍成員作為酬勞,但現時以他所知,絕大部分球會都沒有任何酬勞給予青年軍,青年球員流失非常嚴重。

「你一個禮拜要人練幾日波,仲有一日比賽,但係咩酬勞都冇,甚至要自己貼錢出嚟搭車去踢波。家陣啲後生仔好多活動,要補習、要返學校補課準備DSE、學鋼琴......諸如此類。所以好多時候到佢哋唔夠時間用,佢哋屋企人要佢哋取捨嘅時候,第一樣選擇唔踢波囉!」

李健和認為,足總不重視青訓卻希望香港隊世界排名每年能提升,形容是天方夜譚。周滿鏗攝

雖然和哥很鼓勵青少年參加體育訓練,尤其是足球,認為可以訓練自律、團隊精神和人際關係,但他亦明白香港學生學業非常繁重,很多時候都會把體育放到最後,他見證無數中途放棄足球的例子。和哥想寄語喜歡踢波的青少年:

鍾意踢波就繼續踢啦,能夠將興趣成為職業係一件幸福嘅事,但當然亦都唔係一件容易嘅事,所以必須勤力,勤力練波,努力學習足球技術。而且,唔使擔心踢波搵唔到食,而家你做個職業足球員,份人工我擔保一定多過出面做個普通文員,你踢得越好,人工自然愈嚟愈高。總之,唔好太易放棄,因為如果你真係有天份,亦好鍾意足球,但因為其他考慮而唔踢波,真係好可惜。
球壇新星戴偉浚是李健和的愛徒。蘋果日報圖片

對於他的愛徙戴偉浚,兩年前因報稱受傷而拒絕港隊徵召,卻被發現到中國U21足球隊跟隨操練一段時間,遭大批網民抨擊,認為戴偉浚是假傷。和哥為愛徒護航:「佢本身嗰邊嘅聯賽踢得比較密啲,甚至係冇乜時間返香港。同埋香港隊徵召佢嘅時間,相信佢都有衡量過香港隊比賽嘅重要性有幾大,如果係世界盃外圍賽、亞洲盃嗰啲,佢可能會比較覺得重視啲囉!佢又喺外國,又要特登飛返嚟踢,所以職業足球員其實都係會取捨比賽重要性。」至於戴偉浚選擇踢香港隊還是中國隊,和哥坦言:「冇人控制到。」

效力過英超球隊狼隊U23的20歲戴偉浚,據聞已加盟將遞補踢中超的深圳佳兆業,更被球隊助教馬達洛尼指,有潛力成為中國國家隊未來希望。戴偉浚與和哥感情要好,由以前東方青年軍,到現在成為職業足球員,兩人一直有保持聯絡。和哥讚賞戴偉浚服從性高、勤力、天份優厚,尤其是傳波準確度特別高,有今日成就是實至名歸。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe