眾新聞 Logo
眾新聞 CitizenNews
眾說

正視聽:一隻手掌拍不響,攬炒係中共逼的


中共宣布硬推國安法, 當然又會有人出來話你地唔搞攬炒就乜事都冇云云。必須要正視聽。 一隻手掌拍不響,香港人推動攬炒係中共逼成,而最後用國安法實現真攬炒亦係中共決定,唔好blame the victim。

截圖來源:輔仁媒體

時間回到一年前,一百萬人上街,港苦唔聽,堅持硬推送中惡法,如果唔係有勇武派妨礙立法會開會,依家已經過咗,仲可能國際上乜反應都冇,因為當時外面根本未關注香港。跟住,在香港人面前係兩條路,繼續扮馬照跑舞照跳但其實係比佢溫水煮蛙,定擴大抗爭要五大訴求?

幾日後,二百萬人上街,民意好清楚,係要後者。咁點樣擴大抗爭呢?有人主張繼續勇武,但亦有人如我認為先用盡和平手段,如真議會抗爭,罷工罷市罷課,日常生活式抗爭(連儂牆、和你sing、黃色經濟圈),甚至國際戰線,先至用勇武。結果係各自爬山。

但係必須強調,以上的和平手段全部都係合法,全部都唔涉及任何暴動同裝修同破壞,議會過半可以否決預算案更係基本法寫明有的機制。

但中共唔理,議會過半佢唔比,國際戰線佢唔比,甚至黃色經濟圈去幫襯邊間舖頭佢都要管,兩辦換人直接干預,最後仲出埋國安法,正式撕破一國兩制基本法假面具。 咩國安法除暴根本晒氣,依家唔夠法例拉人告人咩?根本中共除咗乖乖瞓低被強姦係唔容許香港人有其他反應,唔容許香港人有任何反抗的念頭。

所以搞成今日田地,係中共一直唔願意妥協,唔係,都唔係叫佢妥協添啦,係中共唔願意遵守基本法,港人治港高度自治,比香港人有言論思想自由同普選所致。仲以為唔講攬炒中共就會聽你講?你係咪過去23年都盲咗聾咗?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe