眾新聞 Logo
眾新聞 CitizenNews
眾聞

要求正面製作港區國安法節目 將港台變國家宣傳機器?陳建強:點稱呼都無問題,責任上應該做


 

香港電台顧問委員會(顧委會)昨早召開首次工作小組會議。顧委會主席陳建強會後見記者,冀港台以正面及負責任的態度製作港版國安法的相關節目,但可以有反對意見。觀感上可會令人覺得顧委會要求港台唱好國安法,甚至成為「國家宣傳機器」?陳建強晚上回應眾新聞查詢表示:「我即刻答你,外界係無呢個睇法」、「咩叫國家宣傳機器?國家嘅法律,梗係要宣傳機器去宣傳,唔通搵個反宣傳機器,或者搵一個唔係機器嘅去宣傳咩?⋯⋯你話可以做宣傳嘅平台、宣傳嘅機器或者係任何報紙,你點樣稱呼佢都無問題,但係我覺得責任上係應該做嘅。」

被稱為「梁粉牙醫」的香港電台顧問委員會主席陳建強。港台照片

被稱為「梁粉牙醫」的顧委會主席陳建強早於去年11月提出成立工作小組,討論港台節目的編輯方針、質素及標準。今年4月港台收到通訊事務管理局對《左右紅藍綠》發出的嚴重警告,指煽動仇恨、歪曲事實;5月對《頭條新聞》發出的警告,指污衊及侮辱警方,顧委會遂決定昨日召開工作小組會議討論,廣播處長梁家榮亦有出席。

陳建強會後表示,向港台提出製作關於港區國安法的節目,並要清晰、精準、客觀。他指,由港台製作與國安法有關節目,跟港台管理層的想法是「不謀而合」。他指,所有委員也認同需要國安法相關節目,並不存在任何施壓。 陳表示,港台作為公共廣播機構及一個政府部門是責無旁貸,應該正面將國安法的背景、因由和細節向市民解釋清楚。陳建強認為,市民現在接受很多假新聞和假想法,希望這些節目能讓市民「唔好再有任何誤會」。

晚上接受眾新聞電話訪問時,陳建強重申《香港電台約章》列明港台的公共目的及使命,包括增加市民對「一國兩制」及其在香港實施情況的認識、提供讓市民了解社會和國家的節目,培養市民對公民及國民身分的認同感。

「而最新嘅情況,係一國兩制有新嘅法例在香港推動,呢個正正係最好嘅時候。與其香港電台,有社會聲音覺得佢係唔支持政府,甚至係反政府,呢個係好明顯嘅聲音咁講過。今天,既然處長亦都認同約章精神,我哋跟足約章,認同一個中國,講番呢個法例嘅背景、起因、所有嘅詳細情況,正正係約章賦予嘅責任。」陳建強續表示,節目可以提出反對意見。

5月28日,全國人大會議表決通過制定港版國安法的議案。美聯社圖片

被問到顧委會此說,觀感上令人覺得要求港台唱好國安法,甚至是成為國家宣傳機器。陳建強表示:「我即刻答你,外界係無呢個睇法,好多與會(昨早現場採訪)記者同我講,佢完全理解,亦都認同我哋嘅睇法。佢哋完全向我表達係支持嘅,呢個可能係貴報或者你個人嘅睇法。佢哋覺得係公道。」

「第二件事,咩叫國家宣傳機器呢?國家嘅法律,梗係要宣傳機器去宣傳啦,唔通搵個反宣傳機器,或者搵一個唔係機器嘅去宣傳咩?宣傳機器都係應該有嘅,港台係咪宣傳機器呢?港台係一個政府部門,亦都係公共廣播機構,香港係屬於中國人華共和國屬下嘅一個特別行政區。當然呢個我睇法,就算呢個公共廣播機構,淨係將事實講俾市民聽,你話可以做宣傳嘅平台、宣傳嘅機器或者係任何報紙,你點樣稱呼佢都無問題,但係我覺得責任上係應該做嘅。」

陳建強又在訪問中再三表示,希望可以「原汁原味」分享以下內容,主要是表達有港台員工及管理層感謝、支持顧委會,以及回應坊間一些意見:

「我一直以來希望用最大嘅誠意、最大嘅努力同埋最大嘅包容,去同我一班香港電台顧委會嘅委員,係去履行約章要我哋負責嘅工作。我亦都留意到,經過呢幾個月以來嘅工作,我非常高興同大家分享,有好多香港電台嘅同事,私底下向我表示,係感謝我哋一直以來,係全心全意為香港電台爭取到社會嘅支持,因為我哋一直以來都係本著約章嘅精神,去盡我哋嘅最大嘅努力同管理層溝通。

我哋嘅責任係向香港電台廣播處長(提供意見),我理解到員工有佢哋嘅睇法,我哋聽到,所以在工作小組嘅層面,我哋釋出最大善意,係用番顧問委員會一貫基本人數嘅要求,係去舉辦會議,以令到所有員工可以放心。我嘅善意同我哋嘅努力,係得到好多香港電台嘅記者同同事,向我直接感謝。在呢度,我係衷心感謝我哋同事對我哋嘅支持,知道我哋做,係為咗港台。除了前線員工之外,管理層亦都多番向我哋表明,明白我哋出心出意嘅因由,佢哋亦都係多謝嘅

如果各位在香港,大家都唔希望香港我哋呢個家繼續有太多嘅紛爭,因為已經足夠,在港台呢個地方係唔需要再有紛爭。我見到有人會講到,例如話我哋干預日常工作,又話要俾壓力廣播署長呀,亦都話我哋好多嘢倒退。其實我好希望,作呢啲評論嘅朋友,希望佢撫心自問,佢如果係理解到約章賦給我哋嘅工作,佢就明白,我哋係跟足入面每一項、每一字、每一句去做嘅,我睇唔到或者感受唔到,我哋任何委員有任何理由。

仲有,佢(有人)話呢個工作小組應該有前線員工參與,個訴求我哋都睇到,但係我哋睇過約章,我哋發覺係,約章裡面員工嘅位置係無清晰寫出來,若果我哋將員工擺落去,亦都唔係當日約章嘅三個支柱,包括當日嘅廣管局,即係而家嘅通訊事務管理局,或者香港電台,或者商務及經濟發展局,呢三個支柱,佢哋嘅委任,剩係我哋呢個委員會做,無話第二啲人,所以我覺得如果要佢哋(員工)非正式嘅見面,當然好歡迎,日日在港台都見到,但在會議上面咁樣做,我哋應該係違反了約章嘅精神。所以,我好希望所有朋友作任何評論或者評價之前,希望佢熟讀約章嘅精神所在。

呢方面,我哋希望佢哋睇到我哋13個委員,點解一直以來,我哋代表社會上唔同光譜、唔同職業、唔同背景嘅人,我哋全部都係一致決定,我哋一定係有理由先咁做。全部都係成年人,在社會上有自己嘅工作、有自己嘅崗位,我哋做嘅工作一定係跟隨約章,亦都希望第二啲朋友,在外面有任何批評或者意見,希望佢建基於約章。

呢方面係我衷心嘅呼籲,因為更加多嘅爭拗、更多唔同嘅講法,只會令到香港電台唔能夠向前行,呢個係我好誠心嘅希望,希望各位朋友俾啲時間我哋,睇到我哋工作,就知道我哋係跟隨約章。我哋無一刻係俾壓力廣播處長、無一刻係干預緊每一日嘅工作、每一個節目我哋無提到裡面係邊個做、點樣拍,你問我人事上,我話不在我工作範圍內,政治上嘅評價,不在我工作範圍內。

相關報道:顧委會倡正面製作港區國安法節目 工會:集中講利處恐違約章 港台:訪問不同光譜意見




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe