國泰航空（293）周二公布390億元資本重組計劃，當中包括特區政府以273億元入股及貸款即時援助。國泰空中服務員工會主席王思敏指，工會暫時不會罷工反對政府注資，員工首要擔心是無薪假和公司會否裁員的問題。
國泰空中服務員工會主席王思敏接受眾新聞查詢時表示，工會對政府入股的做法無意見，「全球好多航空公司喺疫情下都有政府支援，所以都應該合理，政府都會出手救番啲航空公司，係好多地方嘅趨勢，德國都喺咁。」
有意見認為，政府向國泰「揼水」加上有權派2名觀察員加入董事局，恐怕會染紅。王思敏表示不擔心，「因為今次係一個類似貸款形式，國泰需要還錢，觀察員加入亦係合理，佢畀咁多錢入嚟國泰，其實喺咪都需要派兩個人入嚟睇住呢200幾億點用？唔可以話畀完錢你完全唔理，我覺得去到呢度都係合理，同埋佢只不過係觀察員，至於佢喺裏面實際作用暫時都未知，好難呢一刻評論佢喺裏面會做啲乜嘢。」
記者訪問前國泰工會主席關笑華，她不滿政府入股國泰不滿，更形容2名觀察員為黨委書記。王思敏說：「她離開9年，可能佢未必好清楚而家真實情況，大家比較關注嘅係自己能唔能夠留得住份工，可能暫時關注咗呢樣先，其他嘅嘢起碼secure咗自己份工先再諗。」
被問到會否擔心政府注資後，對工會日後行動有所影響，或造成更大的白色恐佈。王思敏指，工會以往所發起的活動都是合法，亦是圍繞勞資關係的問題，所以不會擔心。她說，自從去年反修例事件中，公司解僱前港龍航空空勤人員協會主席施安娜等人，已開始存在白色恐佈，員工已小心到盡，所以不會擔心再有什麼其他事，保護工夫一直在做，現時在社交平台都不會用真實姓名。
相關報道：政府注資國泰有權任命觀察員 前工會主席、「空姐長毛」關笑華：如安插黨委書記
王思敏強調，現時員工首要擔心的問題，是無薪假和公司會否裁員，而不是擔心白色恐怖或政府加入，工會不會發起罷工行動，反對政府注資。「喺工會同事當中，好大部份都唔喺本地人，對於政治環境或者國安法都唔係好了解，所以我哋都要照顧嗰一批人，唔可以淨係話有啲人好關注國安法，就要做一系列嘅嘢去罷工表達政治訴求。如果全部人暫時方向未到一致嘅時候，罷工行動暫時唔做住，會關注大家最關心嘅問題，就係無薪假同埋裁員；反唔反對政府，唔係呢個時候。」對於公司獲政府注資，但最基本連不裁員都未能承諾，王思敏對此感到失望。
現時國泰有1萬多名機艙服務員，當中約三成不是本地人，其中約7500人加入工會。王思敏指：「有3000幾個機艙服務員唔係本地人，佢哋分別嚟自菲律賓、印度、日本、韓國、台灣等地，所以要同佢哋表達而家嘅政治環境，係比較有難度，佢哋都有打電話或者send email同我哋講佢哋關注嘅事，暫時未收過有人話唔贊成政府入股。外界諗嘅關注，同我哋真正面對嘅唔同。」
被問到美國日前曾一度宣布會限制國航入境，會否擔心外國也對國泰設限。王思敏說不擔心：「措施已經取消咗，我諗外國一路好清楚香港定位，尤其係航空公司而家主要股權仍然喺太古，大家都會清楚，所以唔擔心。」
