眾新聞 Logo
眾新聞 CitizenNews
眾聞

梁凌杰逝世一周年 梁爸爸錄音談話 要求死因研訊為子討公道


梁凌杰父親錄音談話:

 

明天是梁凌杰逝世一周年,他被視為反送中運動裡首名犧牲生命的抗爭者。今天,眾新聞收到梁爸爸的一段錄音,透露他在過去一年未有放棄為杰仔取回公道:「希望知道杰仔當天有沒有得到應有嘅協助,有無遇到不公平、不公義、不為人知嘅冷待,正如呢一年警方冷待對我哋一樣。我哋希望有個死因研訊要求。面對政權百般阻撓,我哋束手無策,但我哋唔會放棄。」
 
錄音全文:
 
2019年6月15日,係我屋企人、同香港、同好多人感到十分傷心嘅一天。我哋從不同媒體都知道大家無忘記我個仔,心情十分複雜。過去一年,呢一年發生好多事,亦改變好多人。呢一年,我哋屋企人過得唔容易,受到唔同嘅壓力。每一日我哋都嘗試找安穩、平靜嘅生活,依家總算安好,同埋接受杰仔嘅離開……但係我都……為香港、同所有香港人一樣,唔能夠擁有免於恐懼(嘅)自由,感到悲痛、悲哀。
 
杰仔離開,但我哋作為人父母,思念一啲都無減退,同時為佢嘅崇高理念而自豪。呢一年,每個香港人都應該同我哋(一樣)過得唔容易。但呢個政權越嚟越腐敗,我相信好多香港人對呢個政權唔抱有任何希望。
 
我同屋企人見到好多年輕人喺呢一年裏面,同杰仔一樣抱住單純的理念走出嚟,但係不停受到打壓,甚至受傷、流血、犧牲。我哋為人父母嘅,睇住啲年輕人,感到好心痛同擔心,亦唔希望更多年輕人好似杰仔一樣,為呢個無希望嘅政權而受傷。我哋同一年前一樣,希望年輕人好好保護自己,留住有用嘅身軀,行得更遠。嚟緊一年會更加黑暗,唔可以再同佢硬碰,否則只會悲劇再重演。
 
黎明(前)係最黑暗嘅,但我哋相信以香港人嘅能耐,我哋會搵到出路,再難捱都堅持捱落去。
 
杰仔嘅離去,我哋仍然希望為佢取回一個公道。死者已矣,我哋家庭亦唔會完整,我哋只係希望十分簡單,希望知道杰仔當天有沒有得到應有嘅協助,有無遇到不公平、不公義、不為人知嘅冷待,正如呢一年警方冷待對我哋一樣。我哋希望有個死因研訊要求。
 
面對政權百般阻撓,我哋束手無策,但我哋唔會放棄,亦將呢件事交俾律師處理,由律師繼續爭取。我哋想講好多嘢,但可以講說話嘅空間十分有限,我將呢件事全程交俾律師處理,再有任何問題,我哋會交俾律師代我哋回答。
 
最後,好感謝香港年青人為香港爭取民主、人權、自由、法治,而犧牲嘅努力。
 
願榮光歸香港。願主保祐。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe