眾新聞 Logo
眾新聞 CitizenNews
眾說

「反送中抗爭」一週年感言


呢個facebook專頁喺兩年前開始嘅時候,係好少講政治嘅,皆因我都想集中喺推廣精神健康嘅工作,引起多啲關注。最終嘅目的,是社會各方增加對復元人士嘅理解,減少標籤同歧視。

不過,由舊年開始香港嘅形勢急轉直下,高壓嘅政治同社會氛圍,尤其是當權者對言論的箝制同強力打壓,再加埋完全零制衡的警暴,好明顯已影響到整成個社會嘅精神健康,即將實行嘅《國安法》,勢將進一步加劇社會嘅白色恐怖,到其時「人人頭上有一把刀」,隨時因為個人言論動輒得咎。事到如今,港難當前亦唔輪到我唔出聲。

當然,今時今日嘅香港,只要你公開批評當權者或警察,自然會引來五毛嘅挑釁,又或者有人已經在背後投訴你,呢D都係,可以預見嘅事。

2020.6.9,反送中運動一周年,沒有百萬人遊行,但仍冒著被捕被檢控風險上街的市民,意志更堅決。EYEPRESS照片

最近,facebook 在沒有任何預告同解釋之下,突然取消我在專頁推廣帖子嘅權限,令我嘅文字更難接觸到一些新朋友,開拓新嘅讀者源。我唔知facebook呢個決定,同我之前嗰D批評當權者加警察嘅言論有無關;我只係想講,自己仍然會繼續「是其是、非其非」,我手寫我心,講自己想講嘅話。

當然,我也希望大家明白,精神健康是眾人的事:無分貧富貴賤、更無分政治立場、文化同政治水平,人人都有機會中招。 所以,喺自己前線嘅社會工作上,即使遇到親建制甚或仇視示威者嘅復元人士,我仍然會盡心盡力提供支援,理解他們嘅內心掙扎,與他們同行復元路。事實上,這個亦是我哋作為社工應有的專業操守,否則,我們同宜家政府同執法者嘅徇私枉法,並沒有任何分別。

講到尾,最衰嘅始終是掌握權力那一班人,縱容一班「癲狗」到處作惡,將香港推向災難的深淵。

最後,在此希望大家可協助我向各方好友推廣這專頁,讓更多人認識精神健康。我唔知喺不久嘅將來,呢個專頁可否繼續存在,但只要仲有得寫,我仍然會堅持下去。

寫在2020年6月9日
港難一週年
《壹元坊》專頁版主

本專欄逢星期三更新。如想了解更多有關精神健康的故事或資訊,歡迎到壹元坊面書專頁瀏覽 。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe