眾新聞 Logo
眾新聞 CitizenNews
眾聞

英華仔感謝校長鄭鈞傑:他曾到警署探望被捕同學,從來唔打壓、唔係一言堂


 

數十名英華書院學生,本周一小息在操場唱政治歌喊港獨口號,悼念梁凌杰逝世一周年,教育局其後要求學校嚴肅跟進。事隔幾天,英華書院校長鄭鈞傑昨日向家長及學生發信,指因個人理由已向校方請辭,請辭原因與學生校內政治行為無關,任期至2021年8月31日。事件背後有否牽涉政治壓力,外人無從得知,但有英華學生認為,校長離開或是受到打壓。

有201年歷史的九龍區著名男校英華書院,名人輩出,包括:許冠傑、梁錦松、胡國興、蘇慶和、吳錫輝、王宗堯等。校長鄭鈞傑也是舊生,1988年中五畢業,中文大學理學士畢業後就讀一年教育文憑,之後回到母校工作至今27年。

兩名英華書院中五生、「英華本土」成員Morty(化名)和Rick(化名)向校長道出心底話。胡尚佑攝

校長鄭鈞傑明年離任,兩名就讀中五的「英華本土」成員Morty(化名)和Rick(化名)接受眾新聞訪問,先向校長道出心底話。
 
在紛亂的社會下,Morty希望校長離任後,可以有一個平安和自由的人生:「希望佢平安,唔知你有冇見過藍絲嗰張文宣,校長個全名同個樣都畀人登咗係『黃校榜』第一位。喺呢個咁荒誕嘅時代,唔知道佢人身安全或者未來自由,會唔會逐步有危險。我純粹企喺一個學生角度出發,我好想佢平安過到自己想過嘅生活。喺而家嘅香港,佢曾經作為一個出過名、畀梁振英點過名嘅人,平平凡凡過自己嘅人生,都唔係一件容易嘅事。相信佢都係想同屋企人共聚天倫,過埋自己下半世。但要知道而家呢樣嘢喺香港唔係簡單,唔係咁容易。」
 
Rick說,在這個年代,做一個有骨氣正常的校長都很辛苦:「辛苦佢,真係好多謝佢,呢一年好多事務都要佢親自處理,佢會特登出去照顧同學,同我哋去傾,同埋關心我哋。呢啲事都睇得出佢好用心去關懷我哋,好多謝佢咁耐以來為呢間學校服務。佢做老師加校長,喺呢間學校服務咗27年,真係鞠躬盡瘁。」Rick昨天離開學校前,特意親身向校長說了一聲「多謝」。

對於校長離開背後有否涉及政治壓力,兩人持不同意見。Rick認為:「政治打壓屢見不鮮,唔會話唔相信校長說法,但自己就好懷疑,如果話因為受到打壓而落台,自己都唔會話surprise。因為我哋由上年9月開始已經有好多行動,呢啲行動喺中學迴響嚟講都算幾大,又上咗報紙。會唔會嗰陣時已經有人俾過壓力校長要佢落台,令到佢有呢個決定?希望佢係真係因為自己原因,如果唔係呢個原因,自己都唔會好驚訝,所以唔係咁堅信。」

Morty就相信校長說法:「佢今朝已經好詳細講咗,好早之前屋企人已經舉家話要去加拿大住,佢加拿大屋企人年事已高,自己亦都知道佢4年前有心臟問題,做過通波仔手術,身體唔好。加上佢做老師加埋校長差唔多27年,覺得係時候將自己人生交畀家庭,我覺得真係時間咁啱撞正615(悼念梁凌杰事件)。」

英華書院去年200周年校慶,許冠傑作了一首主題曲 《天地人》送給母校。校長鄭鈞傑有在片段出現:

兩人作為「英華本土」成員,過去一年在學校舉辦過不同的活動,有罷課、亦有小息叫口號等。二人坦言,校方從來不會用打壓方式處理:「大部份行動校方都唔會唔做嘢,有時候我哋嗌口號或者唱歌,佢哋都會有啲勸阻或者勸退嘅行動。但佢哋更加明白,佢哋除咗有責任勸阻我哋之外,如果要強硬進行某啲嘢阻止我哋,佢哋都阻止唔到。政治中立呢一方面,作為教育機構,佢哋有盡到佢哋責任,同時佢哋亦都有顧及我哋嘅訴求同意願。」

他們眼中的英華書院,一直以學生為本:「好多學校校長唔會問咁多,直接記大過,去打壓學生。但我哋學校校長會以學生為本,會嘗試理解我哋點諗,然之後會畀相應建議同埋諗法我哋,點樣去表達自己訴求同時又能夠合法、符合效益、保障自己人身安全,因為佢擔心我哋學生嘅人身安全。」
 
Rick說:「記得佢有講過,好想我哋關注組嘅人全部都讀到大學,覺得我哋要好好裝備好自己,第時貢獻好社會,佢話我哋既然有改變社會嘅決心,就好想我哋讀到大學,到時就可以用知識改變呢個社會。」

但Rick感到唏噓,在現今畸形社會下,有人或會對校長這番說話驚訝:「有人會期望個校長覺得自己學生唔應該讀大學,即係覺得暴徒唔好讀大學,唔好讀大學搞亂香港,仲讀呢啲曱甴大學搞亂香港。呢啲想法,就係喺畸形社會底下衍生出嚟。正常有咩學校校長唔愛自己學生、唔係想自己每個學生都有大學讀、作育英才,之後培訓學生作為社會上嘅賢達。但反而啲人會覺得驚訝,反映緊社會真係好有問題。」

校長鄭鈞傑畢業於英華書院,大學畢業後回到母校教書至今。英華書院創校200年校慶FB圖片

回想過去校長點點滴滴,Rick形容校長一直以來十分親和:「佢會同學生打成一片,有陣時小息會見到佢喺樓下同我哋傾偈,停課之前嘅lunch time佢都會特登去飯堂食飯,會同學生傾偈。又例如我哋學校之前有啲外地交流團,佢都會隨團,同啲學生影相同埋玩,同我哋打成一片。唔係嗰啲一言堂嘅校長。」

但其實在去年年尾,他們與校方的關係曾一度變僵,Rick直言:「去年10月左右,有部份同學喺校園反修例活動中帶咗頭盔或者豬嘴,學校試過沒收我哋啲裝備,或者喺活動入面唔畀我哋拍攝。」 他形容,當時實際情況是:「嗰一日有同學拍攝活動情況,當時有老師拖佢埋一邊, 叫佢delete條片,同佢講以後唔好再拍攝校園抗爭嘅片段。」

兩人當時均認為校方做法不合理:「所以你話,呢間學校係咪唔理我哋,咩都畀我哋做?又唔係咁嘅,始終都會做一啲我哋認為係唔啱嘅行為,面對着佢哋做呢啲行為,我哋有自己反應,有包圍教員室,逼學校妥協。」
 
當時關注組發起包圍教員室行動,最後校方願意參與由關注組舉辦的公開對談會,最後校方有承諾學生,可以自行判斷因健康理由佩戴任何款式和質料的純色口罩,校方亦批准。關注組事先申請的學生攝影師,使用正式攝影機進行攝錄,並可將拍攝公開。

Rick認為,這件事正正反映校方比起一般其他學校,的確會聆聽學生意見及回應。他們都感謝校方彈性處理,在原有校規上就社會變化作特別安排。

訪問中,Rick提到整年反修例運動中,學校有近20名學生被捕。此時Morty打斷他的話,提到校長曾以行動方式親自關心學生:「嗰時校長好擔心啲學生, 有同學被捕,佢會特登去警署,有幾晚佢仲好似通宵走幾間警署,照顧唔同同學。」
 
Rick說,社會上有聲音怪責校長:「而家大家會覺得點解有人出去示威畀人拉,個校長會去睇佢咁奇怪。呢種氣氛好明顯好畸形。啲人會話有冇搞錯呀,呢個校長仲會去保釋曱甴。」Rick慨嘆道。

本周一的校內悼念活動之後,前特首梁振英在facebook貼文促學校徹查、嚴懲、開除帶頭學生的學籍。Rick說:「胡說八道!我哋英華嘅嘢邊度由得佢一個外人去干預。你咪開除晒佢哋囉,開除得一個,開除唔到第二個,我哋之前有成300個人罷課,你都係想香港冇咗一代年輕人啫。」

早前教育局向全港中小學發信,要求校方不應讓學生和老師參加罷課或校內政治活動。Rick認為,教育局做法只是想粉飾太平:「唔係你叫我哋唱國歌我哋就會愛中國;唔係你唔畀我哋嗌口號,我哋就會停止做我哋想做嘅嘢。無論係香港獨立又好,反抗暴政又好,呢啲種子一早埋咗喺我哋呢一代心入面,唔係一句唔做得,就咩都唔做。」
 
Morty認為,教育局的做法只會引來更加強烈的反抗:「教育局的指令係更強硬嘅打壓,官逼民反。作用力度有幾大,反對的力量就會幾大,唔將政治帶入校園,係好多個月提出的說法,呢次係直接將一個言論變成指令,喺中學執行。呢個強烈嘅打壓只會令到我哋有更加強烈嘅反抗。」
 
校長明年離任,二人下年畢業,Rick擔心屆時學校的風氣或會有所改變:「係有擔心嘅,擔心我哋啲師弟表達自由會唔會進一步收窄。」Rick認為,這個會是可遇見的未來。

面對未知的未來, Rick希望未來英華校長,可以秉持一貫傳統。胡尚佑攝

面對未知的未來, Rick希望未來英華的校長可以秉持一貫傳統:「撇除校長更替,根本我哋每一分每一秒表達嘅自由,都係慢慢收窄,加上如果換咗一個高壓式統治,唔理學生意見,一下就要判學生死刑嘅校長,好自然地英華可以喺校園有自己思考嘅機會都會越來越少。我好希望校董會,會搵一個適合英華,秉持一貫傳統嘅校長,頂替佢呢個位,因為做我哋校長唔容易。」

為何做英華校長不容易?Rick堅定地說:「因為我哋學生有反抗意志,有自由意志!」

英華書院去年200周年校慶,許冠傑作了一首主題曲 《天地人》送給母校,其中一句歌詞是:「就算看不清我一生,亦要對得起我天地人!」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe