眾新聞 Logo
眾新聞 CitizenNews
眾聞

《頭條新聞》或於網台再現? 曾志豪:冇可能代替它在港台的意義


 

捲入政治風眼的香港電台節目《頭條新聞》,昨晚播出本季最後一集。至於節目會否復播,仍是未知之數。昨晚有特備環節,三位主持曾志豪、吳志森及羅啟新,換上經典角色戲服,一起觀賞最後一集《頭條》。森爺(吳志森)拍一下手,浩浩蕩蕩地踏進化粧間:「嚟啦嚟啦,最後一次啦!」他這位太后在化妝時,突然瞪大眼睛:「係喎,不如拎埋嗰兩箱首飾返屋企先!」工作人員紛紛取笑他,經常把「萬般帶不走 」掛在口邊,卻終究還是捨不得。

工作人員為森爺(吳志森)化上太后妝。(黎卓欣攝)

最後一集播出前兩小時,眾新聞記者與「小豪子」曾志豪傾談。或者是最後一次,他以《頭條新聞》主持身份踏入化粧間,曾志豪與工作人員一一道別,笑說:「希望以後都仲有機會黐下化妝、黐下set頭啦!」

諷刺時政、被視為言論自由象徵的《頭條新聞》,近日成為社會焦點。曾志豪這幾日接下大量訪問,臉上有點疲態:「但係好感恩,咁多媒體著緊呢件事,咁關注港台嘅命運。否則一個31年嘅老節目,就會無聲無息咁消失。」

他緩緩打開手中的紙盒,裡面裝著一隻「小豪子」毛冷公仔,甚為精緻:「唔止係媒體,我仲要好多謝愛戴我哋嘅香港市民,有人仲專登織咗冷公仔俾我同森爺,非常有心。」31年的老節目年復年播放,曾志豪說,年紀大的觀眾早已當《頭條》是生活的一部分。

他又從袋中掏出兩個觀眾送的黃頭盔鑰匙扣:「呢班觀眾唔係當我哋係明星,而係覺得我哋好似屋企人、朋友咁,好想俾啲支持我哋。」

曾志豪說,為了報答觀眾31年來的支持,《頭條》今集特設直播「和你傾」環節,希望能把握最後機會,由「小豪子」、「太后」及「林班長」,與支持者互動交流及作最後的道別。

觀眾送給「小豪子」的毛冷公仔。(黎卓欣攝)
觀眾送給曾志豪的兩個黃頭盔鑰匙扣。(黎卓欣攝)

終於迎來或者是最後一次的《頭條》,曾志豪嘆道:「唉,誰會珍惜,當你還擁有?」他引用《阿信的故事》一曲的歌詞,苦笑道:「當每個禮拜,每一年都有,你又點會覺得係咁珍貴㗎呢?」

《頭條》以往每季播出後,都會有段休息時間。但今次停播後,無人知道是暫別還是永別。曾志豪直言他其實並不樂觀:「我好似一個等待正式宣判嘅病人,自己仲有求生意志,但身邊嘅人都勸喻你要放棄治療。無人話你要停,亦無人話可以繼續做,但我已經預計自己返唔到嚟,之前答記者答得好樂觀,其實係唔想自己太sad。」

他昨晚做直播時,桌上刻意放了觀眾贈送的毛冷公仔,是要告訴當權者,《頭條新聞》是有充足民意支持的節目,希望這位「病人」有機會康復:「你點同呢班觀眾交代呢?係咪面對合佢心意嘅投訴就聽,唔啱佢心水嘅民意,就當係一隻擺設公仔?」

頭條新聞背後的人

工作人員為三位主持人(左起:曾志豪、吳志森、羅啟新)及監製送上花束。(黎卓欣攝)

臨別依依,直播結尾,工作人員為三位主持人及監製送上花束,曾志豪又向工作人員獻花,節目完結後拍了近半小時「畢業照」。他坦言,離開《頭條》,捨不得的除了觀眾,還有這群並肩作戰多年的工作團隊。

曾志豪形容,與監製共事是「有傾有講」,即使要修改對白,亦會先徵詢他意見。「我同三個監製合作過,但換來換去你都感覺到佢哋係有火,成個團隊上上下下都係攞個心出嚟做嘢。就算你好遲先交到份稿,馬上就要佢準備道具,永遠都係即刻搏命幫你搵。例如講國安法嗰集嘅鐵籠、今集太后嘅雕像,可行嘅,佢都會盡量幫你安排。」

被問到他覺得最大膽、最踩界的演出是哪一集,他思索了半分鐘,卻反問記者甚麼才是政權的界線:「我唔知咩叫踩界,因為嗰條界永遠都喺度郁嚟郁去。以前我哋覺得無界線,2008年我哋試過喺台灣總統選舉造勢大會嗰度做直播,有人可能嗌咗句『台灣是一個國家』。嗰時個社會係好寬鬆,無人會投訴,但當國安法嚟咗,再做已經變咗踩界。」

他說,或者他們早已踩了一條刻劃於未來的界。

「小豪子」自己最喜歡又是哪一集?他笑言:「咁多集唔記得啦!但而家望番轉頭,最精警嘅就係2012年嗰集『廿年後的黃之鋒』,預言洗腦教育成真。仲有最近嗰集,講一國兩制可能只係曼德拉效應,連工作人員都讚話好。」

網上再續《頭條》?

戲服不可帶回家留念,留下的只有一輯輯照片,正如森爺所說「萬般帶不走」,曾志豪會否覺得有點可惜,又會否在網上再續《頭條》?

他透露,有個別機構曾與他洽談,但仍在初步構想階段。他笑言,如果將節目放上網,或者是為了維生,多於為了延續《頭條》的精神意義。

冇可能代替到喺香港電台呢個公營機構做嘅意義,你用緊嘅係公帑,再喺主流媒體講政府唔鍾意嘅嘢,呢個先係大家喜愛《頭條新聞》嘅原因。唔係潑冷水但都要同大家講定先,就算喺網台重開,可能感覺已經唔同咗。

還有,團隊已不再一樣:「成個節目,並唔係得我哋幾個主持人,背後其實有一個好龐大嘅團隊,無咗佢哋,就已經唔係昔日嘅《頭條新聞》。」

 




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe