眾新聞 Logo
眾新聞 CitizenNews
眾說

再談國安法


首先講宏觀國際形勢。自中共宣布將直接頒布國安法以來,國際社會強烈反彈,尤其美國威脅不惜發動制裁,儘管後者未有細則,但明顯已出乎中共意料,要立即派楊潔篪去見蓬佩奧,人大常委「等埋篪哥」 在見面完結後先公布國安法,而且似乎有稍微為國安法降溫,如冇咗不許外籍法官審,冇直接提送中,強調大陸國安只會在極少數情形下行動等。站在一個香港的評論員,立法後可能成為對象,以及考慮未來不知幾多香港年輕人可能會遭毒手的角度看,當然少辣比激辛好,但外國唔會咁樣逐條睇。

楊潔篪飛到去夏威夷見蓬佩奧。人大常委都要「等埋篪哥」 見面完,先公布國安法說明。

在美國而言,現在同中國係打緊「霸權戰」或曰「新冷戰」,香港國安法只係開戰名義,並非最主要動機,總之有國安法就鋤得入你,唔會同你逐條辯論,所以肥蓬也下馬威選在美軍基地見面咁串。中共大概也知不妙,但國安法已公告天下騎虎難下,無法撤回,唔會傾得埋欄,唯有低調處理。筆者綜合親中派講法估計,法例通過後初期,首要目標是立法會選舉DQ本土派,之後會是支聯會、眾志、蘋果等眼中釘,暫時不會大規模搜捕一般市民。但50年不變也不斷變型走樣,一般市民都是謀定後路較好。

接下來有三個戰場要看。一是國安法生效後實施情況如何,會否立即拉人封艇。二是美國會否有制裁措施出台。如兩邊都沉靜化,可能是會談中已談過的下台階。但第三個難避開的是立法會選舉會否DQ,因為這明顯是中共急於立法的考慮之一,肥蓬也講明選舉能否公平進行是重要指標,國際社會連歐盟都話密切關注。這一件事上應該就能見到雙方的真章了。所以無論初選或真選,民主派、抗爭派、本土派或你叫咩派都好,都應該積極參與。反正香港已經無法避過中美開戰了,做好自己,跟住睇佢地點發揮囉。

接下來講回國安法內容。最直接侵犯一國兩制和高度自治的明顯是安插國安顧問入港府和國安來港執法,指派法官也明顯違反司法獨立,基本上一國兩制正式喪屍化,變成沒有靈魂的軀殼了,仲要係連外觀都在腐爛果隻。當然香港人都知中聯辦早就成為港府太上皇,但差別在過去中聯辦也唔會坐入去同港府開會,也唔會有明確的行動權力,現在是明目張膽和制度化。外國已無法再呃自己中共沒有干預香港。

以往中聯辦干預香港還隱隱敝敝,現在國家法就擺明車馬登堂入室。EYEPRESS照片

至於什麼大陸國安也受香港法律監管,又話大陸國安不受基本法約束,想點?什麼基本法和國際公約保障人權自由云云,邊個知會唔會被國安法凌駕?大陸公安在特殊情況下有管轄權,呢個權有多大?會否有執法行動?會否有送中?咩情況叫特殊?前律政司司長白髮魔女話可能涉及疆獨藏獨、國際問題香港法官不懂處理。咩叫涉及國際問題咪又係佢講?何況司法系統從來唔要求法官係專家,因為可以傳召專家上庭解釋,難道有爆炸品案就需要法官是化學博士先會審?特首又如何判斷一位法官係疆獨藏獨、國際問題專家而指派去審案?係咪要委任沈大師去審?但我驚佢都犯咗法囉。

白髮魔女又話,特殊情況可能包括主要官員叛國。如是,恐怕國安法的主要目標不單是民主派,仲包括親中派同公務員。國安法講明針對公職人員,加上近期孽得權局長不斷出招,最新又話可能全部公務員同公職人員都要宣誓,咁會否佢地有任何動作係唔跟指示的就可能被指是搞港獨、顛覆國家? DQ主任不肯DQ會否也是違反宣誓效忠、觸犯國安法?出任公職的親中派被大清洗,要求絕對忠誠,也是遲早的事。所以親中派自求多福罷。仲有黃絲公務員睇路呀。

又有親中派話,唔會以言入罪,要有實際行動才算,但言論和行動的界線可以好模糊。在遊行時喊天滅中共算不算顛覆國家行動?評論員在接受外媒訪問時談支爆算不算顛覆國家或勾結外國勢力?支聯會搞六四晚會?開個黃絲fb page鬧政府?記者報道或學者研究觸碰國家機密?一群人唱榮光?掛時代革命banner?開黃店?綁絲帶?獅子山掛直幡?茶餐廳一檯人習總前習總後吹水?邊個知言論同行動的界線在邊?

當然,they can't kill us all,但總會有人被捉,殺雞儆猴。只能希望小事真的不會送中,因為一的返去基本上等於人間蒸發。律師見唔到,家屬見唔到,記者見唔到,議員見唔到,外國使館見唔到…基本上死咗都冇人知。同埋一的返大陸,人在佢手,即刻生安白造改控你任何其他嘢,判你勞改、集中營、死刑,或者唔告你但無限期扣留你,或者期滿都唔比返香港,困係唔知邊度…冇被的返大陸,至少發生咩事、有得活著出返嚟的機會係大的。

香港人而家最緊要係留返條命仔,唔好死先,放長雙眼睇。

我始終覺得人命最重要,確保手足唔好死先。同埋因為我相信外國係唔會收貨。依家成件事發展得太快,國際反應係需要時間,但我相信早晚中共包圍網係會完成同對中共發動攻擊。香港人依家係要同中共鬥長命,等到國際將中共打lum,所以香港人最緊要係留返條命仔先,唔好死先。至於有人話逐條分析條文有咩用,中共會守法咩。咁講的話冇國安法中共都一樣可以的人返大陸啦,好似肖建華同銅鑼灣書店。所以我覺得中共依家堅持要立法,都係顯示佢係覺得自己做事要有法律基礎,條法係會對佢形成一定局限的,不過遲早會變形走樣。總之眼下要堅持到底,寸土必爭,唔好死先。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe