眾新聞 Logo
眾新聞 CitizenNews
眾說

沒有最核突只有更核突的香港精英


一句「感謝主!」香港上一代精英的核突程度每每超越人想像,教年輕人怎能不睇唔起上一代。唔只阿感謝主,成班都係,明明唔慌等錢洗,仲要自閹做太監,日日滿口謊言為政權塗脂抹粉,例如習頭曾、三耳家奴、澳洲楊、僭建驊、劏房波、湯十一、 港英珠、白髮魔女、陳自私……群魔亂舞,不能盡錄。點解香港地可以咁多閹人,真係匪夷所思。係為錢?為權?定太享受被閹不能自拔?人比人比死人,難怪有人當陳太係聖女。真係,香港有幾多上一代係可以做年輕人role model?

班閹人唱好老闆就算啦,偏偏又要貞節牌坊,鐘意站在道德高地訓話人,叫你唔好破壞要理性討論云云,但佢哋自己就最鐘意破壞制度,警察日日喺度殘害市民唔出聲, 國安法徹底破壞一國兩制同司法制度唔出聲,丫都唔係係舉腳贊成添,而所謂理性討論就係都唔知國安法有咩內容就支持咗先,同埋話唔會有影響,美國佬不自量力,香港金融中心地位係憲法規定……都唔知可笑定可悲,咁多沒有靈魂只有軀殼的喪屍喺度畫皮扮人,活在謊言中,跟住年輕人拒絕謊言講真話好似係錯咁。

另一樣班閹人又鐘意嘅,係扮性能力高超,個個講到自己天才,做生意必定發達咁。如果係呀,點解咁多年來香港都冇幾個新富豪,冇幾間國際知名大企業,恆指成分股仲越來越少香港公司?又話大陸好多機遇?但佢哋越撈越縮嘅?咪就其實佢哋係靠裙帶資本主義,所以一離開comfort zone就乜都做唔到囉。好簡單,成班講到自己曉飛咁,做咩冇人跳出嚟話可以救海水公園?仲有,考第一之嘛,我冇試過咩,不過我都出社會啦仲提中學嘅事做咩,更何況年屆花甲仲要攞小學第一出嚟講?

講開又講,雖則我都做過記者,都知有時點都要訪問幾個人充時間/篇幅, 但我真係唔知訪問呢班冇睇過條文就也文也武的人有咩意義,成班連車公解籤佬都不如。雖然都係吹水,解籤佬都叫有個籤文睇住丫,班喪屍乜都未睇過就係度隨口噏,你話係咪衰過解籤佬。真係自己攞嚟賤,搵到錢有車有樓戴名錶著靚西裝又點,嗰啲所謂社會地位只係同溫層圍威喂,出面冇人會睇得起你哋。

事實上,喺呢方面中共同年輕人係connect的,佢哋同樣睇唔起呢班奴才,今次國安法唔比佢哋睇條文就要盲撐,就係最佳例子,中共根本費事理你班香港精英點諗,當你係狗叫你咬誰就咬誰。又一個例子,見佢哋的京官好似越來越少,越來越低級,仲越來越多單方面訓話。亂港派有得同彭斯、佩婆婆談笑風生,你班親中派幾時試過同你領導談笑風生?邊有人會同自己隻狗談笑風生?……好似都有,所以親中派比狗更不如。呀,諗到,應該冇人會同自己嘅condom談笑風生卦?

比人睇唔起都係自招,皆因佢哋作賤自己在先,大陸一個九品芝麻官都當皇帝咁拜, 更高級的自然更唔當你係一回事。真㗎喎,中聯辦一個咩副主任小部長出來行一轉都成班當神拜,呢啲人在中共明明係九品芝麻官,唔入流㗎嘛。咁你咁願意作賤自己,人哋咪當你賤過地底泥囉。同埋中共都睇穿你哋根本冇能力,靠裙帶關係,一味靠癡靠lam著數,咁做咩仲要理你哋?一個香港咁細地方都搞到一鑊泡,添煩添亂,全部都係垃圾,咁不如以後我話晒事,你班垃圾全部做棋子收柯打做事就好了。中學時校長成日講,你唔self-respect,人哋咪唔respect you囉。

咁你哋本來都樂於做奴才,咪繼續打好份工,係度打生打死囉,不過以往對手係香港年輕人,今次變咗美帝,遲啲仲可能有埋英加澳紐云云,睇你哋表演,點樣反制美帝啦。然後中共估計都立咗軍令狀,冇得含糊冇得騎牆,邊個縮沙就送中招呼。但當然,萬一中共自己想縮沙,又會搵你哋祭旗先喎。Condom們,唔知你哋有做condom的覺悟未。我都好仁慈嘅,最後都勸你哋自己睇路,自己執生啦。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe