眾新聞 Logo
眾新聞 CitizenNews
眾聞

眾志早上4人退黨下午散解 馬嶽:似乎上午退黨不是黨內有共識行動


全國人大常委今早表決通過港區國安法,香港眾志黃之鋒、羅冠聰、周庭、敖卓軒4人先後宣布退黨。下午3時左右,香港眾志表示現時運作將難以持續,即日解散。中文大學政治與行政學系副教授馬嶽認為:「學生動源擺到明香港獨立嗰啲,比較會perceive自己風險好大;眾志,我諗因為佢(評估)真係被左報針對得相當緊要,話佢係港獨組織。」同時,馬嶽對於4人早上退出、下午全黨解散的表現感到奇怪,「如果你話眾志解散,你就一次過解散,唔需要前面那幾個人退出的過程,因為都無了組織。變了俾我的感覺,嗰4個人的退出好似係無傾過或者傾清楚的結果。」

眾新聞製圖

黃之鋒、羅冠聰、周庭三人是香港眾志創黨成員,眾志常委敖卓軒則專攻國際線,在海外做國際遊說工作。港區國安法表決通過的消息今早9時半傳出,不足兩個鐘後,4人分別宣布退黨。

馬嶽認為是「化整為零」的策略,「我諗佢哋的評估,如果照以往的做法,就好似香港民族黨咁樣非法組織呀、DQ(取消參選資格)。分散了的話,唔知道政權會點樣處理,雖然我懷疑未必有好大分別,但係佢哋可能覺得化整為零,活動彈性大少少,可能Jeffrey Ngo (敖卓軒)可以做多啲海外遊說」、「佢哋會覺得分散一些,要全部打壓的難度會增大了」。 

有左派報章指眾人退黨以減低九月份立法會選舉被DQ的機會。馬嶽認為有可能,「因為如果用2018年的標準,係眾志就已經DQ,即係周庭的經驗,雖然之後叫做打甩了。我唔知道、未必真係有影響,因為我諗其實DQ唔使俾理由的,我估佢哋(眾志)都係測試個可能性」。

退黨消息公布後,不過4個小時左右,香港眾志宣布解散:「本會今晨突得悉多名成員,包括秘書長黃之鋒、常委羅冠聰和敖卓軒,以及成員周庭,相繼自行宣佈離任本會職務及退出香港眾志。本會尊重各人的個人抉擇及意向,更感激他們過去幾年為眾志及香港民主抗爭所作的貢獻和付出。本會秘書處已按各人意願,即時撤銷黃之鋒、羅冠聰、敖卓軒及周庭之會籍。另外經商議後,香港眾志認為本會現時運作將難以持續,深感必需化整為零,眾人應以更靈活的方式繼續投入抗爭,現宣佈即日起解散及停止一切會務。」眾志並表示,成員將各自投入本地運動的不同戰線,最後說:「同行路上,必會再遇,香港人,街頭相見。」

香港中文大學政治與行政學系副教授馬嶽。港台資料圖片

馬嶽表示,今早4人退黨,令他感覺是一種「分散投資」,「上晝的諗法就係話幾個巨頭退出了,其他人應該無事的,希望佢唔會郁其他人,但係似乎下晝的聲明就唔係咁的睇法。即係上晝佢哋退出並唔係一個有共識的行動。」

馬嶽估計,陸續可能有獨派組織「冚旗」。至於九月份立法會選舉本土派或獨派被DQ的機會,馬嶽指:「如果DQ係用2018年的標準,根本係唔需要國安法,嗰時陳浩天那些都被DQ;但如果你用2019年區議會的標準,又真係好多本土派其實無DQ到,淨係DQ了黃之鋒。於是乎,就係視乎國際壓力、政府實際上的需要。應該講,民主派呢邊唔係好易估,因為唔容易估,就可能覺得分散啲,睇吓會唔會有啲入到有啲入唔到,可能會有利啲。但我諗都係一個兩難的局面,因為實際上你one hand or another你都唔會贏,即係話俾你估中條(紅)線又點。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe