眾新聞 Logo
眾新聞 CitizenNews
眾說

國安法後的幾點變化


「駐港維護國家安全公署」以銅鑼灣維景酒店作臨時辦公室,今早舉行掛牌儀式。美聯社

國安法後出現的新形勢同變化當然有好多,不可能全部預視, 但講住幾點我諗到的先。

1. 首先可以確定國安委成為軍機處,取代行會/內閣成為新的權力及決策核心機構。 本來好多人認為國安顧問會由國安署做,形成東西廠互相監視,中聯辦管政治國安署管拉人,但國安顧問都由中聯辦主任做埋,即係佢係毫無疑問的香港在地一把手,條 chain of command 好清楚,特首<中聯辦<港澳辦<中央。

咁樣一來,由佢擔任顧問坐入去的國安委,就令佢可以在體制內名正言順直接指揮港府。跟住,由於國安委全部保密,不受外間包括立法會監察,決定不容JR,仲唔係可以做乜都得?以後有需要就用國安委發布命令,冇人可以反對。唔好忘記,國安法講明公職人員、學校、社會團體、媒體,都係國安之內,以後要搞邊瓣咪由國安委出馬囉。

特區維護國家安全委員會本周一第一次會議,中聯辦主任駱惠寧(前排左二)也有參加,會後隨即頒布國安法43條的實施細則。政府新聞處照片
 

2. 咁嘅情況下,打壓勢將全方位而來,大家要認識依個新常態,多學習其他獨裁國家甚至大陸的經驗,政權會點樣打壓,同民間可以點樣盡量抵抗。擦邊球、碰底線點到即止的做法,將會越來越多。

我見到有人話你越退佢會得寸進尺,係對的。但一直堅持,繼續鬥勇鬥黃,又可能只係送頭。所以,到底點到邊度為止係既不會送頭又不至於太委屈,真係要慢慢試囉。 但講到底唔會人人都願意勇,始終最高係終身甚至送中㗎,有人如果只敢擦邊球,都唔好怪佢唔夠勇唔夠黃囉。

我會覺得依家保存實力,同政權鬥長命,係重要的。所以就算只係擦邊球,都係一種表態一種反抗。一日未沉默未放棄,未政治冷感未不聞不問,都係一種延續。當然對慣咗自由的香港人來講聽落係好屈就,但在一般獨裁國家來講,玩嘢都已經被視為一種反抗的了。

民主派本周六及周日舉行初選,大家投得票就投啦!

相關新聞:【初選Q&A】民主派周六日初選 全港設251票站 邊度投?點樣投?

3. 選舉都係。有網民問話簽唔簽確認書好。係咪簽確認書,其實都唔係今日先有的問題,只係依家多咗國安法。咁香港一向都好多派,各有各做㗎啦,結果都係有人簽有人唔簽㗎啦,由選民決定囉。不過簽咗就唔該交代返入議會到底為咗咩同會做咩,點解你簽咗大家都要投票比你。同埋冇話簽咗支持就佢用國安法做咩都唔可以反對,原則上支持國安法但你咁做就反對,依種擦邊球都拗得過掛。

咁我認為入議會都仲有佢用處嘅,反國安法唔係議員唯一工作,取得議員身分同資源都係一種保留實力,體制內抵抗得就抵抗。不過一國一制新形勢下,大家唔好用舊嗰套思維,鬥激鬥黃,要理解入體制係會有限制,不過條線同取捨係邊,就大家諗囉。

杯葛選舉我亦都唔覺得會有咩用,外國的杯葛例子通常都係冇咩作用。同埋如果仲想以35+為目標,初選可以有班人講明唔簽,但報名時真係要諗吓夾埋planB湊夠35個係入到閘囉。仲有雖則簽唔簽佢都可以DQ你,但簽咗都DQ就更顯得制度荒謬囉。

4. 跟住,法律界都要改變思維。雖則我都講咗抵抗得就抵抗,官司同辯護都係要做嘅,但真係唔好再幻想JR同逐條法律細節辯論係可以拗贏政府囉。有啲JR真係擺明嘥錢就無謂囉。尤其唔好比我聽到咩JR國安法/國安委/國安署呀,雖則我估法庭都唔會受理。

5. 最後,隨著治港以硬來的打壓為主軸,同埋大陸人員直接進駐,個人估計一些以往對中間人的支持會減少,維穩團體同維穩費亦會減少,主要講緊商界同牆頭草嗰類, 撐市會改加重由國家隊負責,同埋會多咗黑勢力同瘋狂藍絲的恐怖襲擊。簡單講就少咗文攻多咗武嚇,呢個都係大家要小心的。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe