眾新聞 Logo
眾新聞 CitizenNews
眾說

為何要剝奪告急的權利?


【撰文:阿宏】

今次泛民初選第二日,聽得最多係本土派譏笑黃碧雲告急催票,但講法真係好唔公平,趁現在投票完畢先講。截至4pm,我見到嗌告急的唔只黃碧雲,起碼有李予信、劉偉聰、林景楠。當然大圍氣氛就是要踢走黃碧雲所以特別招呼佢,但如果連告急都唔可以講,未免太欺人太甚。

民主黨黃碧雲昨日下午嗌告急,呼籲民主黨支持者參加初選投票。

其他候選人(包括本土派)都會講「選情緊張」」/「選情嚴峻」/ 「推上票數高峯」/「嗌埋朋友投票」... 除咗字面上,口號的意義同「告急」冇乜大分別,只係表達不同,都旨在催谷未投票的票數,只係「告急」觀感上難聽啲咁解。除非候選人是余若薇呢類吸票機人物,否則一般候選人到最後關頭都需要嗌下告急呼籲投票。如果以本土派邏輯「黃碧雲唔可以嗌告急」,咁點解其他人甚至自己又可以用其他口號去催谷投票嘅雙重標準。

難道我哋要將「告急」造成選舉的敏感詞,成為民主派嘅準則是唔可以嗌告急?

本土派亦經常引用梁天琦的「做得差先要告急」論去笑黃碧雲,我唔評論黃議員係咪真係咁差,但梁天琦當時情況同依家完全唔同。

時為新界東湯家驊議席補選,梁天琦外的主要參選人包括楊岳橋、周浩鼎、黃成智、方國珊等。當時楊岳橋人氣高企,也不需要告急,所以被笑告急的對象應該是周浩鼎或黃成智。梁天琦譏笑的對象起碼不是簡易理解同為民主陣營的楊岳橋,不似今日的做法。

補選議席為單議席單票制,2020初選是多議席單票制,前者基本上是兩大陣營對壘,打告急牌其實冇太多作用;相反初選參選人透過催谷自己票源,希望至少可以尾席過關,告急的作用明顯得多。

民主選舉落場無父子,言語攻擊對手無可厚非,但參加初選的人9月還要一同抵抗共產黨的無情攻勢,現階段攻擊日後的政治聯盟時可否帶最基本的尊重和公道。

市民也請思考一下「告急」係咪真係唔講得,唔好人云亦云。人云亦云的政治唔係獨立思考,唔係同你哋最鄙視嘅小粉紅太大分別。

題外話,睇番梁天琦當日的選舉片段,唔單止有教主黃毓民站台,更加有直播抗爭嘅現任立法會議員鄭松泰博士著本民tee助選,到底佢哋仲係咪本土派?本土派今時今日又想唔想人攞番出嚟講?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe