前日因為夜深，冇再分析落去，昨日再整多個表做比較。可以睇到現任民主派議員中，舊民主派佔14，抗爭派＋本土派只有2或3人（唔知鄭松泰算邊樣好），但今次初選結果，頭26名只有9人係舊民主派，抗爭派＋本土派佔絕大多數，就算有網民要求加番涂謹申、胡志偉、快必、范國威，對民主派內部結構劇變呢個大勢都係影響不大。
有網民好仔細分析得票，我都整咗個excel表，但諗落始終初選投票人數有限，結構亦肯定會同正選有唔同，所以我就唔研究太多了。配票甚麼的等DQ同planB同有正式鍾氏民調再講啦。
仲有多樣資料提供，就係我講過的年輕化。我在表上加埋年齡後（按維基／過往參選時申報推算），計出現任議員平均年齡50.2歲，出線者平均年齡34.1歲，細咗足足16年，港島區4個出線者平均年齡更只有29.75歲！就算加上涂謹申57、胡志偉57、快必48、范國威53，都只係平均36.8歲。民主派支持者的求變之心，比新人特別係年輕人機會，好明顯了。
