眾新聞 Logo
眾新聞 CitizenNews
眾聞

【醫學會選舉黃營全勝】蔡堅:壁壘分明太清楚 未必係件好事


醫學會換屆選舉,由曾擔任4屆醫學會會長的元老蔡堅領軍挑戰會長何仲平競逐連任,被視為醫學界「黃藍對決」,事前兩隊被指「五五波」。投票結果昨晚出爐,蔡堅12人團隊全勝。蔡堅接受訪問時直言,原本只預計8成團隊成員會勝出,「差唔多20年都未試過全勝」。但這名領勝將軍卻坦言,整個團隊全勝未必是件好事,「就如社會縮影,壁壘太分明」。

新一屆醫學會選舉,蔡堅12人團隊全勝。 (蔡堅醫生 HKMA 團隊facebook圖片)

蔡堅接受眾新聞訪問時指,多年來醫學會選舉都未試過大勝,現時投票結果仿如社會縮影,不是一件好事:「壁壘分明得太清楚,等於見到香港縮影咁,投票又係六四比,等同依家香港社會政見比數,會變咗係政見好影響投票。」

醫學會有1.2萬個醫生會員,是次選舉有逾5000名會員投票,會長一職蔡堅獲3,175票,對手何仲平則獲1,941票。蔡堅和其他團隊成員得到約6成會員支持。「之前無一個咁既機會比會員表態,無做過普查或統計,所以一路都唔係好清楚(投票意向)。呢個差唔多係一個調查比我地睇清楚。」上屆會長何仲平是在無競爭下當選為會長。

被問到是次勝出,是否因會員希望投一位敢言的會長? 蔡堅說:「自己做咗個會20年,大致知道會員啲睇法係點,知道佢哋需要一個為會員出聲嘅會長。」蔡堅說未有投票結果前,已預計自己會贏。

去年反送中運動,蔡堅曾多次發聲,被外界指他是「黃底」。蔡堅去年在反修例期間曾接受眾新聞訪問,當時他曾提及,自612起不斷要求醫學會表明立場,但一直不成功,醫學會也沒有辦集會讓醫護人員有發聲機會,當時作為醫學會會董的他「感到慚愧」。

 分析是次大勝原因,蔡堅不認同是因老一輩醫生覺醒,反而是多了年輕一輩的醫生願意出來投票:「以前少後生醫生係呢啲選舉投票,之前佢哋覺得無咁既需要,覺得醫學會係一個好保守既會,直情唔係好理個會,但依家睇法有啲轉變。」

國安法立法,不少公眾人物開始自我審查,向來敢言的蔡堅當上醫學會會長,他說未來說話或做事會更小心:「我地都會好小心講野同做嘢,個會(醫學會)會debate多啲,討論多啲,然後先發表方向同意見。以往部分senior會董會就咁講哂啲嘢出左街,現在就會傾耐啲,叫大家諗深遠啲先講。日後唔會話唔敢講,講既時候會睇清楚有無過界線。要strike a balance平衡啲。」新一屆會董會將於周日開會,他將跟獲選成員討論「COVID-19」的問題、如何在私人執業方面控制疫情等。

今屆醫學會選舉期間,他曾接獲醫學會秘書處通知,指收到市民電郵投訴,引述他在《眾新聞》和《蘋果日報》的訪問內容,指他詆譭上屆主席何仲平和其他會董,違反了醫委會《香港註冊醫生專業守則》裏「中傷同業」和「自我宣傳」條例,當時電郵副本亦有抄送至中聯辦,雖然投訴毋須跟進,但醫學會跟中聯辦的關係逐成為焦點。 

蔡堅指以往醫學會一年大約會跟中聯辦有2次飯聚會面,「依家就唔知會唔會,要睇中聯辦有無約。」他說如有機會跟中聯辦會面,會坦率表達業界意見:「佢問我地一定答佢,唔會避忌,唔會順著佢意來答佢。業界取向業界感受,全部都會照直講。」

蔡堅年屆70歲,至今擔任過4屆醫學會會長,今次勝出將會是他第5度擔任會長一職,任期兩年。蔡堅坦言今次出選是臨急臨忙的決定:「今次唔係想做,臨急臨忙最後幾日先決定,搵唔到後生接棒。」他指未來一定要交棒,現時開始在新舊會董中挑選接班人,心目中已有人選。

 

蔡堅 12 人團隊全數勝出名單:

會長:蔡堅

副會長:鄭志文、麥肇敬

義務秘書:馮德焜

義務司庫:楊協和

會董:陳厚毅、覃天笙、陳子泰、陳以誠、周榮新、何鴻光、紀紹綱

全港有約1.4萬名醫生, 醫學會有逾1萬名醫生會員 

 




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe