眾新聞 Logo
眾新聞 CitizenNews
眾聞

【認暴動罪】還柙青年阿均獄中信:遇見大隻勇武、書生手足,都係有血有肉嘅人


 

去年7月28日,有44人被指在上環干犯暴動罪,25歲的阿均(化名)是其中一位。今年5月尾,他於庭上表示擬認罪並要求取消保釋,至今已還柙近2個月。阿均回信眾新聞講述近況以及對港區國安法的看法。

阿均說,在獄中遇到形形式式的人,譬如跟大隻「真勇武」練體能、遇到讀政政(政治與行政學系)的本土派跟他分享《金剛經》。6月底,他從荔枝角收押所被調到赤柱監獄:「中間隔咗十幾日先再收到家書,嗰段日子,雖然我表面冇嘢,但我內心係幾崩潰。」至於國安法,他說「樂見」攬炒,並籲打好文宣戰。

相關文章:25歲青年承認暴動罪:牆外比牆內,更沉重難過

眾新聞製圖。(左圖攝於阿均認罪還柙前)

以下是阿均的來信全文:

還柙咗一段小日子,仍然對呢度感到有少少新鮮,彷彿被人掟咗入個新世界,而我當然唔係呢個世界嘅人。入到嚟遇到各式各樣嘅人,有詐騙、傷人 (有啲即係私了)、(903播緊數碼暴龍01日文主題曲,好正!) 醉駕、毒品、打劫……當然有背景嘅人仍然係大多數,政治犯 (入面統稱「黃絲」,縱然我唔會咁稱呼自己) 只係少數,所以有「他鄉遇故知」之時,絕對感到欣喜。有遇過大隻嘅真勇武,跟佢做咗一轉體能,我彷似係水中被人撈出嚟咁,而佢仲可以繼續做多轉。亦遇過本土派,讀政政的,無所不談,係一個流動圖書館,今日佢就向我分享《金剛經》。

初見面時,傾起大家衰邊單,發現當日上報紙嘅人活生生出現起我面前,我除咗有「哦 ! 原來係你 !」嘅反應之外,亦會有「被捕嘅唔係數字,而係有血有肉嘅人」嘅感慨,真係好近,而「這事每日也發生」(呢首歌好見血)。又有見過拎氣槍指住警察嘅,自稱「黃絲」,claim 612每月九千蚊私飯錢,轉頭就扔咗份「解悶工廠」,應該都只係因為情緒失控而犯案,佢係有少少躁狂。入面真係乜人都有。

與外界聯繫嘅方式,只有探訪同埋書信。有段時間因為我調離荔枝角,中間隔咗十幾日先再收到家書,嗰段日子,雖然我表面冇嘢,但我內心係幾崩潰。不幸之中嘅小幸係有筆友經議員回信 (因議員信件特別處理,所以仍能收到),同埋我晚晚都翻睇舊信,勉強叫做補到少少血。除此之外,基本上還柙生活都尚算「愉快」。

講下國安法,「香港人驚驚 ! 國安法殺埋嚟我驚驚 !」睇新聞見到大家不斷避紅線,又有唔少專業人士分析點先踩線,但紅線變得快過武漢肺炎,自由嘅淨土只會愈來愈少,「今日割五城,明日割十城,然後得一夕安穩。」你又避得去邊? 中共空降國安公署,有指引監督香港國安事務之職能,結果只會好似果張紅底文宣所畫,三個齒輪卡埋一齊,最終注定係攬炒。所以國安法係我「喜聞樂見」的,畢竟最出血嘅一定唔會係我呢啲no stake嘅人,波叔,你收成好未 ?

「你在牢籠被引渡,渡往了啞巴的國度。」香港喺我眼中,其實已經淪陷咗,始終賴以維生,引以為傲嘅制度、自由、聲譽、保障已經一一消逝。無根之樹,焉能不倒 ? 所以我希望各位保留有用之軀,要記住極權最害怕嘅係文宣,因為勇武只能脅迫政權 (同埋製造畫面[sosad]),但文宣可以喚醒人心 ! 所以國安法主要係用嚟打文宣嘅,不費一兵一卒,就叫你親手撕走,攻心 ! 千祈唔好忘記你嘅信念同埋呢個時代嘅歷史,即使他朝移居海外,只要你仍然相當自由,你始終係呢個時代嘅香港人。

身處白色恐怖,請揸緊你嘅中指。「你可以卑微如塵土,但不要扭曲如蛆蟲。」

二零年七月五日午 

阿均從赤柱監獄寄來的信。



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe