如果話721係香港警民，甚至官民關係的轉捩點，相信多數人都會同意。本應保護市民的警方，在早就知有社團將要上街亂打人之下，故意袖手見死不救。假如知情不報都當係幫兇，咁知情不救何嘗唔係更嚴重？721係徹底令問題由政見之爭變成良知之爭。以往亦有民調顯示，721係對反送中／反政府市民的影響力最大事件之一。
但最近亦有民調話，市民的反政府情緒似乎稍有減退，不少人討論要加大文宣同擔心立法會選情。我又唔太擔心呢樣。我覺得呢個主要係政局淡靜，令市民注意力去咗第度之故，選舉臨近氣氛熾熱返就會唔同，好似初選咁。其實過去經驗顯示，你得閒無事寫再多文宣同論述都唔會夠一單全民關注的大事影響大，所以文宣應集中在關鍵日子提醒大家警暴同政府無能，效果更大。而近期係好多反送中大事周年，加上疫情反彈民怨都會反彈，同埋DQ亦勢必搞一輪，如果9月6日選舉，屆時民情應對民主派有利。
重點係，如果9月6日選舉，如果。咁多負面因素重疊，難怪親中派驚輸，開始不斷喊要推遲選舉。筆者唔young但好天真（國安法殺到嚟都堅持唔拎外國護照，信政府）的家人就問我，冇立法會政府點推政策同預算。好簡單，家陣國安委係三權之上，佢講乜就要做，JR都唔比，冇立法會， 國安委話係國安問題落柯打，咪乜都解決到囉， 唔好忘記政府施政受阻都係國安問題嚟㗎。一個唔覺意真係由國安委取代立法會呀。
家人又話，咁就大鑊，以阿乜總的底線思維（家人信對家文宣信到十足，底線思維係全世界最強思維）， 一定用最強硬方式處理，立法會冇啦冇啦。我就話，都未必嘅，大陸獨裁的好處就在隨時180度改政策都冇人挑戰，當年鬧到美帝血海深仇咁，咪都係一個屈尾十就同人握手談笑風生。 所以暫時一步睇佢DQ幾多人先再講啦。總之，努力爬山， 做得就做啦。
