第三波疫情爆發持續，醫學會周四（23日）召開記者會，建議政府全民派發$3000元「新冠肺炎醫療券」，資助市民作在私家醫院進行病毒檢測或其他與新冠肺炎有關的醫療服務。醫學會會長蔡堅認為新一波疫情最大機會是由獲豁免檢疫人士引起，政府若不改變政策，「全中國嘅專家落嚟都冇乜用」。
醫學會表示注意到，現時等候檢測結果長達5至7日，大大提升病毒在社區傳播的風險，實在難以接受。該會建議政府可以醫療券形式，考慮向全港市民發放3000元「新冠肺炎醫療券」，資助市民在私營市場進行病毒檢測的費用或其他與新冠肺炎有關的醫療服務。醫學會會董陳以誠表示，現時在私家醫院或化驗所檢測最平都要千元起跳，對普通市民難以負擔，價錢高昂或許令他們對檢測卻步：「依家非常時期，既然之前都可以比2000元（醫療券）佢哋（長者）買眼鏡，而家可唔可以比3000元全港市民都可以去驗，大家三贏局面。」
蔡堅指，現在很多病人因擔心自己患上新型冠狀病，有焦慮症、抑鬱症甚至驚恐症：「呢啲都需要教育或治療，先可以幫佢哋控制。有好多戴住口罩整到成面暗瘡，有啲皮膚敏感，有啲原本心臟病或個肺有問題，戴住口罩呼吸有困難，呢啲全部都要檢查。」他希望$3000元可以在未來一年幫助新型冠狀病毒引致其他疾病的病人。
第三波疫情爆發，人人誠惶誠恐，擔心自己「中招」去進行檢測。蔡堅表示，相信因樣本瓶短缺，當局改為派發比以往小的樣本瓶。他指，最新派發的樣本瓶直徑比一個兩毫硬幣還小，長者在採集深喉唾液樣本時會有困難：「叫啲老花嘅公公婆婆吐口水落去驗，一定會整到周圍都係，側邊一定會污染，防護中心講明樽面濕咗唔會處理，咁其實係製造困難比老人家，擔心老人家感染問題。」
傳內地醫護來港抗疫 蔡堅：會造成混亂
對於早前中聯辦旗下的《香港商報》引述來自微信公眾號「碩鳴灼見」的消息指，行政長官林鄭月娥已向中央求助，若本地疫情持續惡化，導致醫療系統無法應付，希望中央提供協助。蔡堅表示聽聞是「Fake news，唔知應唔應該comment。」但他續指，公立醫院的醫生全部用英文寫病歷和輸入電腦資料，如果有國內醫護來港，說普通話寫簡體字，屆時就會造成一定混亂。他又指：「係咪要取代（香港醫護）我唔知，定係佢哋就去方艙醫院做嘢，都未嘗不可，但我就唔會話over my dead body呢啲咁激烈嘅語句。」
陳以誠表示，根據醫學界議員陳沛然最新公布的研究，現時醫管局住院率只有45%，兒科床位使用率只有29%，醫管局基本上完全沒有人手不足的情況。他笑言連公立醫院都沒有人手不足的情況：「唔好講話好多私家醫生都喺度拍烏蠅，好似兒科咁，唔使返學唔使返幼稚園個個戴晒口罩，係屋企唔出去，要感染到呼吸病係困難上嘅困難。」陳以誠表示沒有國內醫護來港協助的需要。
至於醫管局有否邀請私家醫生幫忙，蔡堅指如政府要求私家醫生幫忙，一般都是參與門診工作，而非巡房和做手術等，但若鯉魚門渡假村需要私家醫生幫忙，私家醫生也可以幫忙，但暫時未收到政府邀請。
20萬人次入境豁免檢疫 蔡堅：引起新一波疫情
今年2至5月最少有20萬人次入境香港時獲得豁免檢疫，醫學會會長蔡堅認為新一波疫情最大機會是由獲豁免檢疫人士引起，「有乜可能話俾我哋聽，呢20萬人都冇一個可能既傳播性。」他強調不應該有人獲豁免，如果當局繼續不反省，將香港放在危險狀況上：「就算係搵晒全中國嘅專家落嚟都冇乜用。」醫學會建議所有來港人士包括航空機組人員、船員及其他獲豁免人士，必須接受快速測試，檢測結果呈陰性才能離開口岸或指定地區，入境人士必須嚴格遵守強制檢疫規例，亦應限制機組人員或船員進入公眾地方。
被問到為何澳門可以每天做11000個檢疫測試，新加坡可以做兩萬個檢疫測試，是否測試方法與香港不同？蔡堅以四字回應：「特首不同。」又被問到仍需外出上班的市民會否造成抗疫漏洞，蔡堅諷刺說現時病發來源大多來自：「參加啲慶祝會，攬身攬勢攬住唱歌，踢完波大家又除咗口罩影相，引起感染原因多過返工攞住飯盒食，多過話戴住口罩返工。」對於政府過去數月的抗疫評價，蔡堅直言：「我嘅評價一向都好harsh，我都唔講啦。」
