眾新聞 Logo
眾新聞 CitizenNews
眾說

香港收成期社會賢達冇令人失望


充斥香港收成期社會賢達的港大校委會以18比2高票通過炒掉「 戴妖」戴耀廷,筆者這麼愛國愛港當然是舉腳贊成,尤其是見到中聯辦九秒九出聲明表示支持,仲唔識do咩。

再看一次校委會成員:李國章(主席)、陳韻雲、趙子翹、黃永光、潘燊昌、施文信、陳坤耀、劉麥嘉軒、石禮謙、黃景強、王沛詩、楊紫芝、張翔、梁高美懿、陳志武、高一村、盧寵茂、岳中琦、張達明、李梓成、王宇辰、陳衍里、戴健文(p.s. 陳志武缺席,張翔、張達明沒投票,傳2票反對是李梓成、戴健文)。

其中兩位港大校委劉麥嘉軒(左)和陳韻雲出席校委會會議。林勵攝
李梓成(右)與另一名校委會委員石禮謙。林勵攝

真是位位都是香港收成期社會賢達中的那粒星,果然冇令西環失望,班九品芝麻官(以中共角度計)叫你咬誰就咬誰,為年輕人做了好好的榜樣:在香港地想上位想收成,做隻神犬拉西就對了。就算你幾有錢幾有社會地位,你的本質都係一隻拉西,乖。有記憶力同眼力都唔知點解咁好的網民,就找出當年學生衝入校委會會議(盧寵茂在地上安詳睡覺嗰次)的照片,發現最新一代中間超人轉世靈童, 啟迪了港獨份子劉穎匡嗰位李啟迪都在場。拿咁咪就係受教,未來一片光明的社會賢達棟樑囉。

跟住又有廢青話咁樣係破壞港大破壞下一代,又話咁多委任成員的校委會制度有問題,我當然都係唔同意。學收成界KOL波哥話齋,香港只有年輕人破壞收成期,唔存在收成期破壞年輕人。上一代收成人建立港大,依家收成人當然有權破壞返港大不是嗎?本來無一物,何處惹塵埃?(好似唔係咁解,不過算了)同埋眾所周知,香港制度一向行之有效,校委制度都係殖民地遺留下來,點解以往唔批評?仲唔係崇洋反中?根本香港的制度本來就係咁,當權者大把權在手隨時可以用盡,冇人可以制衡。如果你以為香港一直都係制度好好,核心價值係民主自由法治,只係依家被壞人破壞,學千古罪人講咁係有人出賣同葬送香港,咁真係個美麗的誤會,其實從來都沒有。你睇班社會賢達,誰關心民主自由法治?根本香港一路都係做拉西先上到位,做拉西先係香港核心價值,無論殖民地時代定而家。

至於有人話可能令港大國際地位受損,甚至校委全部被美國制裁,你同我定,港大國際地位都係中央賦予的,中央想要哪裡有國際頂級大學就哪裡有國際頂級大學,洗乜理美國佬?美國佬唔比學者交流、中斷合作項目、操控國際排名,都係冇影響,我話嘅。依班校委肯定唔洗驚,唔洗擔心外國銀行帳戶被封,西環實會餵骨頭比你哋食到飽的。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe